AFCON: Nigeria y’abakinnyi 10 yasezerewe, Tunisia na Burkina Faso zikomeza muri kimwe cya kane

Tunisia yasezereye Nigeria yahabwaga amahirwe yo kwegukana igikombe cy’Afurika kiri kubera muri Cameroon, nyuma yo kuyitsinda 1-0 muri kimwe cy’umunani (1/8) mu mukino wabereye kuri Roumde Adjia stadium mu ijoro ryakeye.

Ni umukino watangiye amakipe yombi asatirana cyane, gusa ntihagira n’imwe yinjiza igitego mu izamu ry’indi ndetse nta n’uburyo bukomeye bugana mu izamu bwabonetse mu gice cya mbere cyarangiye ari 0-0 ku mpande zombi.

Mu gice cya kabiri Tunisia yagarutse irusha bigaragara Nigeria ndetse ku munota wa 47, Youssef Msakni aza gutsinda igitego cya mbere cya Tunisia nyuma yo gutera ishoti hanze y’urubuga rw’amahina maze umunyezamu wa Nigeria arwana nawo ariko uranga ugana mu nshundura.

Nigeria yagerageje kugaruka mu mukino ngo yishyure ndeste umutoza wayo Augustine Eguavoen aza gukora impinduka zitandukanye zirimo kwinjiza mu kibuga Alex Iwobi hasohoka Kelechi Ihenacho.

Gusa ntibyaje guhira Super Eagles dore ko Alex Iwobi amaze iminota mike mu kibuga yahise ahabwa ikarita itukura ku munota wa 66 nyuma yo gukandagira kapiteni wa Tunisia, Youssef Msakni ku bushake.

Nigeria yakomeje kugerageza kwishyura igitego n’ubwo yakinaga ifite abakinnyi 10, gusa ntibabashe kubyaza umusaruro uburyo yabonaga cyane cyane nk’igitego cyaraswe na Umar Sadiq wari winjiyemo asimbuye.

Ibi byatumye umukino urangira Tunisia itsinze Nigeria 1-0 ihita ikomeza muri kimwe cya kane aho izahura na Bukina Faso, kuwa gatandatu tariki ya 29 mutarama uyu mwaka.

Burkina Faso yabonye itike ya kimwe cya kane (¼) nyuma yo gutsinda Gabon kuri penaliti, dore ko umukino wari warangiye amakipe yombi anganyije 1-1.

Burkina Faso niyo yabanje igitego cyatsinzwe na Bertrand Traore ku munota wa 28, gusa kiza kwishyurwa na Ecuele Manga, ku mupira yateye n’umutwe maze Adama Guira aritsinda.

Haje kwitabazwa iminota 30 y’inyongera nyuma iminota 90 yari yarangiye ari 1-1, gusa ntihagira ikipe ibona igitego cy’itsinzi, maze bitabaza penaliti Burkina Faso itsinda 7 kuri 6 za Gabon.

Uyu munsi imikino ya kimwe cy’umunani (1/8) iraza gukomeza, aho saa 18:00 Guinea irakina na Gambia naho saa 21:00 Cameroon ikine na Comoros.

Abakinnyi ba Tunisia bishimira intsinzi.

Abakinnyi ba Burkina Faso bishimira instinzi.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO