AMAFOTO: Joseph Habineza Yasezeweho bwa nyuma

Kuri uyu wa Mbere tariki 30 Kanama 2021 nibwo habaye umuhango wo guherekeza bwa nyuma nyakwigendera Ambasaderi Joseph Habineza uherutse kwitaba Imana.

Uyu muhango wabereye mu rugo iwe aho yari atuye witabirwa n’abo mu muryango we, inshuti n’abo bakoranye mu nzego za leta barimo Perezida wa Sena Dr Augustin Iyamuremye, Bernard Makuza wabaye Minisitiri w’Intebe n’abandi.

Umwe mu batanze ubuhamya ni umuvandimwe we Habumuremyi Jonas utuye muri Kenya ari nawe wamurwaje kugeza yitabye Imana.

Habumuremyi Jonas yavuze ko uretse kuba umuvandimwe wa nyakwindera Habineza yari inshuti ye y’akadosohoka ndetse ko hari imishinga bari bafite bagombaga gufatanya.

Agaruka ku minsi ye ya nyuma, Habumuremyi Jonas yavuze ko Habineza yarinze ashiramo umwuka ataragaragaza gucika intege cyangwa se kubabara.

Ati “Yaje kuruhukira mu mabako yanjye nk’inshuti ye. Joe ntiyapfuye yarasinziriye kuko igihe cye ku Isi cyari kirangiye. Ntabwo wabonaga ababaye cyangwa agoye.

Ikintu cyose twavuganaga yahitaga aseka akavuga ngo ibintu bimeze neza umunsi we warageze aritahira, icyiza asize izina rye ryiza.”

Habineza yitabye Imana atarebye ubukwe bw’umuhungu we witwa Cedric biteguraga umwaka utaha. Ngo biri mu bintu yakundaga kuvuga mu bihe bye bya nyuma.

Tuganira ku wa kabiri nta kindi kintu yavugaga kitari ubukwe bwa Cedric. Ambwira ati “Jonas urabona ngiye kuba sebukwe? Nkamubwira nti ni byiza, ugomba kumenya ko bazakwambika za ngofero n’inkoni, ubwo wagiye mu basaza. Na we ngo oya! Nzaba Sebukwe ariko ndi Young Forever.”

Umuhungu we Jean Michel nawe yabigarutseho avuga ko babajwe n’uko atazaboneka muri ubu bukwe.

Ati “Ikintu gikomeye nuko atazaba ari mu bukwe bwa Cedric. Birambabaza cyane yari abwishimiye cyane! Hari inshuti ye bari kumwe muri Nigeria yavuze ngo mu bintu yavugaga mu minsi ye ya nyuma bwari ubukwe bwa Cedric. Birababaje ko atazaba ahari.”

Nyakwigendera Joseph Habineza yitabye Imana tariki 20 kanama 2021, aguye i Nairobi aho yari kwivuriza. Asize umugore n’abana bane.

Perezida wa Sena Dr Augustin Iyamuremye, Bernard Makuza wabaye Minisitiri w’Intebe n’abandi baherekeje Joe Habineza


Photo by Hose.rw

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO