AMAFOTO: Shampiyona y’u Rwanda yabonye umuterankunga mushya mu gihe cy’imyaka ine

Ishyirahamwe ry’Umupira w’Amaguru mu Rwanda (FERWAFA) ryasinyanye imyaka ine n’Uruganda rwenga ibinyobwa rwa Bralirwa nk’umuterankunga mukuru wa Shampiyona y’Icyiciro cya Mbere izitirirwa ikinyobwa cya Primus.

Kuva mu mwaka ushize, FERWAFA na Bralirwa byari mu biganiro ndetse ubwumvikane bw’impande zombi bwagezweho mu ntangiriro z’uyu mwaka nubwo byari byaragizwe ibanga
Kuri uyu wa Kane ni bwo FERWAFA yasinye amasezerano na Bralirwa imyaka ine, aho Shampiyona y’Icyiciro cya Mbere izitwa ‘Primus National League’.

Amakuru agera kuri GenesisTv/bizz avuga ko bemerenyjijwe ko Muri uyu mwaka wa mbere, Bralirwa izatanga miliyoni 180 Frw, ukurikiyeho miliyoni 160 Frw.

Impande zombi zumvikanye ko mu gihe FERWAFA yabona undi muterankunga ushobora kuyiha amafaranga ari hejuru y’ayatanzwe na Bralirwa, uru ruganda rucuruza ibinyobwa ruzaba rusabwa kuyongera cyangwa bagatandukana.

FERWAFA yatangiye gukorana na Bralirwa mu mwaka w’imikino wa 2004/05 biza guhagarara kugeza mu 2009 ubwo yasinyaga imyaka itatu yageze mu 2012 kuri miliyoni 335 Frw.

Mu 2012/13, Bralirwa yongereye amasezerano kuri miliyoni 160 Frw mu gihe shampiyona yitwaga Primus National Football League naho mu 2013-2014, yatanze miliyoni 170 Frw shampiyona yitwa Turbo King National Football League.

Aha, ikipe yatwaye shampiyona yahabwaga miliyoni 10 Frw mu gihe mbere y’uko umwaka w’imikino utangira, buri imwe yagenerwaga miliyoni 2 Frw.
Shampiyona y’u Rwanda yari imaze hafi imyaka ibiri nta muterankunga ifite nyuma y’uko FERWAFA itandukanye na AZAM TV.

Kugeza ubu, ntibiramenyekana igihe Shampiyona y’Umupira w’Amaguru izasubukurirwa mu Rwanda nyuma yo guhagarikwa na Minisiteri ya Siporo ku wa 12 Ukuboza 2020 kubera ubwandu bwa COVID-19 bwagaragaye muri amwe mu makipe. Icyo gihe yari igeze ku munsi wa gatatu.

Umupira w’amaguru nturi mu cyiciro cya mbere cya siporo ziheruka gukomorerwa ngo zisubukure imyitozo. Ingamba rusange zo kurwanya COVID-19 ziheruka gufatwa n’Inama y’Abaminisitiri zizageza ku wa 15 Werurwe 2021.

Amasezerano yasinywe none



Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO