APR FC yinyaye mu isunzu ibona intsinzi Kiyovu Sports na AS Kigali ziranyerera

Mu mpera z’iki cyumweru shampiyona y’u rwanda yakomezaga ikipe ya APR FC kera kabaye ibona amanota 3 nyuma yo gutsinda Gorilla naho ikipe ya Kiyovu Sports na AS Kigali ziranyerera nyuma yo kunganya imikino yazo.

Umukino wabereye kuri Stade ya Kigali I Nyamirambo Ikipe ya APR FC yabashije kubona intsinzi nyuma yo gutsinda ikipe ya Gorilla igitego 1-0 aho iki gitego cyatsinzwe na Mugunga Yves ahagana ku munota wa 29 w’umukino.

Nyuma yo guha Adil Erradi Mohammed ibihano byo guhagarikwa ukwezi kuri ubu ikipe ya APR FC irimo gutozwa n’umutoza wungirije ariwe bwana Ben Moussa Abdessatar ndetse uyu mutoza yabashije kubona amanota 3 nyuma yo gukorwa mu jisho na Espoir mu minsi mike ishize bakanganya 0-0.

Mu yindi mikino kandi ikipe ya AS Kigali yanganyije na Bugesera 0-0 mu mukino Bugesera FC itishimiye imisifurire kuko yangiwe igitego umusifuzi avuga ko habayemo kurarira nyamara amashusho yagiye hanze benshi babifashe nk’urucabana kuko abenshi bavuze ko cyari igitego gisukuye.

Ku rundi ruhande kandi ikipe ya Kiyovu Sports yanganyije na Rutsiro FC ibitego 2-2 nubwo bwose ikipe ya Kiyovu Sports yatangiye itsinda ibitego 2-0 biza kwishyurwa na Rutsiro maze umukino urangira amakipe yombi aguye miswi ibitego 2-2.

Dore uko imwe mu mikino yagenze mu mpera z’iki cyumweru

Rutsiro FC 2-2 Kiyovu Sports
AS Kigali 0-0 Bugesera FC
ESPOIR FC 1-1 GASOGI UTD
Rwamagana 1-1 Etincilles FC
APR FC 1-0 Gorilla FC


Ikipe ya APR FC yongeye kubona amanota 3 nyuma yo kunanirwa gutsinda Espoir

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO