APR FC yabimburiye abandi mu kwipimisha COVID-19 - AMAFOTO

Ubuyobozi bw’ikipe ya APR Fc bwapimishije abakinnyi bayo ndetse n’abatoza, icyorezo cya Covid-19, nyuma yo guhabwa amabwiriza avuye mu ishyirahamwe ry’umupira w’amaguru ndetse na Minisiteri ya siporo abasaba kubikora mbere yuko batangira imyitozo.

Kuri uyu wa Kabiri Tariki 29 Nzeri 2020, abakozi bose b’ikipe ya APR FC bapimwe icyorezo cya COVID-19 nyuma y’itangazo rya Minisiteri ya siporo rikomorera itangira ry’ibikorwa bya siporo mu gihugu hose ryasohotse.

Iki gikorwa cyabimburiye itangira ry’imyitozo y’ikipe y’ Ingabo z’Igihugu yitegura umwaka utaha w’imikino cyabereye ku bitaro bya gisirikare bya Kanombe (Rwanda Military Hospital) saa tatu za mu gitondo, kikaba kitabiriwe n’ Abakinnyi 31, Abatoza 04 n’abandi bakozi bose bashinzwe ubuzima bwa buri munsi bw’ikipe.

Kwipimisha ku ruhande rw’ikipe ya APR Fc ntabwo bivuze ko irahita isubukura imyitozo, ngo kuko igomba kubanza kubihererwa uburenganzira n’Ishyirahamwe ry’Umupira w’Amaguru mu Rwanda (Ferwafa)

Guhera tariki 28 Nzeri 2020, ibikorwa byose by’imikino byafunguwe na Minisiteri ya Sport. Aha Minisitiri Munyangaju Mimosa yasabye ko amakipe yose azitabira amarushanwa runaka agomba kuba yarapimwe Covid-19.

Uretse kandi APR Fc ndetse na REG Basketball Club zabimburiye izindi mu kwipimisha Covid-19, andi makipe yose arasabwa kubahiriza ibi, kugira ngo azemererwe n’amashyirahamwe ndetse na minisiteri ya sport gukina imikino ya shampiyona yewe n’indi itandukanye.

Umwaka utaha w’imikino APR FC ikaba izitabira amarushanwa y’imbere mu gihugu, CECAFA Kagame Cup 2021 ndetse na CAF Champions League. Ikaba ifite intego yo guhatanira ibikombe byose bikinirwa mu Rwanda, CECAFA Kagame Cup ndetse no kugera mu matsinda ya CAF Champions League.

Amafoto ya bamwe mu bakinnyi ba APR FC bari gupimwa Covid-19





Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO