Abafite ayabo barakimara muri Amerika hari uwishyuye Miliyoni 19$ kugirango asangire na Warren Buffett

Biratangaje aho muri Leta zunze ubumwe za Amerika abantu benshi bahataniye kwishyura amafaranga menshi kugirango babashe gusangira n’umuherwe Warren Buffett ku meza amwe.

Kuwa 12 Kamena muri San Francisco hongeye kuba irushanwa riba buri mwaka ryo guhatanira gusangira n’umuherwe Warren Buffett.

Iri piganwa ryatangiriye ku bihumbi 25$ maze riza gushyirwaho akadomo kuwa Gatanu w’icyumweru gishize ryegukanwe n’umuntu wemeye kwishyura akayabo kangana na Miliyoni 19$.

CNN ivuga ko iki gikorwa cyo gupiganira gusangira n’umushoramari Warren Buffett, cyateguwe na eBay ku bufatanye Glide Foundation, umuryango udaharanira inyungu ugamije kurwanya inzara, ubukene no kwita ku batagira aho baba.

Mu myaka ibiri ishize iki gikorwa ntabwo cyabaye bitewe n’icyorezo cya COVID-19 aho yari yugarije Isi ku buryo ibikorwa nk’ibyo bihuriza abantu hamwe bitashoboraga kuba.

Uwatsindiye iri piganwa utatangajwe amazina, byitezwe ko azasangirira ku meza amwe na Warren Buffett hamwe n’abandi bashyitsi barindwi.

Perezida akanaba Umuyobozi Mukuru w’Umuryango wa Glide, Karen Hanrahan yashimye ubugwaneza bwa Warren Buffett.

Ati “Mu izina rya Glide n’abagenerwabikorwa bacu, ndashimira Warren Buffett ubugwaneza bwe butiganda, imikoranire, ubwitange n’umusanzu we muri gahunda yacu yo gufasha.”

Iki gikorwa cyari cyaratangijwe na Susie Buffett, uwari umugore wa Warren mbere y’uko atabaruka mu 2004.

Warren Edward Buffett ni umwe mu bantu batunze amafaranga menshi Isi ifite dore ko umutungo we ubarirwa muri miliyari 93,4$.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO