Abagize itsinda ’Inzora’ bahaye izina umwana wa Knowless basusurukije abakunzi ba Genesis TV

Inzora ni itsinda rigizwe n’umuryango mugari ugizwe n’abaririmbyi n’abacuranzi bibanda cyane ku kuririmba no gucuranga indirimbo z’injyana gakondo mu buryo bw’ako kanya (live), Kuri uyu wa kabiri basusurukije abakunzi ba Genesis TV biciye mu kiganiro Access 250.

Mu kiganiro Access 250 gisanzwe gica kuri Genesis TV buri wa kabiri no ku wa kane saa kumi n’ebyiri z’umugoroba (18:00), kuri uyu mugoroba itsinda Inzora niryo ryataramiye abakunzi b’injyana gakondo.

Inzora ni itsinda rigizwe n’umuryango mugari w’abacuranzi n’abaririmbyi bahurira ku gucuranga no kuririmba injyana Gakondo.

Ni itsinda ryatangiye ririmba mu buryo bw’amajwi gusa bakoresheje ibicurangisho gakondo nk’inanga, gusa nyuma baza gutangira kugerageza ibicurangisho bigezweho nka gitari ndetse uko bakomeje gutera imbere batangira no gukora indirimbo mu buryo bw’amashusho agezweho no gukoresha ibicurangisho by’umuziki bigezweho.

Mu kiganiro na Genesisbizz badusangije uburyo itsinda Inzora ryagize uruhare mu kwita izina umwana wa Butera Knowless, Bagize bati:" Izina Inzora ryari risanzwe ririho mu busizi n’inkoranyamagambo z’Ikinyarwanda, gusa twe nk’itsinda twagize uruhare mu kurimenyekanisha cyane.

Bakomeje bagira bati:" Twatunguwe no kubona abantu benshi bararikunze, bigera n’ubwo twumva Knowless yaryise umwana we ndetse bati twaravuganye atubwira ko yishimiye kwitirira umwana we izina dukoresha kuko turirimba neza ndetse iyo bitaba icyorezo cya koronavirusi twari kwitabira kurya ubunnyano."

Basoje bashima ubufasha abakunzi babo badahwema kubaha ndetse no gukomeza gushyigikira ibihangano n’ibikorwa bakora ku mbuga nkoranyambaga zabo bakitabira ibikorwa bitandukanye ndetse ko biteguye no gususurutsa ababyifuza mu kuririmba mu buryo bw’ako kanya (Live Music).

Basoje bibutsa cyane cyane urubyiruko n’Abanyarwanda muri rusange gukomeza gusigasira umuco Nyarwanda na kirazira dore ko igihugu kitagira umuco kizima, urubyiruko rukitabira gukorera igihugu kuko ariyo ngobyi iduhetse.


Bamwe mu bagize itsinda Inzora baririmba mu majwi y’umwimerere muri Access 250 kuri Genesis TV

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO