Abahanzi Nyarwanda mu rugamba rwimakaza ikoreshwa ry’ikinyarwanda kinoze

Abahanzi Nyarwanda bahagurukiye gushishikariza abanyarwanda gukoresha ikinyarwanda kinoze, mu ntumbero yo kwizihiza umunsi Mpuzamahanga w’Ururirimi Kavukire ugomba kuba kuri uyu wa Gatanu Tariki 21 Gashyantare.

Bamwe mu bahanzi basanzwe bagerageza gukoresha neza ururimi rw’ikinyarwanda mu bihangano by’abo nibo bifashishijwe mu gukangurira abanyarwanda kutavangavanga indimi.

Mu butumwa Mutangana Steven, Umukozi muri Minisiteri y’urubyiruko n’umuco, akaba asanzwe ayobora ishami rishinzwe Umuco yavuze ko ashishikariza abanyarwanda barimo ababyeyi, abana ndetse n’urubyiruko gukoresha neza ikinyarwanda kinoze nk’uko insanganyamatsiko y’uyu mwaka ibivuga.

Akomeza avuga ko muri iki gihe hategurwa kwizihiza umunsi mpuzamahanga w’ururimi kavukire, yemeza ko twakagombye gukoresha ikinyarwanda neza nk’uko insanganyamatsiko y’uyu mwaka ibivuga iti: ‘Dukoreshe neza ikinyarwanda kinoze twese.’

Minisiteri y’urubyiruko n’umuco yifashishije abahanzi barimo Muyango Jean Marie Vianney, Masamba Intore, Senderi Hit, ndetse na Intore Tuyisenge batanga ubutumwa burimo uburyo baharanira gukoresha ikinyarwanda kinoze.

Muyango Jean Marie Vianney
Umuhanzi uri mu bakunzwe cyane muri iki gihe Muyango Jean Marie Vianney yemeza ko nubwo yakuriye mu mahanga atigeze yibagirwa ururimi rw’ikinyarwanda, cyane ko yakunze kugitozwa kuva akiri muto.

Muyango ashishikariza abakiri bato, kugerageza kwihatira kuvuga ikinyarwanda kinoze, akongeraho ko n’ababyeyi bakagombye kwigisha abana babo kuvuga ikinyarwanda, kuko arirwo rurimi rw’abo, umuco wabo cyane ko ari narwo rubaranga.

Masamba Intore
Umuhanzi Masamba Intore usanzwe ari n’umutoza w’itorero ry’igihugu ‘Urukerereza’ aho avuga ko muri iri torero ry’igihugu atoza imbyino, ababyina byose babikora bifashishije ururimi rw’ikinyarwanda ijana ku ijana.

Masamba akomeza avuga ko abahanzi bakagombye kurwitaho, bakarukunda, bakaruririmba, bakarwiga ari nako baganira n’abantu bakuru kugira ngo babigishe ikinyarwanda kinoze kugira ngo banabakosore imyandikire yacyo.

Akomeza agira inama abahanzi yo kugira umwete wo gusoma ibitabo byinshi by’ikinyarwanda mu rwego rwo kwihugura gukoresha ururimi rw’ikinyarwanda kinoze.

Senderi Hit
Senderi Eric uzwi nka ‘Senderi Hit’ avuga ko ikinyarwanda ari ururimi rwiza rwakagombye gukoreshwa neza na buri munyarwanda, bagikoresha neza, bagisigasira, bakirinda kimwe n’izindi ndimi zigiye zigishamikiyeho zose.

Intore Tuyisenge
Umuhanzi Intore Tuyisenge avuga ko kuvangavanga ururimi rw’ikinyarwanda n’iz’amahanga uba wumva nta njyana biba bifite.

Tuyisenge ashishikariza abanyarwanda bose gukoresha ikinyarwanda kinoze.
Aba bahanzi bose bakaba bari no mu bazifashishwa mu gususurutsa abazitabira uyu munsi mpuzamahanga w’ururimi kavukire.

Biteganyijwe ko uyu munsi mpuzamahanga w’ururimi kavukire uzizihizwa ku munsi w’ejo tariki 21 Gashyantare 2020, ku rwego rw’igihugu ukaba uzizihirizwa mu karere ka Kirehe, mu ntara y’Iburasirazuba.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO