Abahanzi bagize itsinda rya Morgan Heritage barifuza kuba Abanyarwanda

Itsinda ry’abanyamuziki bo mu gihugu cya Jamaica rigizwe n’abavandimwe bazwi mu njyana ya Reggae ’Morgan Heritage’ batangaje ko bifuza ubwenegihugu bw’u Rwanda.

Aba bahanzi bamaze kubaka izina ku Isi banditse ibi babinyujije ku rukuta rwabo rwa Twitter.

Bagize bati "Rwanda muraho? Mureke tube Abanyarwanda.”

Bamaze kwandika gutyo babibwiye inshuti yabo magara ’Lee Ndayisaba’ usanzwe ari umujyanama w’umuhanzi Bruce Melodie akaba anahagarariye inyungu za Clouds Entertainment mu Rwanda.

We yamenyanye n’aba bahanzi ubwo yabatumiraga mu gitaramo mu Rwanda cyabereye i Nyamata muri 2017.

Uyu mugabo usanzwe ari inshuti yabo cyane yatangaje ko nubwo bageze aho babyandika ku mbuga nkoranyambaga atari ubwa mbere bamubwiye ko bakunda u Rwanda kandi ko bifuza ubwenegihugu bw’u Rwanda .

Yakomeje agira ati "Nyuma yo kumva ibyifuzo byabo na njye nk’umunyarwanda uri mu gihugu ngiye gushaka uko mbafasha mu nzira zose zishoboka nubwo nta burenganzira ku gutanga ubwengihugu mfite kandi ndizera ko bazabuboba biciye mu nzira zisabwa."

Lee nawe abinyujije kuri Twitter ye yanditse asaba ubuyobozi bukuru bw’abinjira n’abasohoka na Nyakubahwa Perezida Paul Kagame ko bavuga ngo yego ku byifuzo byabo banyabigwi mu njyana ya Reggae.

Benshi mu banyarwanda bakurikira aba banyamuziki kuri Twitter mu bitekerezo bagiye batanga baberetse umutima w’urukundo benshi babaha ikaze mu rwagasabo bababwira ko babishimiye.

Morgan Heritage ni itsinda ry’abavandimwe bakomoka ku muhanzi ukomeye muri Amerika witwa Denroy Morgan. Iri tsinda ryashinzwe mu 1994, rigizwe na "Peetah" Morgan, Una Morgan, Roy "Gramps" Morgan, Nakhamyah "Lukes" Morgan ndetse na Memmalatel "Mr. Mojo" Morgan.

Ryegukanye ibihembo bikomeye bitandukanye, muri 2016 batwaye Grammy Awards mu cyiciro cya ‘Best Reggae Album’, kubera iyo bakoze mu 2015 yitwa ‘Strictly Roots’.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO