Abakirisitu b’iki gihe nibo basigaye bahunga bakanacira imanza abadakijijwe – Israel Mbonyi

Umuhanzi ukora indirimbo zo kuramya no guhimbaza Imana Israel Mbonyi yavuze ko abakirisitu bo muri iki gihe basigaye bafata iya mbere mu guhunga abadakijijwe ari nako bagenda babacira imanza.

Uyu muhanzi ajya gutangaza ibi yabinyujije ku rukuta rwe rwa Twitter ashaka kubwora abakirisitu ko bagakwiye kujya begera abantu badakijijwe nkuko Yesu Kristo yabigenzaga.

Ati “Abakirisitu b’iki gihe nibo bashaka kubona abakizwa benshi Kandi aribo bafata iyambere mu Guhunga abadakijijwe no kubacira Imanza. Mwibuke ko Yesu Kristo yaranzwe no kwegera abantu nkabo bitwaga Abanyabyaha kuko yari yarazanywe n’abameze uko.”

Bamwe mu bakurikirana uyu muhanzi bagiye batanga ibitekerezo byunga mu ijambo yaravuze bamwereka ko bamushyigikiye kubyo yaravuze.

Uwitwa Aaron Papy yagize ati "Mu byukuri bakabaye abambere mu kwegera abo bita abanyabyaba bakababwira ubutumwa bwiza ngo bahinduke ariko abenshi bashyizeho amahame yabo ntibabegera kandi abameze batyo nibo bakeneye kumenya Yesu kristo."

Tubibutsa ko uyu muhanzi yagize amahirwe yo kubimburira abandi muri gahunda yatangijwe na Ambasade ya Israël mu Rwanda, igamije gufasha abahanzi nyarwanda kuba bajya bakorera ibitaramo mu mijyi itandukanye igize iki gihugu.

Iyi gahunda yatangijwe ku itariki ya 6 Ugushyingo ikitwa ‘Twende Jerusalem’ iri mu murongo wa Ambasade ya Israël mu Rwanda wo kuzamura umubano hagati y’ibihugu byombi no guteza imbere impano z’urubyiruko rw’u Rwanda ndetse n’urwego rw’ubuhanzi.

Biteganyijwe ko ibi bitaramo Mbonyi azakorera muri Israël bizaba mu minsi ya Pasika muri Mata 2021.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO