Abanyamadini basinye amasezerano na MINEDUC agamije guteza imbere uburezi

Abanyamadini n’amatorero bemeranyije na MINEDUC kubaka ibyumba by’amashuri birenga 11 000 ku butaka bwabo, hagamijwe gutezaimbere uburezi mu Rwanda.

Ni amasezerano y’ubufatanye yashyizweho umukono hagati ya Minisiteri y’Uburezi n’amadini n’amatorero afite ubutaka mu Rwanda, ashyigikira iyubakwa ry’ibyumba by’amashuri ku butaka bwayo bidasabye ingurane.

Muri Kanama 2019 u Rwanda rwemerewe inkunga ya miliyoni $ 200 na Banki y’Isi, azakoreshwa mu guteza imbere uburezi. Ni inkunga yageze kuri Leta y’u Rwanda muri Mutarama 2020.

Biteganyijwe ko izakoreshwa mu mushinga wo gukemura ikibazo cy’ubucucike mu mashuri no kugabanya ingendo abana bakora bajya ku ishuri.

Mu byo Banki y’Isi yasabye harimo ko mbere yo gutangira ibikorwa, habaho amasezerano yerekana ko ubutaka umushinga uri gukorerwaho nta kibazo bufite, ariyo mpamvu byasabaga ayanditse kugira ngo bikorwe.

Mineduc itangaza ko hari ukwirinda ko nyuma yo gutangira ibikorwa hazumvikana abasaba ingurane kandi mu byo amafaranga agenewe bitarimo.

Minisiteri y’Uburezi yatangiye ibiganiro n’amadini n’amatorero mu Rwanda bigamije ubufanye mu kongera ibigo by’amashuri ku butaka bwayo ndetse biza no gutanga umusaruro.

Kuri uyu wa 29 Mutarama 2020, nibwo MINEDUC n’amadini n’amatorero atandukanye byasinyanye amasezerano y’ubufatanye.

Umunyamabanga wa Leta muri Minisiteri y’Uburezi ushinzwe Amashuri Abanza n’Ayisumbuye, Dr. Munyakazi Isaac, yavuze ko bitabaje abanyamadini kubera ko basanze hakenewe ubutaka bwagutse.

Ati "Ibyo byumba byasabaga ubutaka tutashoboraga kubona nka leta, byasabye ko dukorana n’abakuru b’amadini n’amatorero kugira ngo habemo ubwumvikane kugira tubone ubutaka bwo kubakaho ayo mashuri kuko cyari kimwe mu bisabwa."

Nyuma yo kubaka ayo mashuri nta mpinduka mu micungire yayo zizabaho kuko azaguma mu maboko ya ba nyirayo.

MINEDUC yatangaje ko ibyangombwa byose byamaze kuboneka ndetse biteganyijwe ko imirimo yo kubaka ibyo bigo by’amashuri n’ubwiherero izatangira mu byumweru bibiri.

Umushumba wa Diyosezi ya Kabgayi, Musenyeri Mbonyintege Smaragde, yavuze ko nk’abanyamadini basanze ari ubufatanye bwiza ku burezi bw’u Rwanda.

Ati "Hafi ya hose ni ubutaka bwari burimo amashuri kwari ukugenda bongeramo, aho asanzwe cyangwa aho twageneraga kuzashyira amashuri. Nta hantu rero bigeze bafata hari hirya y’ahagenewe amashuri iwanjye muri Diyosezi ya Kabgayi."

Inkunga ya Banki y’Isi yatanzwe izakoreshwa mu kubaka ibyumba by’amashuri 11 004 n’ubwiherero 14 680 mu gihugu hose. Biteganyijwe ko umushinga wose uzarangira mu myaka ibiri uhereye mu 2020.

Muri rusange 75% azakoreshwa mu nyubako naho 25% ajye mu kubaka ubushobozi bw’abarimu n’ibikorwa byunganira ireme ry’uburezi.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO