Gusama ni umwihariko w’i Rusizi ukungahaje umuco Nyarwanda

Abasamyi ba Nkombo babarizwa mu murenge wa Nkombo, agace gaherereye mu kiyaga cya kivu mu karere ka Rusizi. Iki kirwa gituwe n’abanyarwanda bakoresha ururimi rw’ikinyarwanda ariko bakaba bihariye ururimi rw’amashi.

Kuri iki kirwa usanga banafite umuco wabo bihariye wo gusama, ubuyobozi buvuga ko ari umwihariko w’I Rusizi. Ni imibyinire gakondo iha abataramyi kwizihirwa no gukesha igitaramo. Ni akarango k’abatuye aka gace, ikaba imbyino ifitanye isano n’agace k’amazi ibarizwamo.

Imbyino gakondo ni bimwe mu bihangano bikungahaje umuco nyarwanda uko ingoma zagiye zisimburana kuva ku ngoma ya cyami kugeza ubu. Iyo bigeze ku mbyino gakondo usanga hari uduce twihariye injyana n’umudiho, ari nayo mpamvu tugiye kugaruka k’umwihariko w’I Rusizi

Bamwe mu baturage batuye mu karere ka Rusizi bavuga ko imbyino gakondo zigira uruhare mu gusigasira umuco nyarwanda, nk’umurage w’ahazaza aho abazabikurikirana bizababera nk’ishuri ry’amateka ry’umuco wabo no kwishakamo ibisubizo.

Kuva ku ngoma ya cyami kugeza ubu umwihariko w’umuco nyarwanda ushimangirwa n’imbyino gakondo nka rumwe mu rwibutso rw’amateka ishingiye ku muco.

Nubwo hari indangagaciro zagiye zizimira, imbyino ziracyari mu bihesha u Rwanda isura nziza mu ruhando mpuzamahanga, kuko ziri mu bikurura ba mukerarugendo ndetse zikanagaragariza amahanga ko u Rwanda rugifite umwihariko warwo.

Akarere ka Rusizi, ahahoze hazwi nko mu Kinyaga ni kamwe mu turere tugize igihugu cy’u Rwanda, dusangiye umuco n’abanyarwanda ariko tukagira indi mico twihariye bitewe n’aho gaherereye harimo imbyino izwi nko "Gusama" ikomoka ku Nkombo n’izindi.

Nkombo ni ikirwa giherereye mu kiyaga cya Kivu, akaba ari naho hubatse Umurenge wa Nkombo, umwe mu igize akarere ka Rusizi. Ni Umurenge uri mu kirwa wihariye umuco ariko utawubuza kuba umwihariko w’Abanyarusizi.

Abatuye ku Nkombo ni Abanyarwanda bavuga ururimi rw’ikinyarwanda, bakanagira n’urundi rurimi rubahuza ubwabo bita "Amashi", ari naho uzasanga Abasamyi ba Nkombo bagize umwihariko w’aka karere mu mibyinire gakondo.

Ijambo "Gusama" mu rurimi rw’amashi bisobanuye "kubyina". Ni ijambo risobanuye byinshi ku muco w’Abanyenkombo. Ni ijambo rigena umwihariko wabo mu gucyesha igitaramo. Ni inzira benshi bayoboka kuva bavutse hagamijwe gusigasira umuco wabo no kuwusakaza.

Iyi niyo nkomoka y’ abazwi nk’Abasamyi ba Nkombo "Ababyinnyi ba nkombo". Ucyumva iri zina kubamenyereye umuco wabo, uhita wumva ko ugiye kumva umwihariko w’Abanyarusizi mu mbyino gakondo. Uwo winjiye mu isi shya y’abataramyi n’inganzo y’amayoberane ku batumva neza ururimi rwabo.

Ni ingingo bamwe mu batuye aka karere bahamya ko ituma bagira umwihariko ubafasha gusigasira umuco Nyarwanda binyuze mu mbyino gakondo.

Nabinaga Rozaliya uhagarariye itorero Abasamyi ba Nkombo yabwiye ikinyamakuru GENESISBIZZ ko iri torero rimaze igihe ritangiye kuko nawe atazi igihe ryatangiriye kuko yaryinjiyemo mu 1987 ari umwana muto ubu aka ashaje.

Nabinaga Rozaliya uhagarariye itorero Abasamyi ba Nkombo

Yagize ati "Abakecuru twasanze muri iri torero baragiye baradusiga, natwe twinjiyemo turi abana, urabona ko natwe dushaje kandi hari abana natwe turi gutoza kugirango bazadusimbure kuko urabona ko turi abakecuru, mbese ntawo tuzi igihe ryatangiriye".

Akomeza avuga ko kuba muri iri torero bibafasha gusigasira umuco Nyarwanda binyuze mu kubyina "Gusama", bakabihererekanya hagati y’abakuze n’abato bityo bityo, rikaba ari nk’ishuri ry’amateka.

Iri torero rigaragaza umuco mu mbyino gakondo rifatiye runini abatuye mu karere ka Rusizi kuko rinyuzwamo ubutumwa butandukanye bugenewe abatuye aka gace ndetse rikaba n’irerero ku bana bato mu buryo bwo gusigasira uyu mwihariko wabo.

Solange uwamariya umuyobozi w’ itorero indategwa ry’ababyinnyi gakondo rikorera mu Karere ka Rusizi, Umurenge wa Kamembe yemeza ko koko Abasamyi ba Nkombo ari umwihariko w’abatuye I Rusizi, kuko bagitangira kubyina bya Kinyarwanda bitaboroheye kubona abafana kuko bari bazanye ibidasanzwe.

Ibi byashimangiwe n’umuyoboz w’akarere ka Rusizi bwana Kayumba Ephrem wemejeko kugeza ubu aka karere gafite amatorero abiri afasha mu kubungabungo umuco nyarwanda by’umwihariko akomoza ku basamyi ba Nkombo nk’umwihariko w’aka karere.

Yagize ati "Dufite itorero indategwa ribyina bya Kinyarwanda ndetse n’Abasami ba Nkombo usanga ari umwihariko w’abatuye muri aka karere."

Umuyobozi ushinzwe umuco mu kigo cy’igihugu gishinzwe umuco n’ururimi avugako imbyino gakondo ari bimwe mu bihangano bikungahaje umuco nyarwanda harimo n’iz’Abasamyi ba Nkombo", hakaba hari gahunda yo gukusanya izi mbyino bitewe n’agace zikagenda zisigasirwa kugirango zizajye zibera ikitegererezo abazavuka uko ibihe bizagenda bisimburana iteka.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO