AfroBasket: u Rwanda rurasabwa gutsinda cyangwa rugasezererwa

Ikipe y’u Rwanda ya Basketball mu gikombe cya Africa kuri uyu wa mbere irakina n’iya Guinée kugira ngo zishakemo ikomeza muri kimwe cya kane cy’irangiza.

Ni nyuma y’uko mu ijoro ryo ku wa gatandatu ikipe y’u Rwanda itsinzwe na Cap-Vert (Cape Verde) ku manota 82 kuri 74, igahita iba iya kabiri mu itsinda.

Mu mukino wagoye cyane ikipe y’u Rwanda mu ntangiriro, Cap-Vert yabarushije mu duce dutatu (quart-temps) twa mbere, u Rwanda rugaruka mu mukino mu gace ka nyuma.

Nyuma y’umukino, umutoza w’u Rwanda Cheikh Sarr yabwiye abanyamakuru ko yababajwe n’uko umukino wagenze Ati "inama nahaye abakinnyi ntibazikurikije".

Abakinnyi b’u Rwanda batsinze amanota 14 mu gace ka mbere, 12 mu ka kabiri, 17 mu ka gatatu na 31 mu gace ka nyuma.

Umwanya wa kabiri inyuma ya Cap-Vert watumye u Rwanda rugomba gukina na Guinée umukino wo gushaka ticket ya 1/4 kuri uyu wa mbere saa kumi n’ebyiri z’umugoroba.

Ku wa kabiri w’iki cyumweru ku mukino wa mbere w’iri rushanwa, Tunisia yatsinze Guinée amanota 82 kuri 46, ku wa gatatu Guinée yatsinzwe na Centrafrique ku manota 60 - 61, ariko ku wa gatanu Guinée yihagararaho itsinda Misiri kuri 86 - 78.

Mu gihe mu itsinda A u Rwanda rwatsinze imikino ibiri, Guinée mu itsinda B yatsinze umukino umwe iba iya gatatu.

Mu mikino itatu aya makipe yakinnye mu matsinda yayo, u Rwanda rwatsinze amanota 227 rutsindwa 218, naho Guinée yatsinze 192 itsindwa 221.

Izatsinda hagati y’u Rwanda na Guinea muri 1/4 izahura n’iya mbere mu itsinda C.

Mu mikino yo gushaka umwanya muri 1/4, Misiri nayo izahura na Angola kuri uyu wa mbere saa cyenda z’amanywa.


Iyi niyo mikino iteganyijwe uyu munsi


u Rwanda rurasabwa gutsinda

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO