Mu mukino wo kwishyura mu irushanwa rihuza amakipe yabaye aya mbere iwayo (Champions League), ikipe ya Real Madrid yongeye kwerekana ko atari agafu k’imvugwa rimwe nyuma yo guturuka inyuma igasezerera ikipe ya Manchester City.
Ni umukino wabaga mu ijoro ryakeye aho wabereye mu murwa mukuru w’igihugu cya Espagne ku kibuga Santiago Bernabeo aho ikipe ya Manchester City yagiye ifite impamba y’ibitego 4-3.
Umukino watangiye amakipe yombi arimo kwigana asa naho yatinyanye dore ko amakipe yombi yari afite abatoza bakomeye yaba umutoza wa Manchester City Pep Guardiola ndetse n’umusaza utoza Real Madrid Carlos Ancellotti.
Igice cya mbere cy’umukino cyarangiye amakipe yombi anganya gusa mu gice cya kabiri ikipe ya Manchester City yaje kubona igitego cyayo cya mbere ku munota wa 73 w’umukino gitsinzwe n’umusore ukomoka mu gihugu cya Algeria ariwe Rihyad Mahrez Karim.
Ikipe ya Manchester City byageze ku munota wa 90 w’umukino ikizeye insinzi gusa byaje gukomwa mu nkokora n’umukinnyi Rodrigo watsindiye Real Madrid igitego bituma ikipe yose ikanguka.
Ntabwo kandi byatinze kuko hadaciyeho n’iminota ibiri uyu mukinnyi yahise atsindira Real Madrid ikindi gitego bituma ikipe ya Manchester City ibintu bisubira i Rudubi kuko hahise hiyambazwa iminota y’inyongera
(Extra Time).
Hakinwe iminota y’inyongera kubera ko amakipe yombi yari arimo kunganya igiteranyo cy’ibitego mu mikino yombi kuko byari bimaze kuba ibitego 5-5 mu mikino yombi haba ubanza n’uwo kwishyura.
Mu minota y’inyongera ikipe ya Manchester City yahise ikora ikosa ryavuyemo penaliti nyuma yo gutega umukinnyi Karim Benzema bituma ikipe ya Real Madrid ihabwa penaliti yaje guterwa neza n’uyu mukinnyi Benzema bituma Real Madrid igera ku mukino wa nyuma.
Ikipe ya Real Madrid igeze ku mukino wa nyuma nyuma yo gusezerera Manchester City ku giteranyo cy’ibitego 6-5.
Kuri ubu ikipe ya Real Madrid igomba guhura n’ikipe ya Liverpool aho uyu mukino wa nyuma uteganyijwe kubera i Paris mu Bufaransa kuwa 28 Gicurasi 2022.
Magingo aya umutoza wa Real Madrid Carlo Ancellotti amaze guca agahigo ko gutwara Champions League ari umukinnyi ndetse akanabikora ari umutoza.
Umutoza Jurgen Klopp wa Liverpool agomba kuba ahanganye na Carlo Ancellotti ubwo amakipe yabo yombi azaba ahatanye gusa amakipe yombi aheruka guhurira ku mukino wa nyuma mu mwaka wa 2018 ubwo Real Madrid yatsindaga Liverpool ibitego 3-1
dore uburyo Real Madrid yibukije Manchester City kutabyina mbere y’umuziki
