Aline Gahonganyire yasinye amasezerano ya miliyoni 50 na Kompanyi yo muri Amerika

Umuhanzikazi mu ndirimbo zo kuramya no guhimbaza Imana Aline Gahonganyire wigaruriye imitima ya benshi mu bakiristu yasinye amasezerano ya miliyoni 50 n’ikigo Watchfire Music yo kumugurishiriza Alubumu ze uko ari enye.

Mu kiganiro na GENESISBIZZ uhagarariye inyungu za Aline Gahonganyire Bwana Eric Mashukano yadutangarije byinshi kuri ayo masezerano bagiranye na Watchfire Music.

Yagize ati "Twagurishije Album enye za cyera ziranononsorwa n’icyo kigo kugira ngo zitangire gucuruzwa kuri internet."

Yakomeje agira ati "Amasezerano twagiranye n’iki kigo, aherekejwe n’amafaranga menshi ndetse turateganya n’ ibitaramo n’indirimbo agomba gukorera muri Leta Zunze Ubumwe za Amerika nyuma yaho ibitaramo yari afiteyo bisubitswe kubera icyorezo cya COVID-19."

Ku ruhande rwa Aline Gahongayire ubarizwa muri Moriah Entertainment, yadutangarije ko mbere ya Covid-19 yagombaga kujya gukorera ibitaramo bitandatu muri Amerika, bisubikwa bitewe n’iki cyorezo kibasiye Isi.

Yavuze ko nyuma yisubikwa ry’ibi bitaramo yakomeje ibiganiro n’iki kigo bemeranya gushyira umukono ku masezerano.

Ati “Album zanjye zo ha mbere baraziguze barongera barazifata bashyiraho ‘Subtitles’. Baguze ziriya Album ibihe byose. Bahisemo indirimbo bakongera kuyikorera ‘mastering’, bagafata nk’imwe kuri Album ya mbere n’indi kuri Album ya kabiri bagahita bakora Album yabo.”

Gahongayire avuga ko iki kigo kizakomeza gusubiramo indirimbo ze bakuramo Album imwe imwe bacuruza. Amasezerano uyu muhanzikazi yasinye amuhesha gukorana indirimbo n’abahanzi batandukanye bo muri Amerika iki kigo kizamushakira.

Abantu baguze Album ku rubuga rw’iki kigo, harimo ijanisha ry’amafaranga afataho n’andi asigara mu isanduka y’iki kigo.

Gahongayire avuga ko umwe mu bantu bazakorana indirimbo wo muri Amerika, ari Julia umaze imyaka myinshi mu murimo wo guhimbaza Imana.

Yavuze ko azagira uruhare kuri Album ya Julia, aho bazakorana indirimbo eshatu. Anavuga ko mu gitaramo cya Julia, bazamuha umwanya akaririmba indirimbo eshatu ze n’indirimbo eshatu yakoranye na Julia.

Ati “Ngomba kuririmba indirimbo zigera kuri esheshatu.”

Uyu muhanzikazi yavuze ko aya masezerano afite agaciro kanini karuta ak’amafaranga, kuko ayitezeho kumuhuza n’abantu bakomeye mu muziki, ingendo azakorera ahantu hatandukanye n’ikipe bakorana, byose byishyurwa n’iki kigo.

Ibiganiro bya Gahongayire n’iki kigo byari bimaze igihe kinini, kuko byatangiye kuva mu ntangiriro za 2020. Ku mwaka amasezerano Gahongayire yagiranye n’iki kigo afite agaciro k’ibihumbi 50 by’amadorali.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO