Ally Soudy yibutse umubyeyi we ashimangira kusa ikivi cye

Umuhanzi akaba n’umunyamakuru Ally Soudy utuye kuri ubu muri Leta Zunze Ubumwe za Amerika yibutse umubyeyi we wishwe muri Jenoside yakorewe abatutsi muri Mata 1994 mu Rwanda, ashimangira kusa ikivi cye.

Muri iki gihe Abanyarwanda n’Isi yose yibuka Jenoside yakorewe Abatutsi muri Mata 1994, Ally Soudy ni umwe mu bibutse abo mu muryango we, barimo n’umubyeyi we wishwe muri jenoside.

Umubyeyi wa Ally Soudy witwaga ‘Wibabara Daphrose’ ni umwe mubo mu muryango we yibutse muri ibi bihe byo kwibuka ku nshuro ya 26 U Rwanda rwibuka abazize Jenoside yakorewe abatutsi mu Rwanda, nubwo atarabasha kubona umubiri we aho ushyinguye nyuma ya jenoside.

Mu butumwa Ally Soudy yasangije abandi muri ibi bihe yibukaga umubyeyi we, yagize ati: “Imana yakuvugiyemo uraturinda, ufata imyanzuro irimo iyatumye turokoka twese uko watubyaye.”
Imyanzuro myiza umubyeyi wa Ally Soudy yafashe niyo yatumye barokoka

Uyu mugabo kuri ubu w’abana babiri, akomeza avuga ko ikibabaje kurushaho aruko kugeza magingo aya ataramenya aho umubyeyi we ashyinguye nyuma y’imyaka 26 jenoside ibaye.

Gusa Ally Soudy avuga ko ibyo bitabaca intege kuko abana uyu mubyeyi Daphrose yasize bakomeje urugendo rwo kusa ikivi cy’umubyeyi wabo.

Ally Soudy mu buhamya yatanze bujyanye n’ubuzima yabayemo mu bihe bya jenoside umwaka ushize, yavuze ko we n’abo mu muryango we babaga i Kabuga mu Mujyi wa Kigali mu Karere ka Gasabo.

Ku wa 8 Mata 1994 Interahamwe zasakuje inyuma y’urupangu rwabo rwari rufunze zishaka kurumena ngo zinjire zibice, barasimbuka baca mu gikari bajya kwihisha.
Umuryango wa Ally Soudy mbere ya Jenoside yakorewe abatutsi mu Rwanda

Icyo gihe yakomeje agira ati “Twarasimbutse tugwa inyuma mu rugo rw’umuturanyi wari umupasiteri, icyo gihe nawe yagize ubwoba kuko bari batangiye kudushakisha mu ngo z’abaturanyi, yaradufashe aduhisha mu kazu gato cyane imbwa ye yabagamo ariko itari igihari icyo gihe.”

“Twagiyemo twese kandi dukwirwamo twari abantu bagera kuri barindwi, maze imbwa (iyi yari iyacu) yaradukurikiye iraza iryama imbere yako kazu yanga kuhava.”

“Twabayemo iminsi ntazi umubare, gusa interahamwe zarazaga gusaka ahantu hose zagera kuri ako kazu imbwa ikabamokera cyane bagasubirayo bavuga ngo ni akazu k’imbwa, ngo Daphrose ntiyakwirwamo n’urubyaro rwe.”

Ally Soudy yakomeje agira ati: “Nyuma interahamwe zaje gusaka muri urwo rugo na none zigeze kuri ka kazu zigira amakenga z’iti ni gute iyi imbwa itajya iva hano kandi igahora itumokera cyane? Bafata umwanzuro wo kuyihakura maze bafungura ka kazu badukuramo twese, batangira kutugera amacumu, n’imihoro... Gusa iyo isaha itaragera iba itaragera.”

Uretse kuba ijwi rye ryaramamaye mu biganiro nka Salus relax, akaza gukomereza kuri Radio Isango Star mu biganiro birimo Sunday night na Isango na muzika, uyu mugabo ni n’umwe mu batangije Ikirezi group itegura ibihembo bya Salax awards, aho yaje kuva mu Rwanda mu 2012 ajya gutura muri Leta Zunze Ubumwe za Amerika.

Uyu mugabo usigaye aba muri Leta ya North Dakota, aho ahabana n’abana be babiri n’umugore we, mu gihe cya Jenoside yakorewe Abatutsi yabanaga na nyina gusa kuko se yari yarapfuye mu 1993.
Umuryango wa Ally Soudy babana muri Leta Zunze Ubumwe za Amerika

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO