Amafunguro icumi ugomba kwirinda igihe ugira ikibazo cy’umuvuduko w’amaraso

Abantu benshi ku isi bahura n’ikibazo cy’umuvuduko w’amaraso, umuntu bavuga ko arwaye umuvuduko w’amaraso iyo igipimo cy’umuvuduko w’amaraso ye imbere mu mubiri kiba kiri hejuru cyane y’igipimo gisanzwe. Amakuru dukesha urubuga rwa live science avuga ko igipimo cy’umuvuduko w’amaraso umuntu usanzwe agira kiba kiri hagati ya 120-129 mm Hg (millimeters of mercury). Iyo uru rugero rugeze ku 140, iki gihe umuvuduko wawe uba uri hejuru cyane, wagira munsi ya 90 iki gihe umuvuduko w’amaraso uba uri hasi cyane.

Niba urwaye indwara y’umuvuduko w’amaraso, hari amafunguro ugomba kwirinda kugirango bidakomeza kongera umuvuduko w’amaraso kuko bikomeje bishobora no kukuviramo urupfu. Muri iyi nkuru tugiye kurebera hamwe amafunguro icumi ugomba kwirinda niba ufite ikibazo cy’umuvuduko w’amaraso.

1. Umunyu
Iyo bigeze ku bantu bafite ikibazo cy’umuvuduko mwinshi w’amaraso, umunyu uhinduka umwanzi wa mbere. Mu bigize umunyu harimo ikinyabutabire cya Sodium, uko ingano y’iki kinyabutabire y’iyongera bituma impyiko zikora nabi zikananirwa kuyungurura amaraso. Iyo impyiko zikora nabi bituma zidatunganya inkari zihagije ngo zisohoke mu mubiri, ibi bituma ingano y’amazi isigara mu maraso yiyongera, bigatuma habaho kwiyongera k’umuvuduko amaraso asanzwe agendaho.

Impuguke mu by’imirire zisobanura ko kugirango buri muntu yirinde umuvuduko mwinshi w’amaraso, ko agomba kwinjiza igipimo cy’ikinyabutabire cya sodium kitarenze miligarama igihumbi na magana atanu (1,500 mg) ku munsi.

2. Amavuta yo guteka
Amavuta yo guteka yakorewe mu nganda aba arimo cholesterol, iki kinyabutabire ni ingenzi kuko kidufasha kubaka uturemangingo dushya, gukora igogora no gukora imisemburo. Mu gihe cholesterol ikenewe kugirango umubiri wacu ukore neza, iyo iki kinyabutabire nanone kibaye cyinshi imbere mu mubiri gishobora kudutera ibibazo bikomeye harimo ibyo kuvura kw’amaraso, ibibazo by’umutima n’ubwonko.

Niba usanzwe ugira ibibazo by’umuvuduko w’amaraso ugirwa inama yo kwirinda kurya amavuta abonekamo cholesterol, bigushobokeye wayavaho burundu cyangwa se ugashaka amavuta atarimo cholesterol ku isoko. Ikindi kintu ugirwa inama yo kwirinda kurya ni margarine (ibyo kurya basiga ku mugati) izi zifitemo ibinure by’ikinyabutabire cya omega-6. Uko urya nyinshi niko wiyongerera ibibazo byo kwiyongera kw’ibyago byo kurwara umutima cyane iyo usanzwe ugira ibibazo bya diabete, si ibi gusa ahubwo ushobora guhura n’ibibazo byo kuvura kw’amaraso no kuziba kw’imiyoboro itwara inkari.

3. Injugu
Abantu benshi bakunda kurya injugu cyane nk’iyo bagiye kureba filime cyangwa bakaba bazikora mu rugo rwabo. Abenshi mu barya injugu usanga batekereza ko nta kibazo zishobora kubatera gusa siko bimeze. Mu gihe ufite ikibazo cy’umuvuduko w’amaraso kandi ukaba ukunda injugu, ni byiza ko wirinda kurya injugu z’irimo umunyu cyangwa isukari. Ku bantu bakunda kurya injugu igihe bagiye muri sinema, ziriya njugu akenshi ziba zirimo umunyu mwinshi cyangwa margarine nyinshi, ni byiza ko niba ukunda injugu cyane wazajya uzitegurira ntugure izo bacuruza mu masoko.

4. Foromaje (Fromage)

Foromaje iraryoha ndetse ni ingirakamaro ku mubiri wacu kuko itwongerera imyunyungugu ya Calcium na poroteyine, gusa foromaje nyinshi dusanga mu masoko n’amaguriro atandukanye ziba zirimo umunyu w’inyongera ndetse uyu si mwiza na gato ku muvuduko w’amaraso.

Iyo uriye foromaje nyinshi bituma icyigero cya Cholesterol cyiyongera mu mubiri, ibi nibyo bituma ugira ibyago byinshi byo kuba wakwibasirwa n’indwara z’umutima.

5. Inyama zatunganyirijwe mu nganda
Abantu benshi bakunda kurya ubu bwoko bw’inyama zatunganyirijwe mu nganda bakazishyira nko mu mugati cyangwa bakazitunganya mu bundi buryo bifuza.

Izi nyama ziba zaratunganyijwe kuburyo zizamara igihe kinini zitangiritse, kimwe mu byo bifashisha kugirango zimare igihe kinini zitangiritse, ni imyunyu y’inyongera kandi iba irimo ikinyabutabire cya sodium nyinshi.

Urubuga rwa my health thread rwatangaje ko nibura muri garama 56 zonyine z’inyama zatunganyirijwe mu nganda usangamo miligarama 600 z’ikinyabutabire cya sodium kandi iki kinyabutabire ni kibi cyane ku muvuduko w’amaraso kuko bituma wiyongera.

6. Pizza zitetse
Hari igihe bitewe n’akazi kenshi no kubura umwanya wo guteka abantu bahitamo gufata pizza bakazishyira mu ifuru bakaziteka, foromaje izigize ikayonga kuburyo bazirya nk’ibiryo bisanzwe.

Iyo bamaze kuyiteka muri ubu buryo bibasaba kuyinyanyagizaho umunyu mwinshi kugirango itangirika, umunyu ugira ikinyabutabire cya sodium kandi iki kinyabutabire gituma umuvuduko w’amaraso wiyongera ibi bikaba byakuviramo izindi ndwara zitandukanye zibasira umutima.

7. Isosi z’inyanya zo mu dukombe
Igihe cyose uzagura isosi z’inyanya zifunze mu dukombe twakorewe mu ruganda, icyo gihe ujye umenya ko bingana nko kugura igisasu kigizwe n’ikinyabutabire cya sodium ugiye gutera mu mubiri wawe.

Aya masosi bayongeramo ikinyabutabire cya sodium cyiboneka mu munyu kugirango bayarinde kwangirika. Iyi myunyu nikenshi tumaze kubona ko atari myiza ku mubiri wacu, ibyiza nuko wagura inyanya zisanzwe ukazikoramo isosi aho kugura amasosi yatunganyirijwe mu nganda.

9. Amafunguro atunganyirizwa mu ifuru

Amafunguro menshi atunganyirizwa mu ifuru nka gato (gâteau) zitandukanye zikoreshwa mu minsi mikuru, imigati n’ibindi bitandukanye bigaragara neza inyuma bikanahumura neza kuburyo bikurura ubireba kandi bigasa nk’ibyuzuye intungamubiri nziza.

Ikibazo gikomeye ni uko kugira ngo bakore aya mafunguro nka gato zikoreshwa mu makwe n’iminsi mikuru bongeramo isukari nyinshi y’umurengera naho kugirango bakore imigati nayo hakaba iyo bongeramo imyunyu cyangwa amasukari. Ibi byose nibyo bigira ingaruka ku muvuduko w’amaraso niba usanzwe ugira iki kibazo.

10. Ikawa

Ikawa ni ikinyobwa gikundwa na benshi kuko bamwe ibongerera imbaraga cyangwa se abakora akazi k’ijoro ikabarinda gusinzira.

Mu bigize ikawa harimo ikinyabutabire cya caffeine ndetse uko unywa ikawa nyinshi niko ikigero cya caffeine cyiyongera mu mubiri, ibi bikaba byatera kwiyongera k’umuvuduko w’amaraso.

Amakuru dukesha urubuga rwaVery Well Health avuga ko kunywa ikawa cyane bishobora kugabanya ikigero cy’ubushake bwo gukora imibonano mpuzabistina. Ibi ni byiza ko niba wubatse cyangwa utarubaka urugo, ni byiza kugabanya urugero rw’ikawa unywa kuko usibye kwangiza ubuzima bwawe aho yongera umuvuduko w’amaraso, ikawa ishobora no kwangiza igikorwa cy’amabanga y’abashakanye.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO