Amagaju Yasezerewe mu mikino ya Playoffs kubw’ uburangare bagize kuri #COVID-19

Ishyirahamwe ry’umupira w’amaguru mu Rwanda rimaze gusezerera ikipe y’Amagaju mu mikino ya Playoffs nyuma yo kutubahiriza amabwiriza yo kwirinda icyorezo cya Coronavirus.

Mu minsi ishize ni bwo mu ikipe y’Amagaju abakinnyi bayo 11 basanzwemo Icyorezo cya Corona Virus, bituma imyitozo ihita ihagarikwa ngo habanze habe indi nshuro yo gupima abakinnyi.

Nyuma y’igenzura ryakozwe na Ferwafa, yaje gusanga ikipe y’Amagaju yaragize uburangare mu kubahiriza amabwiriza yo kwirinda icyorezo cya Coronavirus, aho yinjije umukinnyi witwa Murindwa Evaritse mu mwiherero kandi atarabona ibisubizo bya COVID-19.

Nkuko tubikesha urubuga rwa Ferwafa batangaje impamvu zatumye Amagaju asezererwa bagize bati:

Komite Nyobozi Ishingiye ku mabwiriza ya Minisiteri ya Siporo yo muri Nzeri 2020 ashyiraho uburyo bwo gusubukura ibikorwa by’imikino mu Rwanda hirindwa ikwirakwira ry’icyorezo cya COVID 19 mwamenyeshejwe ku wa 29 Nzeri 2020;

Ishingiye ku mabwiriza ya FERWAFA ajyanye no kwirinda ikwirakwira ry’icyorezo cya COVID-19 (FERWAFA Covid-19 return to play guidelines) mwamenyeshejwe ku wa 10 Nzeri 2020 cyane cyane mu ngingo yayo ya II.2 n’iya III.1 zigena ko abakinnyi bemerewe kujya mu mwiherero no gutangira imyitozo ari abapimwe bikagaraga ko nta COVID-19 bafite.

Ishingiye kuri raporo yanyu mwatugejejeho ku wa 07/11/2020 mutumenyesha ibijyanye no kuba hari abakinnyi banyu bapimwe bakabasangamo ubwandu bwa COVID-19 aho muri iyo raporo mwagaragaje ko hari umukinnyi witwa MURINDWA Evariste waje nyuma y’abandi kandi akaba yarahuye n’abandi bakinnyi bari mu mwiherero ibisubizo by’ibipimo bya COVID-19 yafashwe bitarasohoka. Ibi bikaba byaratumye abakinnyi 11 bandura COVID-19;

Imaze gusesengura raporo yanyu igasanga ikipe mubereye umuyobozi yaragize uburangare mu ishyirwa mu bikorwa ry’amabwiriza yo kurwanya ikwirakwira rya COVID-19 yavuzwe haruguru;

Komite Nyobozi ya FERWAFA yafashe umwanzuro ko ikipe ya AMAGAJU FC ihanishijwe kuvanwa mu irushanwa rya Playoffs riteganyijwe gutangira ku wa 13/11/2020. Bityo ikipe byari guhura izahita ikomeza mu kiciro gikurikiyeho.

Ikipe ya Vision yari kuzahura n’Amagaju yahise ikomeza muri 1/2, iyi nayo ikaba isabwa guhindura uburyo bakoreshaga aho bari mu mwiherero ndetse bakaba banahimuka.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO