Amajonjora yo gushakisha abakobwa bazitabira Miss Rwanda 2022 yatangiye

Miss Rwanda ni rimwe mu marushanwa akomeye y’ubwiza bimaze kumenyerwa ko aba ngaruka-mwaka. Kuri uyu wa gatandatu tariki 29 Mutarama nibwo hatangiye ibikorwa byo kujonjora abakobwa bazitabira amarushanwa ya Nyampinga w’u Rwanda 2022.

Igikorwa cyo kujonjora abakobwa bazitabira aya marushanwa cyabereye mu mujyi wa Musanze aho cyari kiyobowe n’abagize akanama ka Miss Rwanda n’abandi babaye ba Nyampinga b’u Rwanda mu myaka yashize.

Bamwe mu bayoboye aka kanama gashinzwe amajonjora harimo Elsa iradukunda wabaye Nyampinga w’u Rwanda wa 2017, Nimwiza Meghan wabaye Nyampinga w’u Rwanda wa 2019 na Iradukunda Liliane wabaye Nyampinga w’u Rwanda wa 2018.

Amarushanwa ya Miss Rwanda 2022 biteganyijwe ko yo azaba muburyo bw’imbona-nkubone bikazaba bitandukanye n’umwaka ushize aho yabaye mu buryo bw’ikoranabuhanga, mu rwego rwo gukumira ubwandu bwa covid-19 kuko ibikorwa bihuza abantu benshi byose byari bibujijwe.

Ibyagombwa abakobwa bazitabira amarushanwa ya Nyampinga w’u Rwanda 2022 bagomba kuba bujuje:

.Kuba ari Umunyarwandakazi.

.Kuba nibura yarasoje amashuri yisumbuye.

.Kuba atarabyaye kandi akaba atagomba gushaka umugabo mu gihe cyose yaba afite ikamba.

.Kuba afite ubuzima buzira umuze.

Umukobwa uzegukana ikamba rya Nyampinga w’u Rwanda 2022 azahabwa umushahara wa 800,000 rwf buri kwezi mu gihe cy’umwaka hamwe n’imodoka ya Hyundai nshya.

Biteganyijwe ko igikorwa cyo gutangaza uzaba wegukanye ikamba rya Nyampinga w’u Rwanda 2022 kizaba tariki 19 Werurwe 2022.

Grace Ingabire niwe ufite ikamba rya Miss Rwanda 2021.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO