Amerika yagizwe igihugu cya mbere gihumanya inyanja

Leta zunze ubumwe za Amerika ubu nicyo gihugu cya mbere ku isi mu kumena imyanda myinshi ikomoka kuri pulasitike mu nyanja.

Leta zunze ubumwe za Amerika zamennye imyanda ikomoka kuri pulasitike mu Nyanja ingana na miliyoni metirike toni 42 ( 42,000,000,000 kg ) mu mwaka wa 2016, Iyi ngano ikubye kabiri imyanda yamenwe mu nyanja n’Ubushinwa n’ibihugu byo mu Burayi bwunze ubumwe ubiteranyije.

Amakuru yavuye mu bushakashatsi avuga ko nibura ku mpuzandengo buri muturage w’Umunyamerika yongera imyanda ikomoka kuri pulasitike ingana n’ibiro 130 buri mwaka.

Ubwongereza nibwo buza ku mwanya wa kabiri aho umuturage umwe buri mwaka yongera imyanda ikomoka kuri pulasitike ingana n’ibiro 99.

Igihugu kiboneka ku mwanya wa gatatu ni Koreya y’amajyepfo aho buri mwaka, umuturage umwe wa Koreya y’epfo yongera ingano y’imyanda ikomoka kuri pulasitike ingana n’ibiro 88 buri mwaka.

Muri raporo yiswe Reckoning with the U.S. Role in Global Ocean Plastic Waste, igaragaza uruhare rwa Leta zunze ubumwe za Amerika mu guhumanya amazi y’inyanja ndetse kongere yaje gushyiraho itegeko ryo kubungabunga inyanja mu Ukuboza 2020 igendeye kuri iyi raporo.

Iyi raporo ikomeza ivuga ko imyanda ikomoka kuri pulasitike yo ku isi yose yavuye kuri miliyoni metirike toni 20 (20,000,000,000 kg) mu mwaka wa 1966 ikagera kuri miliyoni metirike toni 381 (381,000,000,000 kg) mu mwaka wa 2015.

Iyi raporo ikomeza ivuga ko dukwiye kwitondera imyanda tumena aho tubonye hose kuko pulasitike yose ushobora kujugunya ku butaka ifite ubushobozi bwo kuruhukira mu nyanja inyuze mu nzuzi n’imigezi itemba.

Ubushakashatsi bwavuye muri iyi raporo bwerekana ko ibihumbi by’ibinyabuzima biba mu mazi uyu munsi bisangwamo uduce duto twa pulasitike ndetse utwo duce birangira twinjiye mu mibiri y’abantu kuko barya ibinyabuzima byo mu mazi nabyo biba byarariye imyanda ikomoka kuri pulasitike yamenwe mu mazi aho biba.

Iyi raporo ikomeza ivuga ko nibura ingano y’imyanda ikomoka kuri pulasitike ingana na miliyoni metirike toni 8 (8,000,000,000 kg) buri mwaka yinjira mu isi ivuye mu binyabuzima turoba mu mazi tukabirya.

Iyi ngano ikaba ingana nko kumena igikamyo cyuzuye ibishingwe bya pulasitike mu nyanja buri munota, niko iyi raporo ikomeza isobanura.

Nihakomeza kubaho ihumanya muri ubu buryo nta gikozwe, ingano y’imyanda ikomoka kuri pulasitike imenwa mu nyanja izagera kuri miliyoni metirike toni 53 (53,000,000,000 kg) mu mwaka wa 2030, iyi myanda ikaba ingana na kimwe cya kabiri cy’amafi arobwa mu nyanja buri mwaka.

Iyi raporo isobanura ko impamvu iyi myanda ikomeza kwiyongera ngo ni ukubera imyanda ikomoka kuri pulasitike idacayurwa ngo ikurwemo iyakongera gukoreshwa bwa kabiri bigatuma hakorwa ikirundo kinini cyane bikarangira imyanda imwe yishakiye inzira inyuramo bikarangira igeze no mu nyanja z’isi.

Dore uko twagabanya imyanda ikomoka kuri pulasitike

. Ibyavuye muri iyi raporo bitanga inama yo kugabanya ikoreshwa rya pulasitike zikoreshwa rimwe gusa.

. Indi nama batanga ni ugukoresha ibikoresho bya pulasitike bishobora kubora mu gihe gito kandi bishobora kuba byakoroha kuba byakongera gukoreshwa.

Urubuga rwa murandasi rwa Healthy Human Life rusobanura ko pulasitike kugirango ibore bitwara imyaka iri hagati ya 10 – 1,000.

. Kwita ku buryo imyanda ijugunywa ndetse no kongeramo ikoranabuhanga rifasha gukura pulasitike mu mazi nabyo ni ingenzi.

Abantu bari hagati ya 400,00 na 1,000,000 bapfa buri mwaka bazize indwara n’impanuka byose bikomoka ku micungire mibi y’imyanda ya pulasitike nkuko tubikesha urubuga rwa Telegraph.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO