Arsenal ikomeje kuba umuti w’amenyo mu igura n’igurishwa ry’abakinnyi ubu noneho yamaramaje kuri Rutahizamu ukomoka muri Afurika

Ibitangazamakuru bitandukanye byandikirwa ku mugabane w’I Burayi biravuga ko Arsenal nyuma yo kwikirigita igaseka ubwo bayitwaraga Darwin Nunez ubu noneho ngo igiye kwinyara mu isunzu isinyisha rutahizamu ukomoka muri Nigeria Victor Osimhen kuri ubu ukinira ikipe ya Napoli mu Butaliyani.

Uyu rutahizamu, w’imyaka 23 y’amavuko, ari ku rutonde rw’abo ikipe ya Arsenal yifuza kugirango asimbure Alexandre Lacazette warangije amasezerano ye muri iyi kipe agasubira iwabo mu Bufaransa.

Mikel Arteta n’umuyobozi we Edu barimo gushakisha ba rutahizamu batyaye ari nayo mpamvu batekereje kuri Osimhen uyoboye urutonde rw’abo bifuza,hamwe na Gabriel Jesus wa Manchester City

Nk’uko ikinyamakuru cyo mu Butaliyani cyitwa Il Mattino kibitangaza ngo ikipe ya Arsenal yamaze gushyira miliyoni 51 z’amapawundi ku meza gusa Napoli yabiteye utwatsi.

Bivugwa ko iyi kipe yo muri Serie A yifuza miliyoni 85 z’amapawundi kugira ngo Osimhen agende kuko yamuguze miliyoni 69 z’amapawundi mu mwaka wa 2020.

Kuva icyo gihe amaze gutsinda ibitego 28 mu mikino 62 yakiniye Napoli ndetse ubu Arsenal irasabwa kongera amafaranga kugira ngo ibone uyu rutahizamu.

Biravugwa ko umutoza Mikel Arteta atarimo gucana uwaka n’abahobozi be kuko batarimo kumugurira intwaro yifuza kugirango azahatane n’amakipe yigize akari aha kajya he.

Ikipe ya Gunners irashaka kandi Marco Asensio bivugwa ko azanga kongera amasezerano mashya muri Real Madrid, akemererwa kugenda dore ko asigaranye umwaka umwe gusa ku masezerano ye.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO