Ba Rutwitsi mu muziki, Amayeri n’ibinyoma abahanzi bakoresha bakigarura imitima ya benshi

Iyo uvuze ijambo gutwika muri iyi minsi umuntu ahita yumva gukabya, cyangwa gukora ikintu abantu bakakuvuga cyane, byaba ibyo wakoze cyangwa wavuze aribyo cyangwa wibeshyeye yewe n’ubwo wabeshyera abandi witwa Rutwitsi.

Iyo indirimbo yamenyekanye abantu bakayikunda ari benshi bavuga ko watwitse, ariko se ni ayahe mayeri ndetse n’ibikunzwe gukoreshwa mu bahanzi b’iwacu mu Rwanda ngo batwike nkuko inyito bamaze kuyimika?

Muri iyi nkuru tugiye kurebera hamwe ibyo benshi mu bahanzi bakoresha kugira ngo bavugwe tugendeye ku ngero zimwe na zimwe zigaragara.

Kubeshya amafaranga

Aha abahanzi benshi muri iyi minsi bagerageza kubona amakompanyi menshi bakorana ndetse ugasanga basinyanye n’amasezerano meza, ibi n’ibintu byiza twese twagahaye umugisha tukabyishimira; ariko ikibazo kivuka iyo abahanzi bagiye gutangaza amafaranga basinyiye.

Aha usanga bayagize umurengera ndetse bamwe ntibatinya kuyakuba inshuro zirenga ijana ngo bakunde babavuge byisumbuyeho.

Hari umuhanzi umwe wasinyiye uruganda rukora ibinyobwa bisembuye hano mu Rwanda, amakuru avuga ko yasinyiye atarenze miliyoni 4 mu myaka ibiri, ariko imbere y’itangazamakuru yavuze ko yasinyiye miliyoni 200.

Iyo ubajije abakozi b’urwo ruganda bakubwira ko n’amafaranga bakoresha ku mwaka atagera muri ayo mafaranga.

Kwiyitirira ibigo by’ubucuruzi:

Iyi n’imwe muri kata cyangwa uburyo bukoreshwa n’abahanzi benshi ku isi, naha iwacu mu Rwanda byarahageze, aha usanga umuntu afunguye kompanyi mu rwego rwo kuyamamariza agafata umuhanzi runaka akamwitirira ya kompanyi kugira yigarure imitima y’abakunzi be.

Gusa ibi ntibiramba iwacu mu Rwanda uzasanga nyuma y’imyaka mike wa muhanzi atakivuga naya kompanyi kuko kenshi barashwana bagapfa amafaranga cyangwa imyitwarire y’umuhanzi bitewe n’ubumenyi buke mu gukoresha ubu buryo bwo kwibeshyera ko uri umushoramari nyamara utazi aho biva naho bijya.

Kubeshya abafana ko bagiye gusohora indirimbo/alubumu

Ni kenshi wumva umuhanzi amaze igihe adakora, ibyo benshi twita kuzima, aha umuhanzi arareba akabona atangiye kumara igihe atavugwa, agahitamo kubeshya abantu abateguza indirimbo ikomeye, yakoranye n’umuhanzi ugezweho muri icyo gihe amaso akazahera mu kirere.

Hari n’abakoresha ijambo ngo “maze iminsi mpugiye kuri alubumu yanjye” ibi byo bivugwa na benshi ariko ukazategereza iyo alubumu ugaheba.

Impaka za ngo turwane:

Nanone ntitwakwirengagiza ko hajya hanabonekamo amahari n’impaka za ngo turwane hagati y’abahanzi. Ibi bituma umuntu yibaza ikiba kibyihishe inyuma.

Ese ni ugushaka kuvugwa mu itangazamakuru cyangwa koko ni urwangano ruba ruhari?

Mu rwego rwo gushaka kumenyakana mu muziki, hari bamwe bahitamo gushaka guhangana na bagenzi babo babinyujije mu ntonganya, kugira ngo babashe kumvwa. Gusa akenshi usanga baba babiziranyeho bakajya mu itangazamakuru cyangwa mu ndirimbo bagacyocyorana bikarangirira aho.

Ikoreshwa ry’imbugankoranyambaga:

Aha turasangamo ubuhanga n’ubuswa mubakoresha ubu buryo, gusa akenshi ubikoresha aba ari umuhanga kuko aba azi abantu agiye kubwira ko bagomba gukurikira ibyo bintu byakwanga byakunda.

Mu minsi yashize hadutse ikintu bitaga “Gitumo” aho wasanga abakoresha urubuga rwa Youtube bagendereye umuhanzi bamutunguye bakamusanga mu mirimo ye ya buri munsi cyangwa ahandi hantu runaka, ushobora kwibaza niba byarabaga byabaye cyangwa ari ikinamico.

Aha ndagusubiza neza; ibi byabaga ari ikinamico rwose byabaga kugira ngo umuhanzi avugwe ndetse unaryoherwe n’uburyo yabanje gukorwa n’isoni bamugwa gitumo maze nyuma uze gukurikirana ikiganiro yagize nyuma yo kugwa gitumo.

Hari abandi bahitamo gukoresha imbuga nkoranyambaga mu buryo buhoraho, buri kimwe cyose kimubayeho akagisangiza abamukurikira, ku buryo umenya ubuzima bwe bwa buri munsi, aha umufana aba ameze nk’inshuti y’uwo muhanzi bikomeye.

Ibi n’ibimwe mubyo bakoresha, kuko nibyinshi bakoresha ngo batwike icyo uba ugomba kumenya ni ugushungura ukareba ibyo bavuga nawe ugakoresha inyurabwenge mbere y’uko wemera ibyo wabonye cyangwa wumvise mu bahanzi bacu.

Genesisbizz

Related Articles

Ibitekerezo

  • - Meije

    Courage bruh Very kneat ✊ Birahura neza neza! Here to follow u👊

Igitekerezo cyawe kirashyirwaho aruko gisusumwe

TANGA IGITEKEREZO