Bagerageje kumfata ku ngufu, nanyoye urumogi…Ubuhamya bwa Ingabire Magaly

Ingabire Magaly ni umuhanzikazi w’umunyarwanda utuye muri Leta Zunze Ubumwe z’Amerika, yatanze ubuhamya bw’uko yakuranye indwara yagahinda bitewe n’abantu babiri bashatse kumufata ku ngufu bikamuviramo kunywa urumogi ariko ubu akaba ashima Imana ko yamubereye igisubizo.

Magaly ni umunyamuziki wamenyekanye mu ndirimbo nka ‘Nyemerera’, ‘Hold me’, ‘The One’, ‘Abubu’ n’izindi.

Mu butumwa yatanze yavuze ko amaze igihe kinini afite indwara y’agahinda (Depression).
Agira ati “Ntabwo umenya uko yakugezemo kuko bitangirira mu mutwe nyuma bigakomeza no mu buzima bwawe bikakwangiriza ibintu byinshi.”

Mu kuvuga ibi yatanze ubuhamya avuga ibyamubayeho byatumye aheranwa nako gahinda kahereye mu bwana bitewe nibyo yanyuzemo bitari bimworoheye.

Ati “Nabuze ababyeyi ndi umwana muto, Data bamwishe muri Jenoside yakorewe Abatutsi 1994 naho Mama (Nyina) we yicwa n’uburwayi…Ibi nabyo byampahamuyeho gato kuko kubura ababyeyi uri umwana ntabwo ari ibintu byoroshye biba bigoranye.”

Avuga ko gukura warumenyereye kubona ababyeyi bombi byamubereye ikigeragezo gikomeye.

Bagerageje kumufata ku ngufu inshuro ebyiri abisimbuka.

Ati “Mfite imyaka umunani hari umuntu washatse kumfata ku ngufu ariko Imana iratabara gusa na nyuma maze kuba umwangavu byarongeye biraba noneho bikozwe n’umuntu n’ubahaga, inshuti yo mu muryango gusa nabwo nirwanaho ariko bintera guhungabana cyane.”

Avuga ko uwo mugabo wo mu muryango we washatse kumufata ku ngufu yari yuririye ku mpamvu yuko Magaly yari yamwegereye ashaka kumwaka amafaranga y’ishuri.

Ati “Byahise binkuramo kongera kuba nakenera ubufasha ku bantu kuko bose nabatakarije icyizere bitewe nuko uwashatse kumpemukira ari uwo nizeraga.”


Ingabire Magaly avuga bwa mbere bashatse kumufata ku ngufu afite imyaka umunani

Nyuma y’ibyo byose yaje kujya kuba muri Leta Zunze Ubumwe z’Amerika ariko ubuzima bukomeza kumugora bitewe n’ibanga yari abitse yaratinye kugira uwo aribwira mubo mu muryango we kuko yumvaga ko byazateza urusaku.

Byakomeje ku murya mu mutima kubera kubibika ari nayo mpamvu agira inama abantu yo kujya batanga imbabazi cyangwa bakavuga ku cyababayeho kuko imbaraga zabyo zigabanuka.

Ari muri Amerika avuga ko hari abamubwiye ko ‘Urumogi’ rukiza iyo ndwara akajya arunywa ariko rwamushiramo n’ubundi agasubira muri izo ntekerezo.

Ati “Mu byukuri narwo ahubwo rurayitera kuko urarunywa rwagushiramo ukongera ukaba muzima…Gusa nta kindi nasanze gikiza ni Imana yonyine.”

Umwaka ushize yambitswe impeta ubukwe burapfa.

Umwaka ushize yambitswe impeta umukunzi we amusaba ko yamubera umugore arabyemera ariko icyaje gutungurana ni uko bwapfuye, umusore bari kubana ashaka undi mugore.

Ati “Kubaka urugo si ibintu byo guhubukira ni ukubyitondera ariko iyo byakozwe mu nzira nziza mu buryo burimo Imana ariko ndashimira Imana twe twabibonye mbere ko tudahuje imico buri umwe akomeza ubuzima bwe ku bwumvikane.”

Ati “Kuvuga ibi ntabwo binteye isoni kuko nibyo byatumye mba uwo ndiwe uyu munsi, icyo nifuza ni uko ubuhamya bwanjye bwa tuma n’abandi bavuga bakabohoka mu mitima yabo.”


Magaly avuga ko Imana yamubereye igisubizo akira indwara y’agahinda

Indwara y’agahinda gakabije cyangwa Depression ni iki?

Indwara y’agahinda (Depression) ni indwara irangwa n’agahinda gakabije no kwiheba. Ishobora gufata uwo ari we wese, ku myaka iyo ariyo yose kandi iyo itavuwe ishobora gutuma uyirwaye afata imyanzuro yo kwiyambura ubuzima.

Iyo iyi ndwara itavuwe kandi igira ingaruka zikomeye ku bukungu ndetse n’imibereho muri rusange kuko uyirwaye adashobora kugira icyo yimarira cyangwa ngo agire icyo akora cyamuteza imbere gusa ni indwara ishobora kuvurirwa ku rwego rw’ubuvuzi bw’ibanze kandi igakira.

Reba buhamya burambuye bwa Magaly

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO