Bigenda bite iyo tunyoye inzoga, Dore ibyo abatazinywa bahombye

Nyuma y’uko tunyoye inzoga, 20% by’ibizigize bihita bijya mu nda naho 80% bigahita bijya mu maraso. Iyi 80% by’ibigize inzoga bisaranganywa mu bice bitandukanye by’umubiri nk’umwijima, ubwonko, ibihaha, uruhu ndetse bikagera no mu mpyiko bigasohoka mu mwanda wa nyuma ari inkari.

Muri iyi nkuru tugiye kuramburira hamwe ibiba kuri buri gice cy’umubiri wacu iyo tumaze kunywa inzoga ndetse turarebera hamwe impamvu tunywa inzoga tugasinda ndetse turarebera hamwe icyo abantu batanywa inzoga bahombye.

Urwungano rw’amaraso

Iyo tumaze kunywa inzoga, ahantu ha mbere zihita zirukankira ni mu maraso, zigatembera mu bice by’umubiri wose, icyo gihe inzoga zirakomeza zikagendagenda mu maraso kugeza igihe umwijima ubashije gucagagura ibizigize.


Iyo tumaze kunywa inzoga zihita zijya mu maraso

Umwijima

Umwijima udufasha kuyungurura amaraso ndetse ugacagagura hagati ya 80% na 90% by’ibigize inzoga aho byifashisha inyihutishakazi bikabihinduramo amazi, umwuka wa carbon dioxide ndetse n’ibindi bintu bitandukanye umubiri wifashisha nk’ingufu.

Umwijima udufasha gukura kalori (calorie) mu nzoga umubiri wifashisha nk’ingufu.

Ingano y’Inzoga umwijima ubasha gukura mu mubiri wacu zingana n’ikinyobwa kimwe mu isaha.

Ikinyobwa kimwe cy’inzoga gisangwamo nibura amagarama 14 y’ikinyabutabire cya alukolo (alcohol) isangwa mu binyobwa bisembuye.

Ikinyobwa kimwe cya byeri (beer) gisangwamo alukolo ingana na 5%, ikinyobwa kimwe cy’umuvinyo (wine) gisangwamo alukolo ingana na 12% naho likeri (liquor) zigasangwamo ikigero cya alukolo ingana na 40%.

Dore uko wamenya ingano y’ikinyobwa kimwe.

Ku bakunda kunywa byeri, ikinyobwa kimwe cya byeri kingana na mililitiro 354.

Ku bakunda kunywa imivinyo. Ikinyobwa kimwe cy’umuvinyo kingana na mililitiro 118.

Ku bakunda kunywa likeri, ikinyobwa kimwe cya likeri kingana na mililitiro 44.


Inzoga nyinshi zishobora kunaniza umwijima, ni byiza kuzinywa mu rugero

Impyiko

Iyo inzoga zimaze kuva mu mwijima, igice gikurikira zigeramo ni impyiko.

Akazi k’impyiko ni ugusukura amaraso, zikanaringaniza amatembabuzi yo mu mubiri zikanasohora imyanda mu mubiri mu buryo bw’inkari.

Iyo tumaze kunywa inzoga rero, zituma impyiko zacu zikora akazi kenshi ibi nibyo bituma zitunganya imyanda myinshi y’imbere mu mubiri ariyo ivamo inkari nyinshi.

Nibura igipimo cy’inzoga tunywa zingana na 10% zisohoka mu mubiri wacu mu buryo bw’inkari.


Nibyiza kunywa inzoga mu rugero kugirango zitananiza impyiko

Ubwonko

Urubuga rwa murandasi rwa alcohol.org.nz ruvuga ko nyuma y’iminota hagati ya 5-10 umaze kunywa inzoga, uhita utangira kumva impinduka kuko ziba zamaze kugera ku bwonko.

Icyo gihe harimo impinduka z’amarangamutima, gutakaza ubushobozi bwo gutekereza neza, ndetse no gutakaza ubushobozi bwo kugenda neza ugatangira no kwibagirwa ibintu bimwe na bimwe.

Ku bajyaga bibaza impamvu uwanyoye inzoga atakaza ubushobozi bwo kugenda neza, ibyo benshi bita kugenda ’yandika umunani’, biterwa n’impinduka inzoga zitera ubwonko, bigatuma umuntu atakaza ubushobozi bwo kugenda neza, kuko ihanahanwa ry’amakuru rituma abasha kugenda neza riba ritakiri gukora neza.

Ibi nibyo bituma atakaza ubushobozi bwo kuvuga neza nk’ibisanzwe, ibi byose biterwa n’impinduka z’imbere mu bwonko rituma ihanahanwa ry’amakuru rigenda nabi cyangwa se rigakererwa.


Inzoga zitera impinduka ku bwonko aribyo bituma dusinda.

Ibihaha

Inzoga iyo zimaze kugera mu maraso, zishobora gusohoka zinyuze mu gusohora umwuka igihe duhumeka.

Nibura ikigero kingana na 8% cy’inzoga tunyoye nicyo gisohoka igihe duhumeka.

Ibi ni byabindi bita umufuke (umwuka usohorwa n’umuntu wanyoye inzoga)


Inzoga zishobora gusohokera mu bihaha igihe duhumeka

Uruhu

Hari ingano y’inzoga tunywa isohoka igihe uruhu ruhumeka.

Ingano nkeya y’inzoga tunywa ziba zagiye mu miyoboro y’amaraso igaragara inyuma ku ruhu itakarira mu guhumeka k’uruhu.

Urubuga rwa murandasi rwa alcohol.org.nz rusobanura ko hari ingano runaka y’inzoga ishobora gusohoka cyangwa ikinjira mu mubiri inyuze mu ruhu.


Inzoga zishobora gusohokera no kwinjirira mu ruhu

Umwana utaravuka

Inzoga zishobora kugenda mu nzira y’amaraso yo muri nyababyeyi aho umwana akurira iteka ryose igihe umugore utwite anyoye inzoga.

Umugore utwite asangira intungamubiri n’umwana atwite, iyi niyo mpamvu buri kimwe anyoye akanarya kigira ingaruka ku mwana atwite.

Iyo umugore atwite akanywa inzoga, buri ngano y’inzoga anyoye ayisangira n’umwana atwite gusa ikibazo ni uko umwana uri mu nda aba adafite ubushobozi bwo gucagagura ibigize inzoga.


Inzoga ni mbi ku bagore batwite

Kuberiki tunywa inzoga tugasinda, Biterwa n’iki ?

Buri nzoga yose, igira ikinyabutabire cya alucolo, Inyihutishakazi yitwa alcohol dehydrogenase niyo ishinzwe gucagagura alukolo igize inzoga ikayihinduramo acetaldehyde, iki kinyabutabire nicyo nyuma gihindurwamo acetic acid Iyi niyo iza gihundurwamo umwuka wa carbon dioxide usohoka igihe duhumeka kugeza inzoga zishize mu mubiri.

Dr. Regina Krel, impuguke mu gusuzuma, kuvura no kugenzura indwara zitandukanye zibasira ubwonko (Neurologist) avuga ko kugirango tunywe inzoga dusinde, biterwa n’uko uba winjije igipimo cya alukolo kiri hejuru y’ingano umubiri wawe ushobora gucagagura.

Ibi bisobanuye ko ubashije kunywa urugero rw’inzoga zifite ikigero cya alukolo umubiri wawe ushobora gucagagura, ntiwasinda.

Umumaro mwiza w’inzoga

N’ubwo inzoga twabonye ko zishobora kugira ingaruka mbi zitandukanye nko ku bagore batwite n’abana bataravuka, ndetse zikaba zakwangiza umwijima igihe zinyowe ari nyinshi, ntabwo inzoga nanone ziduteza ibibazo gusa ahubwo zigira n’umumaro mwiza igihe zanyowe mu rugero.

Urubuga insider.com rwatangaje ko kunywa inzoga atari amahitamo meza gusa rimwe na rimwe hari igihe ziba nziza kurusha ibindi binyobwa.

Urugero ni uko kunywa imivinyo y’umutuku (Red Wine), wisiki (whiskey) cyangwa tekila (tequila) ari byiza kurusha kunywa ibinyobwa biryohera byongerwamo amasukari yo mu nganda ariko bidasembuye.

Imivinyo y’umutuku isangwamo ibinyabutabire bya antioxidants bifasha kurinda uturemangingo tw’umubiri gusaza, zikarinda amagufa ndetse zigafasha no gutembera neza kw’amaraso n’umutima muri rusange.

Ibindi byiza by’imivinyo ni uko idatuma umwijima ukora akazi gakomeye ko gucagagura alukolo isangwa mu bindi binyobwa bitandukanye bigira igipimo cya alukolo nyinshi.


Ku bantu batanywa inzoga hari ibintu byinshi bahomba biba muri champagne

Champagne ifatwa nk’inzoga kuko igira igipimo cya alukolo kingana na 12.2% nk’uko tubikesha urubuga rwa Vionest.

Gusa nanone izi champagne zigira igipimo cya alukolo gihindagurika bitewe n’ubwoko bw’imizabibu bakoresheje igihe bazenga.

Iyi mizabibu bakoresha muri champagne ni myiza cyane ku mubiri kuko yifitemo ibinyabutabire bya antioxidants bifasha ubwonko bikanaburinda kwibasirwa n’indwara yo kwibagirwa.

Imibare y’ishami ry’umuryango w’abibumbye ryita ku buzima (WHO/OMS) igaragaza ko buri mwaka abantu miliyoni eshatu (3,000,000) bapfa buri mwaka bazize kunywa inzoga nyinshi n’ibibazo biterwa n’inzoga nk’impanuka n’ibindi bitandukanye.

Iyi mibare ikomeza ivuga ko 5.1% by’abatuye isi bose basigiwe uburwayi budakira bakomoye ku kunywa inzoga zirenze urugero.

Ikigo gishinzwe gukumira no kurinda indwara zandura (CDC) kigira abantu inama yo kutarenza ikinyobwa kimwe ku bagore n’ibinyobwa bibiri ku bagabo.


Tunywe inzoga mu rugero

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO