Brian Deacon wakinnye muri filime ya Yezu aracyahura n’ingaruka zikomeye

Brian Deacon ni umukinnyi wa filime ukomoka mu gihugu cy’Ubwongereza wamenyekanye cyane ubwo yakinaga muri filime y’amateka ya Yezu yakinwe mu mwaka w’1979, abantu benshi uyumunsi usanga bafata ishusho ye nkaho ariwe Yezu kandi ibyo yakoraga byari akazi ko gukina filime gusa.
Uyu mukinnyi Brian Deacon avuga ko gukina muri iyi filime ari Yezu byatumye amenyekana cyane ariko nanone avuga ko byamugizeho ingaruka zikomeye.

Deacon yatoranyijwe mu bandi bakinnyi ba filime basaga 900 bose bahataniraga gukina muri filime aho bari kugaragara nka Yezu muri filime yateguwe n’umuryango w’ivugabutumwa aho uyu mushinga w’iyi filime bawise The Jesus Film Project.

Uyu mushinga gahunda zawo zikaba zari ugutunganya amashusho y’iyi filime ndetse bakayihindura mu ndimi nyinshi zishoboka kugirango ibashe kugera mu bihugu byinshi kugirango ubutumwa bwiza bashakaga gutambutsa muri iyi filime bugere ku bantu benshi.

Filime yerekana ubuzima bwa Yezu yahinduwe mu ndimi nyinshi kugirango igere ku bantu benshi.

Mu kiganiro yagiranye na radiyo ya gikristu yo muri Australia, Deacon yavuze ko kuba yarakinnye muri filime ari Yezu ndetse ikarebwa n’abantu basaga miliyari 6 byatumye iba filime ya mbere mu mateka y’isi yarebwe cyane ndetse ituma abantu basaga miliyoni 200 bahinduka abakristu.

Deacon yakomeje avuga ko kugeza uyu munsi iyo bamwe batekereje ishusho ya Yezu, bibuka uwakinnye muri iyi filime ariwe Brian Deacon ku buryo bituma hari abamwita Yezu, ibi byose yavuze ko byamugizeho ingaruka yaba izo mu mwuga we wo gukina filime ndetse no mu buzima busanzwe.

Deacon yakomeje avuga ko igihe bamuhaga akazi ko gukina muri filime ari Yezu, umwe mu batunganyaga filime yaramubwiye.

Ati "Abantu benshi bizabagora kuguha akazi ku buryo wagaragara mu zindi filime, nk’igihe bakwifuza kuguha akazi ko gukina uri umugizi wa nabi cyangwa se ugakina uri mu rukundo rukomeye."

Iki gihe yakomeje avuga ko yari yiteguye ko byashobokaga cyane ko iyi yari kuba ariyo filime ya nyuma akinnyemo kuko byari kugorana ko abandi batunganya filime bamuha akazi ko gukina muri filime zabo kandi isi yose imuzi nka Yezu.

Uyu mugabo yavutse muri Gashyantare taliki ya 13, 1949. Izindi filime yagaragayemo harimo nka A zed & two noughts, The Triple echo, The beyond, Separate Tablets, the kiss n’izindi.

Brian Deacon avuga ko gukina ari Yezu byamugizeho ingaruka zikomeye mu mwuga we wo gukina filime no mu buzima busanzwe.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO