Britney Spears mu gahinda kenshi aho agiye kumara igihe kinini adakoresha imbuga nkoranyambaga

Britney Spears wakunzwe cyane mu ndirimbo nka ‘’Piece of Me’’ yatangarije abafana be ko agiye kumara igihe adakoresha urubuga rwe rwa Instagram.

Britney Spears usanzwe uri mu buzima butamworoheye bitewe n’ibibazo by’imanza zerekeye imyanzuro yafatiwe ubuzima bwe ndetse akaba amaze imyaka isaga icumi acungishijwe ijisho, aherutse gutangariza abafana be ko agiye kugabanya inshuro agaragara ku mbuga nkoranyambaga.

Britney spears agiye kugabanya inshuro akoresha imbuga nkoranyambaga.

Mu magambo ye yagize ati : ‘’ Mu buzima mbayemo aho namaze igihe kirekire mba mu bwigunge, nibura ubu mfite aho nakwerekanira imbamutima zanjye’’. Yakomeje agira ati : ‘’ isi ishobora kuba ahantu habi, ibyo ndabizi, namwe murabizi, ariko nibura twese tugize ubumuntu ntiyaba ikibaye mbi.

Yakomeje agira ati : ’’ Ku bw’amahirwe make ibinyamakuru byinshi byakomeje kunyandikaho inkuru z’ibihuha zimvugaho ibintu bibi gusa, kubera ibyo rero bigiye gutuma ngabanya inshuro ngaragara ku mbuga nkoranyambaga, Imana ibampere umugisha mwa mfura mwe ‘’.

Britney Spears w’imyaka 39 ubwo aheruka kugaragara mu rukiko mu magambo ye yaravuze ati:’’ sinishimye, sinshobora gusinzira, ndababaye cyane, mfite agahinda kavanze n’ihungabana.

"Ndifuza kubaho nkuko nari meze mbere, ndifuza ko imyanzuro urukiko rwafatiye ubuzima bwanjye irangira, ndifuza ko ubuzima bwo kubaho ngenzurwa buhagarara. Gucungishwa ijisho no gufatirwa imyanzuro biranyangiza kurushaho, nkeneye nanjye kugira ubuzima bwisanzuye, nakoze imyaka myinshi cyane. Nkwiriye gufata ikiruhuko cy’imyaka ibiri cyangwa itatu.’’

Britney Spears avuga ko agiye gufata ikiruhuko akita ku buzima bwe.

Britney Spears ubu ni umubyeyi w’abana babiri Sean w’imyaka 15 na Jayden w’imyaka 14, aba bana bombi akaba yarababyaranye n’uwahoze ari umugabo we batandukanye Kevin Federline.

Britney akomeza avuga ko ubuzima abayemo atabwishimiye kuko ise umubyara hamwe n’abanyamategeko be bamusabiye ko atakongera kubyara cyangwa ngo ashake undi mugabo kandi Britney we yifuza kongera gukora ubukwe agashaka undi mugabo akaba yabyara abandi bana akabaho ubuzima yishimiye.

Britney yakomeje avuga ko yategetswe ko bamushyiramo agapira kamurinda gusama kugirango atazabyara abandi bana.

Ati "Buri cyumweru bantegekaga kujya kwa muganga ushinzwe ifashamyumvire inshuro eshatu mu cyumweru. Nizerako uku gucungishwa ijisho no gufatira ubuzima bwanjye imyanzuro bibangamye cyane, sintekereza ko nzabaho ubuzima bwuzuye nigenga, data umbyara hamwe n’ikipe ishinzwe inyungu zanjye abo bose bihishe inyuma yo gufatira imyanzuro ubuzima bwanjye bakwiye kujya muri gereza."

Britney Spears ari mu gahinda kenshi yatewe n’imyanzuro yafashwe irebana n’ubuzima bwe.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO