Byemejwe ko umuntu wa kabiri yakize SIDA

Adam Castillejo w’i Londres mu Bwongereza yabaye umuntu wa kabiri ku isi wakize ubwandu bw’agakoko gatera SIDA ’HIV" nk’uko abaganga babyemeza.

Uyu mugabo w’imyaka 40 nta bwandu bw’iyi virus bukiri mu mubiri we nyuma y’amezi 30 ahagaritse imiti igabanya ubukana bwa SIDA.

Nk’uko ikinyamakuru cya Lancet HIV kibivuga, ngo Adam Castillejo yari asanzwe afite indwara ya ’Cancer’. Kubera ubuvuzi yakorerwaga, bwaje kumuha utundi turemangingo tuzwi nka Stem-cell duha ubwirinzi kuri HIV.

Stem-cell ni ubuvuzi bwo guhindura uturemangingo cyane cyane mu misokoro y’amagufa.

Castillejo ubu nta virus ya HIV iri mu maraso ye, mu masohoro cyangwa andi matembabuzi y’umubiri we nk’uko abaganga babyemeza.

Mu 2011, Timothy Brown uzwi cyane nka "Berlin Patient", ni we murwayi wa mbere watangajwe ko yakize HIV, nyuma y’imyaka itatu akorerwa ubuvuzi nk’ubu.

Ubu buvuzi bigaragara ko buhagarika virus itera SIDA kwiyongera no gukwira mu mubiri iyo umuntu avanywemo uturemangingo twe agashyirwamo utw’undi muntu.

Umushakashatsi Prof Ravindra Kumar Gupta wo muri Kaminuza ya Cambridge yabwiye BBC ko Stem-cell ari umuti usa n’uwizewe bidashidikanywaho wa SIDA.

Ati: "Ibyo twagezeho ni uko guhindura uturemangingo ari umuti wa HIV, byabaye bwa mbere mu myaka icyenda ishize ku murwayi i Berlin, n’ubu byongeye".

Gusa nubwo yatangaje ibi, Ubu buvuzi bukomeye bwabanje gukoreshwa mu kuvura abarwayi ba cancer, si aba SIDA.

Kugeza ubu imiti igabanya ubukana bwa SIDA iracyagaragaza gutanga umusaruro, abanduye bayifata neza bakomeza kubaho ubuzima busanzwe.

Prof Gupta ati: "Ni ingenzi kumenyesha ko ubu buvuzi nubwo bukiza bukomerera cyane ababuhabwa kandi bukoreshwa ku bafite HIV ariko banafite ibibazo by’uturemangingo n’amaraso. Bityo, si ubuvuzi bwahabwa abantu benshi banduye SIDA bari gufata imiti igabanya ubukana".

Adam yabwiye New York Times ko yishimiye cyane uko amerewe ubu. Ndetse ko ashaka kuba intumwa y’ikizere.

Ati: "Ndashaka kuba intumwa y’ikizere. Si nshaka ko abantu batekereza ko ari njye watoranyijwe. Hoya!!!byarabaye gusa, nari aho nkwiye kuba yenda mu gihe nyacyo ubwo byabaga".

Sharon Lewin, wo muri kaminuza ya Merbourne we avuga ko, ashingiye ku bwinshi bw’uturemangingo twapimwe no kuba nta virus ya SIDA n’imwe yabonetse mu maraso ya Adam Castillejo , mu masohoro n’andi matembabuzi y’umubiri we nk’uko abaganga babyemeza, biteye kwibaza niba yarakize neza koko.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO