CNLG yabaye ihagaritse ibyo gusura inzibutso mu matsinda

Komisiyo y’Igihugu yo kurwanya Jenoside (CNLG), yamenyesheje abantu bose baba Abanyarwanda cyangwa Abanyamahanga basura inzibutso za Jenoside yakorewe Abatutsi bari mu matsinda y’abantu benshi, ko bihagaritswe mu gihe cy’ibyumweru bibiri.

Iki cyemezo CNLG yagifashe ishingiye ku mabwiriza yatanzwe na Guverinoma y’u Rwanda mu rwego rwo kwirinda icyorezo cya Coronavirus (COVID-19).

CNLG yagize iti “Abasura umwe umwe bazakomeza kwakirwa ku nzibutso za jenoside nk’uko bisanzwe ariko hubahirizwa amabwiriza yo kwirinda. Umushyitsi utazubahiriza amabwiriza azahabwa ntabwo azakirwa”.

Itangazo ryashyizweho umukono n’Umunyamabanga Nshingwabikorwa wa CNLG, Dr Bizimana Jean Damascène, rivuga ko haramutse hafashwe izindi ngamba nshya zatangazwa.

Minisiteri y’Ubuzima iheruka gutangaza ko abantu banduye Coronavirus mu Rwanda bamaze kugera kuri 11, ndetse ko kubera uburyo iki cyorezo gikomeje gukaza umurego, igihe cy’ibyumweru bibiri cyari cyashyizweho mu gufunga ibikorwa binyuranye bihuriramo abantu benshi gishobora kongerwa.

Ibimenyetso bya Coronavirus birimo kugira umuriro, ibicurane, umunaniro n’inkorora ijyana no kubabara mu mihogo, guhumeka nabi bishobora no kugera aho itera umusonga no kubuza impyiko gukora bishobora gutera urupfu.

Iyi ndwara yandura binyuze mu matembabuzi aturuka mu myanya y’ubuhumekero, ashobora gukwirakwira igihe umuntu uyirwaye yitsamuye cyangwa agakorora, ayo matembabuzi akajya ahantu, undi muntu akaza kuyakoraho, nawe akikora ku mazuru, ku munwa cyangwa mu maso.

Niyo mpamvu uburyo bw’ibanze bwo kwirinda ari ugukaraba intoki buri gihe n’amazi meza n’isabune, gukoresha alcool yica udukoko kandi umuntu akirinda gukora aho abonye hose no kwikora mu maso.

Minisiteri y’Ubuzima yasabye abaturarwanda gukomeza kwitwararika, bakurikiza amabwiriza y’inzego z’ubuzima arimo no kwirinda kujya ahantu hateraniye abantu benshi no kwirinda ingendo zitari ngombwa.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO