COVID-19: Polisi yemeza ko ’drones’ ziri gutanga umusaruro mu bukangurambaga

Muri gahunda yo gukangurira abaturarwanda kwirinda ikwirakwira ry’icyorezo cya Koronavirusi, Polisi y’u Rwanda igenda ikoresha uburyo butandukanye igeza ku baturarwanda amabwiriza ya Leta ajyanye no kwirinda iki cyorezo. Abaturage bo mu mujyi wa Kigali baravuga ko ikoreshwa ry’indege zitagira abapilote byagize umumaro ukomeye mu kubagezaho ubutumwa aho bari mu ngo zabo.

Tariki ya 12 Mata nibwo Polisi y’u Rwanda yatangiye gukoresha izi ndege, mbere yaho Polisi ikaba yarakoreshaga ubundi buryo butandukanye nk’itangazamakuru ritandukanye, imbuga nkoranyambaga zayo ndetse hari n’imodoka zifite indangururamajwi zanyuraga mu nsisiro zo mu mujyi wa Kigali zigakangurira abaturarwanda kubahiriza amabwiriza ya Leta yo kwirinda ikwirakwira ry’icyorezo cya COVID-19 ariko cyane cyane basabwa kuguma mu ngo zabo kandi bakagira isuku.

Abaturage bo mu mujyi wa Kigali baravuga ko izi ndege zidafite abapilote zagize umumaro ukomeye mu gutuma bahindura imyitwarire mu kurinda ubuzima bwabo birinda icyorezo cya Koronavirusi.

Iyaremye Charles, umuturage wo mu kagari ka Kibagabaga mu murenge wa Kimironko mu karere ka Gasabo yavuze ko we n’umuryango we bari basanzwe bigira muri siporo mu gihe cy’umugoroba ariko aho haziye ziriya ndege barabiretse.

Yagize ati: “ Njye n’umuryango wanjye ku mugoroba twavaga mu rugo tukajya muri siporo twiruka . ntitwari tuzi ko bibujijwe, ariko nyuma y’aho twumviye ubutumwa bw’iriya ndege itagira umupilote twahise duhagarika izo siporo.”

Nyiridandi Clement nawe ni umuturage wo mu mudugudu ka Nyirabwana mu murenge wa Kimironko avuga ko ziriya ndege zatumye amenya uko umuntu yakwiyandikisha mu buryo bw’ikoranabuhanga ashaka uruhushya rwo gukora ingendo za ngombwa.

Kalisa Jean Sauveur, Umunyamabanga Nshingwabikorwa w’umurenge wa Kimironko avuga ko mbere izi ndege zitaratangira gukoreshwa hari aho byagoranaga kugira ngo abaturage bagerweho n’ubutumwa bitewe n’imiturire yabo.

Yagize ati “Mbere ubu bukangurambaga bugitangira hari imbogamizi yo kugira ngo ubutumwa bugere ku baturage batuye begeranye cyane nko mu mudugudu wa Nyirabwana mu kagari ka Kibagabaga kuko imodoka ntizashoboraga kuhagera. Aha hantu kandi hakunze kugaragara abantu bakora ingendo zitari ngombwa, ibikorwa by’ubucuruzi ndetse n’abasohokaga hanze bakajya gukora siporo.”

Kalisa akomeza avuga ko ubu kubera indege zidafite abapilote zatangiye gukoreshwa, ni gake cyane wabona abantu barimo gukora ingendo zitari ngombwa ndetse n’abafite ibikorwa by’ubucuruzi barubahiriza intera hagati y’umukiliya n’undi ndetse n’abantu bagenda mu kivunge ntibakigaragara.

Izi ndege zidafite abapilote twabibutsa ko ziba zifite indangururamajwi, zikagenda zinyura ahantu hatandukanye zikangurira abaturage kwirinda gukwirakwiza icyorezo cya Koronavirusi. Cyane cyane zibanda ahahurira abantu benshi nko mu ku masoko, udusantire tw’ubucuruzi n’ahatuye abantu benshi.

Umuvugizi wa Polisi y’u Rwanda, Commissioner of Police (CP) John Bosco Kabera aravuga ko izi ndege zoherezwa ahantu zikahatambutsa ubutumwa bitewe n’imiterere yaho.

Yagize ati “Ziriya ndege zifite inshingano ebyiri z’ingenzi, iya mbere ni ukugeza ubutumwa ku baturage, indi ni ukugenzura ko amabwiriza Leta yatanze yubahirizwa. Bitewe na kamera ziri muri ziriya ndege ndetse n’indangururamajwi zirimo, bifasha Polisi y’u Rwanda gukangurira abantu kwirinda kugendagenda mu mihanda, kudasohoka mu ngo zabo ngo bajye muri siporo ndetse no gukangurira abantu kwirinda igendo zitari ngombwa. Ibi bituma abarenze ku mabwiriza bisubiraho ndetse bagasubira no mu ngo zabo bihuse.”

CP Kabera akomeza avuga ko hari tumwe mu tubari twitaruye umujyi wa Kigali aho banyira two barengaga ku mabwiriza ya Leta ariko utwo tubari twagaragajwe na ziriya ndege ndetse turafungwa.

Yagize ati “Akenshi imodoka zacu zifite indangururamajwi ntizashoboraga kugera muri biriya bice byitaruye umujyi ndetse n’ahandi hari imihanda itameze neza. Kandi turiya duce dukunze kurangwamo umuvundo w’abantu ndetse n’ingendo zitari ngombwa, ibyo byose kandi binyurajije n’amabwiriza yo kurwanya icyorezo cya Koronavirusi.”

Yakomeje asaba abaturarwanda kwirinda gusohoka mu ngo zabo bagiye kurangarira indege, kuko hari aho byagaragaye bateraniye ahantu hamwe bakoze amatsinda barimo kureba uko indege zirimo kugenda zitanga ubutumwa.

Yabasabye gukomeza kuguma mu rugo mu rwego rwo kurinda ubuzima bwabo ndetse n’ubw’imiryango yabo.

Abasaba kwifashisha ikoranabuhanga basaba impushya zo gusohoka ariko bakibuka kugenda bambaye udupfukamunwa ndetse bakirinda kugenda begeranye. Agaragaza ko igihe ibyo bizaba byubahirijwe azaba ari umusanzu batanze mu kurinda ubuzima bwabo ndetse banafashije igihugu mu kurwanya icyorezo cya Koronavirusi.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO