Ikipe ya Chelsea yakomeje kumangamanga ku isoko ry’igura n’igurisha ry’abakinnyi kuri ubu yamaze gushyirwa mu majwi ko yifuza bikomeye rutahizamu wahoze akinira ikipe ya Arsenal ariwe Pierre Emmerick Aubameyang.
Ikipe ya Chelsea irimo kwifuza kurekura umukinnyi Timo Werner kugirango ibashe kugura rutahizamu ukomoka mu gihugu cya Gabon ariwe Aubameyang dore ko Barcelona akinira yamaze kugura umukinyi Lewandowiski imuvanye mu ikipe ya Bayern Munich.
Aubameyang yavuye mu ikipe ya Arsenal yerekeza muri Barcelona nyuma yuko yari amaze gushwana n’umutoza Mikel Arteta ndetse byatumye yerekeza mu ikipe ya Barcelona muri Mutarama uyu mwaka.
Inzobere mu kumenya isoko ryo kugura no kugurisha abakinnyi, Fabrizio Romano yatangaje ko Aubameyang ashobora kuba ari mu nzira yerekeza mu ikipe ya Chelsea.
Romano yanditse ku rubuga rwa twitter ati: “Ubu Chelsea irimo gutekereza ko Pierre Emerick Aubameyang yayibera rutahizamu mushya.
Ibiganiro byamaze gutangira ku ruhande rw’umukinnyi, kugeza ubu nta giciro FC Barcelona irahabwa.
Bivugwa ko Aubameyang ari umwe mu mazina ari ku rutonde rwa Chelsea yifuza.
