Christian Eriksen mu nzira zerekeza muri Brentford, n’andi avugwa mw’igura n’igurishwa I burayi

Christian Eriksen yamaze kumvikana na Brentford City kuyikinira mu gihe kingana n’amezi 6, nyuma yo kumara igihe adakina umupira w’amaguru kuva yagwa mu kibuga mu mukino wa Euro Denmark yahuragamo na Finland muri kamena 2021, kubera ikibazo cy’umutima.

Eriksen w’imyaka 29 akaba agomba kongera gukorerwa ikizamini cy’ubuzima mbere yo gusinyira Brentford City, kugirango yizere neza ubuzima bw’uyu musore n’ubwo abaganga bamuhaye uburenganzira bwo kongera gukina umupira w’amaguru nyuma yo kubona ko ikibazo cy’umutima yarafite cyakemutse.

Brentford City kandi ikaba yongereye amasezerano umutoza wayo mukuru Thomas Frank ndetse n’umwungirije Brian Riemer, azageza mu mwaka wa 2025.

Aba batoza bombi bakaba baratangiye gukorana muri 2018 ndetse banabashije kuzamura iyi kipe muri shampiyona y’icyiciro cya mbere.

Thomas Frank na Brian Reimer bongerewe amasezerano.

Manchester United irateganya gusinyisha abakinnyi 4 mu mpeshyi y’uyu mwaka barimo Declan Rice w’imyaka 23 ukinira West Ham mu kibuga hagati, akaba yaba aje gusimbura Paul Pogba mu gihe yaba atongereye amasezerano.

Declan Rice ashobora gusimbura Paul Pogba muri Man U.

Undi mukinnyi Manchester United ihanze amaso akaba ari myugariro wa Brighton witwa Tariq Lamptey, dore ko iyi kipe iteganya kugurisha Eric Baily na Phil Jones mu mpeshyi y’uyu mwaka.

Tariq Lamptey n’umwe mu bifuzwa na Man U.

Newcastle United iri guhatiriza kugirango irebe ko yasinyisha Jesse Lingard uzasoza amasezerano ye muri Manchester United muri Kamena uyu mwaka, ndetse akaba yaranagaragaje ko adashaka kongera andi masezerano muri iyi kipe yakuriyemo.

Lingard w’imyaka 29 akaba ashaka gusohoka muri Manchester United kubera kutabona umwanya uhagije wo gukina, dore ko yifuza ikipe abonamo umwanya wo gukina kugirango azabashe kwitabazwa n’igihugu cye mu mikino y’igikombe cy’isi izatangira tariki 21 Ugushingo 2022.

Jesse Lingard ntiyishimiye kutabona umwanya wo gukina

Atletico Madrid yamaze kumvikana na Lille kugirango isinyishe umusore uyikinira inyuma ku ruhande rw’ibumoso witwa Reinildo Mandava, ndetse uyu munsi akaba ategerejwe i Madrid aho arahita akorera ikizamini cy’ubuzima.

Reinildo Mandava mu nzira zerekeza muri Atletico Madrid.

Atletico ikaba iri no mu biganiro kandi na Valencia kugirango isinyishe Umunya Denmark uyikinira witwa Daniel Wass.

AC Milan igeze kure ibiganiro n’ikipe ya Red Star Belgrade kugirango isinyishe umwataka wayo ukomoka muri Serbia witwa Marko Lazetic, witezweho kuzasimbura Zlatan Ibrahimovic.

AC Milan ikaba yiteguye gutanga miliyoni 5 z’amayero kuri uyu musore w’imyaka 18, ndetse no ku giciro yazagurishwaho mu gihe kiri imbere Red Star ikazabonaho inyungu.

Marko Lazetic witezweho gusimbura Ibrahimovic muri AC Milan.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO