Coronavirusi: Afurika yasabwe kwitegura ibihe bibi cyane biri imbere

Ukuriye ishami ry’umuryango w’abibumbye ryita ku buzima (OMS/WHO) yaburiye ibihugu by’Afurika "kwitegura ibihe bibi cyane" biri imbere kubera icyorezo cya coronavirusi.

Abamaze guhitanwa n’icyi cyorezo ku mugabane wa Afurika bamaze kugera kuri 16: batandatu mu Misiri, batandatu muri Algeria, babiri muri Maroc, umwe muri Sudan n’umwe muri Burkina Faso.

Afurika ni wo mugabane kugeza ubu utarashegeshwe na coronavirusi, ariko impuguke mu by’ubuvuzi zaburiye ko inzego zayo z’ubuzima zisanzwe zifite imikorere icumbagira zishobora kurengerwa ubushobozi byihuse kubera iki cyorezo, cyane cyane mu mijyi ituwemo mu bucucike.

BBC dukesha iyi nkuru ivuga ko, Tedros Adhanom Ghebreyesus, ukuriye OMS, yaburiye ko nubwo umubare w’abamaze kwemezwa muri Afurika ko banduye Covid-19 kuri ubu ukiri hasi - abarenga 640 - nta mpamvu yo kujenjeka.

Ati: "Afurika ikwiye gukanguka, umugabane wanjye [mvukaho] ukwiye gukanguka".

Bwana Tedros ukomoka muri Ethiopia akaba ari na we Munyafurika wa mbere uyoboye OMS, yanavuze ko Afurika ikwiye kwigira ku kuntu iyi virusi yagiye ikwirakwira ku yindi migabane yo ku isi.

Ati: "... Mu bindi bihugu, twabonye mu by’ukuri ukuntu iyi virusi ifata umuvuduko mwinshi nyuma y’igihe runaka iyo hari ikiyitije imbaraga".

Ejo ku wa gatatu, igihugu cya Burkina Faso cyatangaje umuntu wa mbere wo muri Afurika yo munsi y’ubutayu bwa Sahara wishwe na coronavirus.

Ni umugore w’imyaka 62 wari usanzwe anarwaye indwara y’igisukari (diabète).

Abategetsi bavuga ko uwo murwayi yishe ari Rose Marie Compaoré, wari visi-perezida w’inteko ishingamategeko muri icyo gihugu.

Muri Afurika y’Epfo, ejo ku wa gatatu abantu bayanduye bariyongereye bikomeye bagera ku 116, benshi muri bo bakaba ari abantu bari baragiye i Burayi.

Uwo mubare urimo abarwayi 14 bavuye ku kuyanduzanya ko hagati mu gihugu.

Muri aka karere, ubu mu Rwanda hari abantu 11 basanzemo iyi ndwara, Tanzania batandatu, Kenya barindwi, DR Congo 14 naho mu Burundi na Uganda iyi ndwara nta muntu barayisangamo.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO