BNR yavanyeho igiciro ku ihererekanywa ry’amafaraga

Banki nkuru y’u Rwanda-BNR, yakuyeho igiciro ku ihererekanya ry’amafaranga ryifashishije ikoranabuhanga hagati ya konti za banki na telephone ngendanwa z’abantu, ndetse no kwishyura inguzanyo bikoroshywa.

Banki nkuru y’u Rwanda yasohoye itangazo rikubiyemo amabwiriza yo koroshya ingaruka z’icyorezo cya Coronavirusi (covid-19) gikomeje guhungabanya ubukungu kitaretse no kwibasira ubuzima bw’abantu hirya no hino ku isi.

BNR yatangaje ko nyuma y’aho Coronavirus igaragariye ku isi ndetse ikaba iri kugira ingaruka ku bukungu, ifatanyije n’izindi nzego za leta bagiye inama n’amabanki n’ibigo bitanga serivisi z’itumanaho mu rwego rwo gufata ingamba zigamije guhangana nazo.

Itangazo yashyize hanze kuri uyu wa gatatu tariki 18 Werurwe 2020 rivuga ko mu ngamba zafashwe harimo kwemerera banki kongerera abakiriya bazo igihe cyo kwishyura imyenda isigaye, mu gihe bagizweho ingaruka na Coronavirus.

Ikigega cy’iyi banki kizamara amezi atandatu cya miliyari 50 z’amanyarwanda zo kuguriza banki zigize ikibazo cya ’cash’ muri ibi bihe.

Gusaba banki zatanze inguzanyo gusubiramo uburyo bwo kwishyura ku bantu batari kubona amafaranga uko bisanzwe kubera icyorezo cya coronavirusi (covid-19).

Iyi banki yasabye ko havaho igiciro ku ihererekanya ry’amafarnaga ryifashishije ikoranabuhanga hagati ya konti za banki na telephone ngendanwa z’abantu.
Ko nta mafaranga agomba gucibwa ihererekanya ry’amafaranga kuri telephone (mobile money).

Amafaranga ntarengwa ahererekanywa kuri telephone yazamuwe agezwa kuri 1,500,000Frw ku bafatabuguzi b’ikiciro cya mbere na 4,000,000Frw ku b’ikiciro cya kabiri.

Mu Rwanda, iyi ndwara yasubitse inama mpuzamahanga zigera kuri 20 zari kwinjiza ku bukungu bw’iki gihugu imari igera kuri miliyoni $8 nk’uko biherutse gutangazwa n’ikigo gishinzwe ibi bikorwa.

Coronavirus imaze gutuma hari abantu ku giti cyabo basubika bimwe mu bihuza abantu benshi, nk’ubukwe n’ibitaramo, byari bibeshejeho abantu bamwe bakura amafaranga mu gutanga serivisi.

Minisiteri y’ubuzima mu Rwanda imaze kubarura abantu bagera kuri cumi n’umwe (11) banduye icyorezo cya coronavirusi (COVID19), igakomeza gusaba abaturarwanda gukomeza gukazaingamba zo kuyirinda, bagendera ku mabwiriza itanga.

U Rwanda rwafashe ingamba zirimo gufunga amashuri, insengero n’ibikorwa bihuza abantu benshi ndetse abakozi bashishikarizwa gukorera mu mu ngo aho bishoboka no kugabanya ingendo mu gukumira ikwirakwira rya Coronavirus.

Inzego z’ubuzima zitanga inama ko ugaragaweho ibimenyetso bya Coronavirus yakwihutira guhamagara umurongo utishyurwa wa 114 cyangwa akitabaza umujyanama w’ubuzima umwegereye.

OMS yemeje ku wa 11 Werurwe 2020 ko Coronavirus ari icyorezo cyugarije Isi bitewe n’uburyo umubare w’abandura iyo ndwara wiyongera ubutitsa, kuva yaboneka mu Bushinwa mu Ukuboza 2019.

Coronavirus imaze guhitana abantu 8,790, mu gihe abayanduye magingo aya bagera ku 213,541, muri bo 84,314 barayikize.


Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO