Polisi iraburira abanyarwanda kwitondera ababashuka bitwaje Coronavirus

Polisi y’u Rwanda irasaba abaturarwanda kuba maso bakitondera abantu bashobora kwitwaza ibihe turimo bakabashuka bababwira ko bafite ubushobozi n’ububasha byo kubaterera imiti mu mazu, imiti bavuga yica virusi ya Korona (Coronavirus).

Umuvugizi wa Polisi y’u Rwanda Commissioner of Police (CP) John Bosco Kabera avuga ko kugeza ubu nta muturage uratanga ikirego kijyanye n’abo bantu ariko ku mbuga nkoranyambaga byatangiye kugaragara ko bahari. Ari nayo mpamvu akangurira abaturarwanda kuba maso kandi bagatanga amakuru igihe bahuye n’abo bantu.

Yagize ati: “Ku mbuga nkoranyambaga haherutse kugaragara abantu bavuga ko hari amatsinda y’abantu barimo kugenda bavuga ko boherejwe na leta cyangwa bahawe na leta akazi ko kugenda batera imiti mu mazu yica virusi ya Korona (Coronavirus).”

CP Kabera yavuze ko hari abantu bahuguwe kandi bafite ibyangombwa barimo koherezwa na minisiteri y’ubuzima ifatanyije na Polisi y’u Rwanda barimo kujya mu ngo z’abantu bamaze kugaragarwaho iriya ndwara bakajya kubaterera imiti mu mazu.

Ati: “Hari abantu bahuguwe na leta barimo kujya mu ngo zavuyemo abantu basuzumwe bagasanga bafite ibimenyetso bya coronavirus, abo bantu ni intumwa za minisiteri y’ubuzima. Hari abandi bantu rero bashobora kuba barimo kugenda babiyitirira, niyo mpamvu dusaba abaturage gushishoza.”

Yakomeje asaba abantu kwihutira gutanga amakuru ku nzego z’ibanze cyangwa ku nzego z’umutekano igihe babonye abandi bantu bagenda biyitirira inzego za leta bagamije gushuka abaturage.

Bakaba bahamagara imirongo itishyurwa ariyo 114 ku kintu cyose kijyanye na Coronavirus cyangwa bagahamagara kuri 112 igihe bakeneye ubufasha bwihutirwa muri Polisi y’u Rwanda.

Umuvugizi wa Polisi y’u Rwanda yaboneyeho kongera guhumuriza abaturarwanda abasaba kudakuka umutima. Avuga ko Polisi y’u Rwanda n’izindi nzego babari hafi kugira ngo bagumane umutuzo n’umutekano kandi abaturarwanda bagasabwa gutanga amakuru y’ikintu kidasanzwe babonye aho kumva ibihuha.

Itegeko Nº68/2018 ryo ku wa 30/08/2018 riteganya ibyaha n’ibihano muri rusange mu ngingo ya 174 ivuga ko umuntu wese wihesha umutungo w’undi, imari ye yose cyangwa igice cyayo mu buryo bw’uburiganya yiyitiriye izina ritari ryo cyangwa umurimo adafitiye ububasha cyangwa akizeza icyiza cyangwa agatinyisha ko hari ikibi kizaba, aba akoze icyaha.

Iyo abihamijwe n’urukiko, ahanishwa igifungo kitari munsi y’imyaka ibiri (2) ariko kitarenze imyaka itatu (3) n’ihazabu y’amafaranga y’u Rwanda atari munsi ya miliyoni eshatu (3.000.000 FRW) ariko atarenze miliyoni eshanu (5.000.000 FRW).

Ingingo ya 276 ivuga ko umuntu wese uhimba cyangwa uhindura mu buryo ubwo ari bwo bwose inyandiko cyangwa ikindi kintu cyanditseho igitekerezo, ashyiraho umukono cyangwa igikumwe bitari byo, yonona inyandiko cyangwa imikono, asimbuza abantu abandi, ahimba amasezerano, imiterere y’ingingo zayo, igitegetswe gukorwa cyangwa icyarangije kwemeranywa, aba akoze icyaha.

Umuntu wese, ku bw’uburiganya, wandika, wandikisha ibintu bidahuye n’ukuri cyangwa ukora imenyekanisha ritari ryo afatwa nk’uwakoze icyaha cyo gukora ibihimbano. Iyo abihamijwe n’urukiko, ahanishwa igifungo kitari munsi y’imyaka itanu (5) ariko kitarenze imyaka irindwi (7) n’ihazabu y’amafaranga y’u Rwanda atari munsi ya miliyoni eshatu (3.000.000 FRW) ariko atarenga miliyoni eshanu (5.000.000 FRW) cyangwa kimwe gusa muri ibyo bihano.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO