U Rwanda rwahagaritse ingendo z’indege ziva n’izijya mu mahanga

Leta y’u Rwanda yafashe icyemezo cyo guhagarika ingendo z’indege ziva n’izijya mu mahanga harimo n’iza kompanyi ya Rwandair, guhera kuri uyu wa 19 Werurwe 2020.

Iki cyemezo kizamara iminsi 30 cyagize u Rwanda igihugu cya mbere mu karere gihagaritse ingendo zose z’indege zitwara abantu ziva cyangwa ziza mu gihugu kubera icyorezo cya Coronavirusi gikomeje kuzahaza isi.

Minisiteri y’ubuzima mu Rwanda ariko yavuze ko indege z’ubwikorezi bw’ibintu (cargo) zo zizakomeza ingendo zazo mu Rwanda.

Ibindi bihugu binyuranye byo byatangaje ko bihagaritse ingendo z’indege ziva cyangwa zijya mu bihugu bimaze kugeramo iyi ndwara.

Kuri uyu wa kane tariki ya 19 Werurwe 2020, nibwo ubuyobozi bwa Rwandair bashyize hanze itangazo rivuga ko bagiye guhagarika ingendo zose z’ubucuruzi bashingiye ku mabwiriza ya minisiteri y’ubuzima yo gukumira no kwirinda Coronavirusi, iki cyemezo kikazamara iminsi 30.

Gusa kugeza ubu ibihugu 176 ku isi, na 32 muri 54 bya Afurika bimaze kugeramo iyi ndwara, bisobanuye ko ingendo z’indege ziri kugenda zihagarikwa hose.

Ihagarikwa ry’ingendo z’indege mu Rwanda ni icyemezo gifite ingaruka ku bikorwa by’abantu bwite n’ubukungu muri rusange, gusa ni icyemezo bamwe bagaragaje ko gikwiye muri ibi bihe.

Kompanyi z’indege nka Brussels Airlines, KLM, Kenya Airways, Jambo Jet, Qatar Airways, Ethiopian Airlines n’izindi zisanzwe zigwa zikanahaguruka mu Rwanda buri munsi.

Brussels Airlines yari iherutse gutangaza ko izakora urugendo rwayo rwa nyuma i Kigali uyu munsi tariki 19/03/2020 igasubika izindi kugeza mu kwa kane, mu kwirinda ikwirakwira ry’iyi ndwara.

Mu Rwanda, iyi ndwara yatumye hasubikwa inama mpuzamahanga zigera kuri 20 zari kwinjiza ku bukungu bw’igihugu imari igera kuri miliyoni $8 nk’uko biherutse gutangazwa n’ikigo gishinzwe ibi bikorwa.

Rwandair yahagaritse ingendo z’ubucuruzi mu gihe cy’iminsi 30
Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO