Covid-19: Premier League yahinduye uburyo yasubikagamo imikino

Amakipe yo muri shampiyona ya Premier League agomba kwerekana ko afite nibura abarwayi bane ba Covid-19 kugirango umukino usubikwe nk’uko byatangajwe n’ubuyobozi bwa Premier League kuri uyu wa gatatu.

Uyu mwanzuro ufashwe nyuma y’uko hari hamaze gusubikwa imikino 22 kuva mu Ukuboza 2021, kubera iki cyorezo. Iri tegeko rizatangira kubahirizwa guhera tariki ya 5 Gashyantare, ku mukino Burnley izakiramo Watford.

Mu itangazo Premier League yasohoye yavuze ko aya mategeko yashyizweho mu rwego rwo kurengera imibereho y’abakinnyi n’abandi bagize amakipe, no gukomeza ubusugire bwa siporo.

Mu busanzwe, amakipe yashoboraga gusaba ko umukino usubikwa mu gihe yabaga adafite abakinnyi 13 bameze neza ndetse n’umuzamu.

Ariko, hakaba hari amakipe yabyitwazaga akabariramo n’abakinnyi bavunitse ndetse n’abitabiriye imikino y’igikombe cya Afurika nkuko byagiye bigaragazwa cyane n’andi makipe.

Mu ntangiriro z’uku kwezi, Tottenham yavuze ko batunguwe cyane n’icyemezo cyo guhagarika umukino wabo na Arsenal, wari uteganyijwe kuba tariki ya 16 Mutarama uyu mwaka.

Icyakora, The Gunners yari ifite abakinnyi bane mu mikino ya AFCON, n’abakinnyi bafite imvune benshi, ndetse n’abarwaye Covid-19, bahise basaba ko umukino wasubikwa.

Ubuyobozi bw’iyi shampiyona kandi bwavuze ko icyemezo cya Covid-19 cyasabwaga abafana ku mukino kitazongera gusabwa, gusa bakazajya basabwa kwambara agapfukamunwa.

Amakipe yo muri Premier League yasabwe kugira abarwayi 4 ba Covid19 kugirango umukino usubikwe.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO