Amakuru avugwa ku mugabane w’I Burayi ni menshi ndetse amakipe atandukanye akomeje kuvugwamo inkuru zitandukanye,mu bijyanye n’igura n’igurisha ry’abakinnyi.
Amakuru arimo kuvugwa cyane ni uko kizigenza Cristiano Ronaldo w’imyaka 37 y’amavuko ngo ashobora gusohoka mu ikipe ya Manchester United akerekeza mu ikipe ya Chelsea aho kuri ubu bivugwa ko ushinzwe ku mushakira amakipe ariwe Mendez ngo yaba yatangiye ibiganiro n’ikipe ya Chelsea mu ibanga rikomeye cyane.
Ku rundi ruhande ariko ikipe ya Westham United biravugwa ko umwanya wose ishobora gutangaza ko yasinyishije umukinnyi Lukas Paqueta ukomoka mu gihugu cya Brazil ndetse uyu mukinnyi yifujwe bikomeye n’ikipe ya Arsenal kugirango abe yayerekezamo gusa birangiye ari mu miryango yinjira muri Westham.
Ikipe ya Arsenal kandi nyuma yo kubasha gutsinda imikino 4 yikurikiranya ndetse ikaba inayoboye shampiyona y’Ubwongereza kuri ubu ikipe y’umutoza Mikel Arteta noneho ngo yamaze kwerekeza amaso yose ku mukinnyi w’imyaka 29 y’amavuko ukinira ikipe ya Crystal Palace ariwe Wilfried Zaha.
Ni mu gihe kandi ikipe ya manchester United y’umutoza Ten Hag nayo mu masaha make ishobora gutangaza ko yamaze kumvikana n’umukinnyi Antony aho bivugwa ko ashobora gusinyira iyi kipe kuri miliyoni 100 z’Amayero.
