Cristiano Ronaldo yakuye Messi ku rutonde rw’umukinnyi wa mbere uhembwa agatubutse ku isi

Rutahizamu w’ikipe ya Manchester United, Cristiano Ronaldo yamaze gukura mukeba we w’ibihe byose Lionel Messi ku mwanya wa mbere w’umukinnyi uhembwa agatubutse kurusha abandi ku isi.

Cristiano Ronaldo w’imyaka 36 aherutse kujya mu ikipe ya Manchester United avuye muri Juventus mu kwezi kwa Kanama aho yari amaze imyaka 12 avuye muri United ndetse yasubiye muri iyi kipe Messi nawe amaze iminsi mike asezeye kuri Barcelona yinjira mu ikipe ya Paris St Germain.

Amakuru dukesha urubuga rwa Forbes rumenyerewe mu gukora intonde z’abaherwe ku isi, avuga ko Cristiano Ronaldo ari ku rutonde rw’ibyamamare muri siporo bikunzwe cyane aho akurikirwa n’abantu basaga miliyoni magana atanu (500,000,000) ku mbuga nkoranyambaga ze harimo Instagram, Facebook na Twitter.

Kuba akurikirwa n’abantu benshi ku mbuga nkoranyambaga bimwinjiriza amafaranga menshi kuburyo byitezwe ko azinjiza miliyoni 125 z’amadolari ya Amerika mbere y’uko yishyuzwa imisoro y’umwaka wa 2021-2022.

Aya mafaranga azinjiza haziyongeraho n’umushahara wa miliyoni 70 z’amadolari ya Amerika azahembwa na Manchester United n’utundi duhimbazamusyi azabona.

Byitezwe ko azabona andi mafaranga menshi cyane higanjemo ayo ahembwa n’inganda yagiranye nazo amasezerano yo kwamamaza nka Nike, Herbalife, Clear ukongeraho amafaranga atagira ingano akura mu ruganda rwe rw’imyenda n’inkweto ruzwi ku izina rya CR7.

Amakuru dukesha urubuga rwa Forbes, avuga ko umwaka ushize Messi ariwe wari umukinnyi wa mbere mu mukino w’umupira w’amaguru uhembwa agatubutse ku isi aho yabonaga umushahara ungana na miliyoni 75 z’amadolari ya Amerika.

Kuri uyu mushahara wa Messi hiyongeraho miliyoni 35 z’amadolari ya Amerika akura mu kwamamaza n’ibindi bikorwa bitandukanye akora bigatuma yinjiza akayabo ka miliyoni 110 z’amadolari ya Amerika.

Ikipe ya Paris St Germain niyo ifite abakinnyi benshi bagaragara kuri uru rutonde rwakozwe na Forbes, aho ku mwanya wa gatatu hagaragara Neymar uheruka gusinya amasezerano mashya n’iyi kipe azarangira mu mwaka wa 2025 aho azahembwa akayabo ka miliyoni 95 z’amadolari ya Amerika.

Dore uburyo urutonde rw’abakinnyi icumi b’umupira w’amaguru bahembwa agatubutse kurusha abandi ku isi ruteye :

1. Cristiano Ronaldo

Umushahara: Miliyoni 125 z’amadolari ya Amerika ku mwaka

2. Lionel Messi

Umushahara: Miliyoni 110 z’amadolari ya Amerika ku mwaka

3. Neymar

Umushahara: Miliyoni 95 z’amadolari ya Amerika ku mwaka

4. Kylian Mbappe

Umushahara: Miliyoni 43 z’amadolari ya Amerika ku mwaka

5. Mohamed Salah

Umushahara: Miliyoni 41 z’amadolari ya Amerika ku mwaka

6. Robert Lewandowski

Umushahara: Miliyoni 35 z’amadolari ya Amerika ku mwaka

7. Andres Iniesta

Umushahara: Miliyoni 35 z’amadolari ya Amerika ku mwaka

8. Paul Pogba

Umushahara: Miliyoni 34 z’amadolari ya Amerika ku mwaka

9. Gareth Bale

Umushahara: Miliyoni 32 z’amadolari ya Amerika ku mwaka

10. Eden Hazard

Umushahara: Miliyoni 29 z’amadolari ya Amerika ku mwaka

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO