Cyera kabaye hagiye gushyirwaho ikigega cyo kunganira abahanzi

Minisiteri y’urubyiruko kubufatanye n’urwego rw’Igihugu rw’imiyoborere (RDB) barimo gusesengura neza umushinga wo gutangiza ikigega gihoraho kigamije gufasha abahanzi mu bikorwa byabo bitandukanye bya buri munsi bifite aho bihuriye n’Umuco Nyarwanda.

Inkuru dukesha Inyarwanda ivuga ko uyu mushinga watangajwe mu nama ngishwanama ku iteganyabikorwa ry’imyaka itanu kuva 2022 kugeza mu mwaka wa 2027.

Iyi nama yabereye muri Lemigo Hotel, kuri uyu wa 26 Mata 2022, iyi nama kandi yari yitabiriwe n’abakozi b’ibigo bya Leta hamwe niby’abikorera ku giti cyabo byose bifitanye isano n’Inganda Ndangamuco.

Hanitabiriye kandi abahanzi batandukanye babarizwa mu inama y’Igihugu y’abahanzi (RAC), abahagarariye inganda ziri mu ruganda ndangamuco, abakinnyi ba filimi n’abandi batandukanye.

Iyi nama yari ishingiye ku nsanganyamatsiko igira iti ’’We are connected by creactivity" bisobanura mu kinyarwanda ngo " Duhujwe n’inganzo ".

Mu mwaka wa 2015 nibwo inzego za Leta zagize igitekerezo cyo guhuriza hamwe abahanzi kugirango bagire uruvugiro.

Umuyobozi w’Umuco muri Minisiteri y’urubyiruko n’Umuco bwana Aimable Twahirwa yavuze ko bagize igitekerezo cyo gushyiraho ikigega cy’amafaranga azabafasha gushyira mu bikorwa imishinga iteza imbere abahanzi.

Uyu muyobozi yakomeje atangaza ko iki kigega cyashyizweho na Minisiteri y’Umuco n’urubyiruko ku bufatanye n’urwego rw’Igihugu rw’iterambere (RDB).

Bwana Twahirwa kandi akomeza avuga ko kuri ubu harimo kurebwa uburyo iki kigega cyatangizwa n’amafaranga kigomba gutangirana gusa ngo amafaranga agomba kuba ari muri iki kigega aracyari ubwiru.

Ni ikigega kizafasha cyane abahanzi mu guhashya abagizweho ingaruka n’icyorezo cya Covid-19, ndetse bakarushaho no gukora imishinga yabo kuburyo bunoze.

Iki kigega kandi ngo kizafasha abahanzi bose ariko ngo hari amabwiriza azashingirwaho kugirango umuhanzi ahabwe amafaranga.

Umuhanzi Intore Tuyisenge usanzwe ari n’umuyobozi w’urugaga rw’abahanzi nawe wari witabiriye iyi nama yatangaje ko iki kigega cyari gikenewe ndetse ngo kigiye gufasha abahanzi kwiteza imbere.


Umuhanzi Tuyisenge Intore nawe yitabiriye iyi nama

Tuyisenge kandi yakomeje avuga ko abahanzi bo mu Rwanda bataragera ku rwego aho umuhanzi ashobora kugeza umushinga wa alubumu ye kuri Banki ngo imubere ingwate bityo abe yahabwa inguzanyo.

Umuyobozi mukuru wungirije w’intebe y’Inteko ushinzwe guteza imbere Umuco n’Ururimi rw’Ikinyarwanda bwana Uwilingiyimana Jean Claude yatangaje ko Leta yifuza ko Ubuhanzi bugaragara nk’umwuga utunze ba nyirawo.

Kuri ubu muri raporo yakozwe bigaragara ko ubuhanzi bufite impuzandengo ya 10% ku musaruro mbumbe w’Igihugu.

Iyi nama kandi yari yitabiriwe n’umuyobozi mukuru wa Genesis Tv , Madame Marie France Niragire.

Umuyobozi mukuru wa Genesis Tv, Madame Marie France Niragire

AMAFOTO: Inyarwanda

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO