Cyusa N’Inkera mu bitaramo bizenguruka umugabane w’Uburayi

Umuhanzi mu njyana Gakondo Cyusa Ibrahim n’Itorero rye Cyusa n’Inkera, batanze integuza ku bitaramo benda gukorera mu bihugu binyuranye byo ku mugabane w’Uburayi.

Cyusa ni umuhanzi ukunzwe cyane mu njyana Gakondo wabishimangiye umwaka ushize ubwo yatwaraga igihembo cy’umuhanzi w’umugabo w’umwaka (Male Artist of the year) mu bihembo bya ’Made in Rwanda’.

Cyusa Ibrahim aganira na Genesisbizz yemeje ko koko ibi bitaramo babifite, dore ko atari ubwa mbere babikorerayo,nubwo usanga umuziki gakondo baba barawubuze bitewe n’uko hakunze kujyayo abahanzi baririmba indirimbo z’iki gihe.

Cyusa yagize ati: “ni igitaramo cya Gakondo twifuza gutumiramo abantu, usanga abakiri bato baririrmba gakondo hariya abari bacye, baba bakeneye umuntu ujyayo akabibutsa indirimbo z’aba cyera ndetse nk’anabaririmbira n’izanjye nyinshi mfite.”
Cyusa N’Inkera aho baririmbiye benshi basabwa n’akanyamuneza
Muri ibi bitaramo bizazenguruka mu Burayi, Cyusa avuga ko nta bandi bahanzi bifuje kuzakorana nabo, uretse itorero ‘Cyusa N’Inkera’ cyane ko ubwo baheruka gutaramira mu Bubiligi babonye abantu benshi cyane bari bafite inyota yo gutaramana nabo.

Cyusa akomeza avuga ko birinze gutumira abandi bantu kugira ngo umwanya utazababana muto bitewe n’uko abantu babakunda cyane, bityo bigatuma bakenera igihe gihagije cyo gutaramana nabo.

Ibi bitaramo byiswe ‘Cyusa N’Inkera Europe Tour’ bizahera mu gihugu cy’Ububiligi, hakurikireho mu gihugu cy’Ubusuwisi, bakurikizeho Ubuholandi ubundi baherukire ku gihugu cy’Ubufaransa.

Cyusa akunzwe cyane n’abatari bacye mu ndirimbo zikomeye ku muco nyarwanda nka “Migabo”, “Nkunda u Rwanda”, “Mbwire nde”, “Umutako” n’izindi nyinshi.

Biteganyijwe ko ibi bitaramo bizaba hagati y’amatariki ya 14 Werurwe 2020 kugeza tariki 28 Werurwe 2020.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO