Usengimana Danny ntiyahamagawe mu ‘Amavubi’ kubera ko afite ubukwe

Ku munsi wejo kuwa gatatu, nibwo abatoza b’ikipe y’igihugu Amavubi bayobowe na Mashami Vincent, bahamagaye abakinnyi bazifashisha bari gushaka itike y’igikombe cya Afrika. Mubatarahamagawe harimo umwataka Danny Usengimana ho umutoza yavuze ko impamvu ari ukumuha akaruhuko kugirango yitegure ubukwe.

Ni mu kiganiro n’abanyamakuru cyabereye ku cyicaro gikuru cya FERWAFA i Remera, cyari kitabiriwe na Mashami Vincent, umunyamabanga wa FERWAFA Uwayezu Francois Regis, na Rutayisire Jackson nk’ushinzwe ubuzima bw’ikipe y’igihugu bwa buri munsi (Team manager) ndetse na Rurangayire Guy ushinzwe Siporo muri Minisports.

Umukino ubanza uzaba tariki ya 14/11/2020, ubere mu gihugu cya Cape Verde, mu gihe umukino wo kwishyura uzabera i Kigali tariki ya 17/11/2020, bisobanuye ko aba bakinnyi nibava muri Cape Verde bazagumana mu mwiherero bategura umukino wo kwishyura.

Umutoza w’ikipe y’igihugu Amavubi yabajijwe impamvu umukinnyi Danny Usengimana ari ku rutonde rwo gutegereza kandi muri shampiyona iheruka yari umwe mu bakinnyi bameze neza ndetse banatsinze ibitego byinshi.

Mu gusubiza umutoza Mashami Vincent yavuze ko Danny Usengimana uretse kuba afite ubukwe vuba ari umukinnyi mwiza ariko ugereranyije n’ubusatirizi bakeneye muri aya marushanwa yo gushaka itike y’igikombe cy’Afurika utamuhamagara mbere y’abandi ariko agomba kuzaba ayoboye ubusatirizi bw’ikipe ya CHAN.

Yagize ati” Danny Usengimana ni umukinnyi mwiza kandi w’umuhanga, ariko ugereranyije n’ubusatirizi dufite mu ikipe ya CAN biragoye ko yahamagarwa mbere y’abandi, gusa mu ikipe ya CHAN nta kabuza agomba kuzaba ayoboye."

Yakomeje ati” ikindi kandi murabizi mwese ko Danny Usengimana afite ubukwe mu minsi ya vuba, ibyo rero byatumye tumuha umwanya ngo abanze yitegure ubukwe bwe, narangiza kwagura umuryango tuzamuha umwanya, ni nabyiza ko yabitubwiye mbere, rero twamuhaye umwanya."

Danny nubwo atagaragaye ku rutonde rw’abakinnyi 37 bahamagawe mu mwiherero ariko ari ku rutonde rw’abakinnyi 11 bahamagawe bagomba gutegereza ko bashobora kwifashishwa mu gihe muri 37 hari uwagira ikibazo.

Danny Usengimana rutahizamu wa APR FC afite ubukwe kuri uyu wa Gatandatu tariki 8 Ukwakira 2020 n’umukunzi we N.Francine nkuko impapuro zimenyesha ubukwe zibivuga.

Mashami Vincent Umutoza w’ikipe y’igihugu

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO