Dore Ibibazo 15 wabaza umuntu ushaka gutereta mbere y’uko mukundana

Iyo uhuye n’umuntu bwa mbere amaso yawe akamushima, mbere y’uko utangira kumutereta ngo abe umukunzi wawe muzagire n’aho mwiyemeza kurushinga mukabana, hari ibibazo byinshi ukwiye kumubaza kugirango mwembi mubanze kumenyana.

Muri iyi nkuru tugiye kugaruka ku bibazo ushobora kubaza umuntu mbere y’uko utangira kumutereta ngo mukundane kuko bizagufasha kugira ibihe byiza mu Rukundo ugiye kujyamo.

1. Ese wifuza kubyara abana ?
Kubyara no kurera abana si ibya buri wese, bamwe babifata nk’impano. Niba wowe wifuza kubyara abana uwo wifuza gutereta akaba adashaka abana ndetse adakozwa ibyo kubyara, nimukundana bikagera kure bizarangira umubano wanyu ujemo agatotsi.

Hari igihe wasanga nta gahunda yo kubyara abana afite ashaka ko mukundana gusa, akaba kuri we yumva igihe cyo kubyara kitaragera.

Nibyiza ko uhagarika umubano mu maguru mashya niba ubona uwo wifuza gutereta mudahuza imyumvire ku bijyanye no kubyara.

2. Uri umunyedini ?
Benshi mu bakundana birashoboka cyane ko bashobora gukundana kandi badahuje idini n’imyememerere, gusa ariko hari umuntu udashobora kugukunda keretse muhuje idini.

Nibyiza ko mbere yo kujya mu Rukundo n’umuntu ubanza kumubaza aho ahagaze n’imyumvire ye mu bigendanye n’amadini.

3. Gushyingiranwa ubifata gute ?
Gushyingiranwa imbere y’Imana n’amategeko hari ababifata nk’ikintu cya ngombwa cyane, gusa uyu munsi hari n’abatabyemera na gato, uzumva hari n’imvugo nyinshi zateye ngo ‘’ nta gikwe ‘’ aho umuntu ayikoresha ashaka kuvuga ko adateganya gukora ubukwe.

Ni byiza kumenya niba uwo wakunze afite gahunda yo gukora ubukwe cyangwa ntayo afite.

4. Ukunda akazi ?
Benshi muri twe tumara umwanya munini cyane mu kazi ka buri munsi, Ni byiza ko mbere yo gukundana n’umuntu umenya niba ari umuntu ukunda gukora cyane ndetse ukitegura kwihanganira kuzajya uhabwa akanya gato ko kubana nawe kuko umwanya munini awumara mu kazi ke.

Ese witeguye gukundana n’umuntu watwawe n’akazi ?

5. Ese ufitanye umubano mwiza n’ababyeyi bawe ?
Mbere yo gukundana n’umuntu muhuye bwa mbere, uzamenye ko uburyo afata ababyeyi be nawe niko azagufata nimumara kubana.

Niba uwo muntu abana n’ababyeyi be neza kandi abitaho, nawe azakwitaho kandi agufate neza, gusa niba atita ku babyeyi be, hari ibyago byinshi ko nawe atazakwitaho.

6. Ucunga gute umutungo wawe ?
Benshi mu bakundana usanga bakunda kugira ibibazo bijyanye n’ubwumvikane buke bugendanye n’amafaranga.

Mbere yo gukundana n’umuntu ni byiza kumenya ko agira gahunda mu gucunga umutungo we kuburyo nimubana bitazabateranya.

7. Ese waba uteganyiriza amasaziro yawe ?
Nibyiza kubaza umuntu wifuza gukundana nawe inzozi afitiye ubuzima bwe bwo mu masaziro ndetse ukamubaza niba hari icyo yahateganyirije.

Abahanga bavuga ko ntagihe ntarengwa cyo gutangira guteganyiriza amasaziro yawe, n’uyu munsi watangira kwizigamira ugifite imbaraga.

8. Ese waba ufite umwanya w’urukundo mu buzima bwawe ?
Hari abantu bajya aho ibintu biberekeje hose bakajya mu bintu byose ubuzima bubajyanyemo ukuyemo kuba yajya mu rukundo.

Hari abantu usanga bajya gusura inshuti zabo, imiryango yabo, bakajya gukora imyitozo mu nzu zabugenewe (gym), agakora akazi ka buri munsi, akagira n’ibindi akunda nko gucuranga ariko akaba nta mwanya wo gukundana agira mu buzima bwe.

Nibyiza ko nyuma yo kumenyana n’umuntu, umwiga neza ukamenya niba hari umwanya afite wo gukundana cyangwa ahora mu bindi bintu ariko adashishikajwe n’urukundo.

9. Waba ukinira ikipe runaka ya siporo ?
Abantu benshi bakunda gukina imikino ya siporo ariko bakinira ikipe runaka usanga akenshi ari abantu bakunda gusabana n’abandi kandi bakaba bahorana akanyamuneza.

Nibyiza kumenya ko umuntu wifuza gukundana nawe afite indi mirimo akora nko gukinira ikipe runaka ndetse ukamenya umwanya bimutwara ukamenya niba abiha umwanya munini ukabimwubahira kandi ntibizakubangamire.

10. Waba warisuzumishije indwara zandurira mu mibonanompuzabitsina ?

Iki ni ikibazo ukwiye kubaza umuntu wifuza gukundana nawe mbere y’uko urukundo rwanyu rugera kure.

Igisubizo cyiza ni ugukomeza kwirinda kugeza umunsi muzabana kuko niyo yaba arwaye izi ndwara ashobora kutakubwiza ukuri.

11. Ese unywa itabi ?
Itabi ryangiza ubuzima kuburyo na ba nyiringanda barikora babyandika inyuma ku gifuniko cyaryo.

Nibyiza kumubaza niba anywa itabi ndetse ukamenya umwanzuro ufatira urukundo washaka kujyamo, niba utakwihanganira umuntu unywa itabi, ubwo uwo uzamutakaza ushake urundi rukundo rushya.

12. Ese unywa inzoga ?
Niba ukunda gusohoka ukanywa inzoga ariko inshuti yawe wifuza gukundana nayo ikaba idakunda gusohoka, nibyiza kuyibaza niba uburyo usohoka ukajya gusangira n’abandi inzoga bimubangamira, icyo gihe uzamenya uko witwara, ibyo ukwiye kugabanya cyangwa gukosora.

Nibyiza kubaza inshuti yawe niba inywa inzoga cyangwa itazinywa kugirango umenye uko uzitwara.

13. Ese hari ibiyobyabwenge runaka waba ukoresha ?
Kugeza uyu munsi, hari ibihugu byinshi ku isi byemera ikoreshwa ry’urumogi ku buryo ushobora kurugura ukarunywa.

Amakuru dukesha urubuga rwa Curlytales avugako mu bihugu nka Jamaica, Costa Rica, Canada na Uruguay kunywa urumogi byemewe n’amategeko ndetse uyu munsi aho bitemewe usanga barunywa rwihishwa.

Mu gihe umenyanye n’umuntu, ni byiza kumenya niba hari ibyobyabwenge runaka akoresha kugirango bitazabangamira umubano wanyu niba wowe ntabyo ukoresha cyangwa se niba mwese mwemera kubikoresha bikaba byabahuza.

14. Ni ubuhe buryo bwiza wahitamo bwo kuboneza urubyaro ?
Benshi iyo baboneza urubyaro bakoresha uburyo bwa Kamere, hakaba abakoresha ibinini, udupira n’udukingirizo.

Gusa niba ufite umuntu wakunze wifuza ko mujyana mu Rukundo, nibyiza gutangira kumuganiriza ku buryo bwiza bwo kuboneza urubyaro mwembi mushobora gukoresha kugirango umunsi mwabanye umwe atazategeka undi ko ariwe ugomba kuboneza urubyaro gusa bikaba byabaviramo amakimbirane.

Nibyiza kuganira uburyo bwiza bwo kuboneza urubyaro wowe n’umukunzi wawe muzakoresha.


15. Utekereza ko umutungo ukwiye gusaranganywa gute hagati y’abakundana ?

Ni byiza ko mbere y’uko urukundo rwanyu rugera kure, ubanza ukamenya imitekerereze y’uwo wifuza gukundana nawe ku bigendanye n’uburyo mugomba gusaranganya umutungo.

Ni byiza kumenya niba yifuza ko muvanga umutungo cyangwa mukazabana mu ivanguramutungo risesuye cyangwa ivanga mutungo muhahano.

Ibi bizabafasha kubana neza bizabarinde intonganya ziturutse ku mitungo.

Imibare dukesha ikigo cy’Igihugu cy’Ibarurishamibare, NISR, ivuga ko 98,1% by’abashyingiranywe imbere y’amategeko mu Rwanda basezeranye ivangamutungo risesuye mu gihe 1,5% basezeranye ivangamutungo muhahano naho 0,4% basezerana ivanguramutungo.

Muri aba bashakana, imibare y’abantu baka gatanya yavuye ku bantu 69 mu 2017 igera ku bantu 1311 mu mwaka wa 2018, ubwo bisobanuye ko umubare w’abatandukana wiyongereye ku ijanisha rya 1900%.

Benshi mu batandukana birashoboka ko batanywa n’ibibazo bashobora kuganira mbere yo gufata umwanzuro wo kubana.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO