Dore uburyo wakoresha kugirango imbaga nyamwinshi y’abantu bakwizere banakubonemo ubunyangamugayo

Ikizere n’ubunyangamugayo ni ibintu bijyana cyane ndetse ntawutakwifuza ko abantu babimubonaho, ni byiza ngo ibyo uvuga byose bijyane cyane nuko witwara ndetse byose bishyigikirwe nibyo ukora, ibi byose bizarushaho kukubera inkingi ya mwamba wegamiye, ndetse menya ko ubunyangamugayo hamwe n’ikizere ufitiwe byose bizaguherekeza muri gahunda y’akazi hamwe n’ubuzima bwawe icyarimwe.

Abantu benshi bakunda kubeshya bagenzi babo biciye mu buryo butandukanye, kuvugisha ukuri hamwe no kwimakaza ubunyangamuganyo ni ishingiro ryo kurema ubuzima bwuzuye buzira uburyarya.

Abahanga bemeza ko kuba umuntu yaba inyangamugayo atabitozwa ahubwo arabivukana nkuko byakunze kugaragazwa n’abahanga batandukanye.

Ese niba ubuzima bwawe butarimo ukuri, ikizere cyangwa ubunyangamugayo ubwo ubona bugana he?

Ni iki ukunda kwibaza igihe umukoresha wawe azavumbura ko utari inyangamugayo?

Menya ko byose bisaba kugira umutimanama uzagufasha kumenya aho uva n’aho ugana, Ibi kandi bizashingira ku kubanza wowe ugasobanukirwa icyo ukeneye mu buzima bwawe ndetse ukanamenya uruhare ibi byombi bizagira mu kubaka ubuzima bwawe.

Dore inkingi eshanu zizagufasha bityo abantu bakakubonamo ikizere hamwe n’ubunyangamugayo.

1. Gira iteka ukuri ibyo uvuga bise nibyo abantu babonesha amaso

Umuntu w’inyangamugayo iteka arangwa no kugira ukuri ndetse ikinyoma agikubitira ku mugaragaro, ahora iteka yumva ko nta mpamvu yamutera kubeshya kuko abatekereza ko iteka ukuri gushobora guca mu ziko ariko ntigushye, mu gihe nanone aba azi ko nta mahoro umuntu agira mu gihe abeshya.

Niba kandi ushaka guha umurongo mugari ubuzima bwawe ndetse ukaba ushaka ko abantu bakwita inyangamugayo banza wige kwibwiza ukuri wowe ubwawe.

2. Fata umwanya wo kwitekerezaho wowe ubwawe

Niba urimo kwifuza kuba inyangamugayo, kugirango abantu bakugirire ikizere gerageza ushake umwanya wowe ubwawe ujye ahantu hatuje witekerezeho, maze utangire wowe wibaze ibibazo runaka bijyanye nuwo munsi.

Ukwiye kwibaza niba hari abantu wabeshye uwo munsi ndetse unashake impamvu zose zaguteye kubeshya abo bose wabeshye uwo munsi.

Uzirinde kugira abo ucira imanza uwo munsi ndetse nanone ntuzicire nawe urubanza ahubwo uzarusheho gushaka impamvu nyamukuru zaguteye mu byukuri kugira ubwo buryarya bwo kutavugisha ukuri.

Gerageza uhave wifatiye umwanzuro ndetse nanone bizakubere impamvu nyamukuru yatuma wigira ku makosa maze ukarema imyitwarire mishya iboneye ubuzima bwawe.

3. Hagarika kwigereranya n’abandi

Abantu benshi bakunze gukora amakosa menshi cyane ugasanga aho kuba bo kugiti cyabo bifuza kumera nka runaka, iyo ibi aribyo wubakiyeho ubuzima bwawe usanga iteka utaye indangagaciro zawe ahubwo ugashaka kumera nka runaka.

Iyo wamaze gusobanukirwa ko wowe wihariye mu buryo bwawe bituma urushaho kugenda mu murongo umwe kandi ugororotse ndetse ibi birushaho kukongerera ubunyangamugayo mu buzima bwawe.

4. Hindura imyitwarire yawe

Mu by’ukuri birashoboka ko utajya ukunda kubeshya ariko rimwe na rimwe bikubaho.

Gerageza urusheho gutera intambwe aho naho uharenge urusheho kugana aheza.

Mu by’ukuri menya ko ikinyoma gito n’ikinini byose ntaho bitandukanira niyo mpamvu rero aha bigusaba ngo uhindure imyitwarire yawe bityo urusheho gutera intambwe nziza ikuganisha ku kuba inyangamugayo.

Kuba inyangamugayo ntabwo bivuga ko igihe cyose umuntu ibyo azakubwira byose uzavuga ngo yego, urugero niba umugore wawe arimo kukubaza niba ibiryo biryoshye, ntabwo ugomba kubyemera kandi rwose bibishye gerageza umubwize ukuri umubwire uti birabishye, ndetse ntagushidikanya aha rwose uzaba umubereye inyangamugayo biciye mu kumubwiza ukuri.

Uko rero urushaho kugenda mu nzira igoroye niko uba urimo kugorora inzira zawe ndetse urushaho guhindura imyitwarire yawe.

5. Gabanya iteka guharanira kwemeza abandi bantu

Mbere na mbere zirikana ko mbere ya byose ukwiye kubanza ukikunda mbere yo gukunda abandi nta mpamvu n’imwe iteka yatuma ufata umwanzuro wo kubeshya abantu kugirango barusheho kukwemera.

Menya ko ibi nubikora uzatuma abantu bagufata uko utari baguhe isura utambaye kandi nyuma ibi bizarangira bimenyekanye bityo witwe umwiyemezi, nyuma ikizere n’ubunyangamugayo bakubonyemo bizagenda nka nyomberi.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO