Dore uburyo wakwirinda ubutekamutwe bwo kuri murandasi

Buri mwaka abajura n’abatekamutwe bo kuri murandasi biba amafaranga menshi atagira ingano binyuze mu bikorwa by’ubushukanyi n’ubujura bakora.

Muri iyi nkuru tugiye kwibanda kuri bumwe mu butumwa ukwiye kwirinda bwo kuri murandasi bushobora gutuma wibwa amakuru y’imyirondoro yawe bikaba byagera no kwibwa amafaranga yawe ubika kuri konti za banki.

Turibanda nanone ku mitego aba bajura n’abatekamutwe bakunze gutega abantu kugirango babibe, nuyibona uzayirinde.

1. Ubutumwa buguha akazi
Abatekamitwe n’abajura bo kuri murandasi bashobora kukohereza ubutumwa buguha akazi runaka kandi nyamara utarigeze wandika ibaruwa isaba ako kazi.

Ugomba kwitondera gufungura ubwo butumwa kuko iyo ubufunguye ukuzuzamo imyirondoro yawe bashobora kuyikwiba kuko ihuzanzira unyuramo wuzuza imyirondoro yawe unashyiramo imibare y’ibanga iba irimo gahunda za mudasobwa (spyware) bakoze zishinzwe kukwiba amakuru wandikamo.

Irinde ubutumwa buguha akazi utizeye, birashoboka ko bugamije kukwiba imyirondoro yawe

2. Irinde imbuga zo gushakiraho abakunzi
Abatekamutwe n’abajura bo kuri murandasi ni kenshi bahimba imbuga zo guteretana no gushakiraho abakunzi z’ibihuha ndetse bagashyiraho amafoto y’abasore n’inkumi nziza zireshya abazisura.

Kugirango winjire muri izo mbuga ufungure konti bigusaba kuzuzamo imyirondoro yawe, itondere gushyiramo imyirondoro n’ijambobanga ryawe ukoresha kuko bishobora kwibwa kuko inshuro nyinshi usanga ba nyir’uguhanga izo mbuga barazikoranye gahunda za mudasobwa (spyware) zishinzwe kwiba amakuru wandikamo.

Irinde kwinjiza imyirondoro yawe ku mbuga zo gushakiraho abakunzi kuko zitizewe.

3. Irinde gufungura ubutumwa ubwo aribwo bwose ukemanga
Ku bantu bakunze gukoresha murandasi inshuro nyinshi, mukunda guhura n’ubutumwa runaka akenshi bukubwira ko watsindiye nk’amadolari 10,000 $ , cyangwa ko watsindiye telefone nshya cyangwa buriho izina ry’umukobwa mwiza wakwandikiye ngo ubufungure ubusome.

Nuhura n’ubu butumwa ujye wirinda kubufungura kuko akenshi buza buherekejwe na gahunda ya mudasobwa (spyware) ishobora kwiba imyirondoro yawe yose kuburyo ubikwibye ashobora kubikoresha yinjira muri konti zawe za banki akaba yakwiba amafaranga yose muburyo nawe utazi.

Irinde gufungura ubutumwa bukubwira ko watsindiye ibihembo runaka utizeye.

4. Kwibwa konti y’imbuga nkoranyambaga ukoresha
Abajura n’abatekamutwe bo kuri murandasi bashobora kwiba konti y’umuntu runaka musanzwe muvugana ku mbuga nkoranyambaga bakabikoresha mu nyungu z’abo bwite.

Igihe uzabona nk’umuvandimwe cyangwa indi nshuti yawe ikwandikiye muburyo budasanzwe wenda ikwaka nk’amafaranga menshi ikanaguha nomero zo kuyoherezaho, ujye ubanza ushishoze ndetse unamuhamagare kuri nomero musanzwe muvugana umubaze iby’ubutumwa yakwandikiye agusaba amafaranga.

Hari igihe bishoboka cyane ko ataba ariwe ukwandikiye ahubwo ari uwibye konti ye akoresha ku mbuga nkoranyambaga.

Itondere abantu usanzwe uzi bakwandikira muburyo budasanzwe, birashoboka ko hari ababibye imbuga nkoranyambaga basanzwe bakoresha bakazikoresha bagusaba amafaranga cyangwa ibindi bikorwa by’ubujura.

5. Ubutumwa busaba gufasha abatishoboye
Ni kenshi ushobora guhura n’ubutumwa kuri murandasi bugusaba gutanga inkunga yawe ku kigo runaka gifasha abatishoboye cyangwa abana b’imfubyi.

Ni ukwitondera ibi bigo kuko ibyinshi usanga bitabaho ahubwo ari abantu runaka biyitirira ibyo bigo ndetse n’amafoto bashyiraho akenshi aba ari amahimbano.

Iyo utanze ubufasha akenshi birangira bugiye kuri konti z’aba bajura.

Nukenera gufasha umuntu, uzafashe uwo ubona akeneye ubufasha cyangwa usure ibigo bifasha abantu bizwi bifite n’aho bikorera kandi bifite abo bifasha.

6. Itondere ubutumwa bw’amamaza imiti runaka
Ni kenshi abacuruza imiti kuri murandasi bashobora kukwereka umuti w’igitangaza uvura indwara zananiranye nawe ukifuza kuwugura.

Akenshi kugurira kuri murandasi bisaba kwishyura mbere kugirango bakugezeho ibyo watumye. Akenshi imiti nk’iyi ushobora kuyishyura mbere iguhenze bayikugezaho n’ubundi ugasanga nta kintu igufashije.

Nibyiza kujya kwa muganga wabyigiye akagusuzuma akakwandikira imiti ihuye n’uburwayi yagusanzemo.

7. Ibicuruzwa by’ibyiganano
Ni kenshi ushobora gushakisha igicuruzwa runaka kuri murandasi ukakibona ndetse ukishimira n’uburyo kigaragara ku mafoto ndetse ugakururwa n’uburyo gihendutse cyane.

Akenshi iyo umaze kucyishyura utegereje ko bakikugezaho iwawe murugo, iyo ubonye cya gicuruzwa usanga gitandukanye cyane n’icyo bamamazaga ku ifoto kandi amafaranga yawe uba wamaze kuyishyura.

Nibyiza ko ugurira ku mbuga zo guhahiraho zizewe cyangwa igihe ufite umwanya ukajya kw’isoko kugura ibyo wifuza imbonankubone kuburyo nta muntu waguhangika.

Ibikorwa by’ubutekamutwe n’ubujura bwifashisha ikoranabuhanga birakorwa cyane.

Nibura umwana umwe mu bana icumi yibwa amakuru ye hifashishijwe ikoranabuhanga buri mwaka.

Amakuru dukesha urubuga rwa scamwatch avugako hagati y’umwaka wa 2016-2017 hibwe amafaranga asaga miliyari 5.1 z’amadolari ya Amerika bikorewe mu bujura bwo kuri murandasi

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO