Abegukanye imyanya ya mbere mu irushanwa ’Heads’up Music Competition’ bahuriye mu kiganiro Access 250

Nyuma yo guhiga bagenzi babo mu irushanwa ryiswe Heads’up music competition rytateguwe na Genesis Tv aba bahanzi bombi babashije kongera guhurira mu kiganiro Access 250 ku nshuro ya mbere aho aba bombi bakomeje gushimangira ubushobozi bwabo biciye mu kuririmba indirimbo zitandukanye.

Elie Maniraguha wegukanye irushanwa rya Heads’up music competition agahembwa miliyoni y’amafaranga y’U Rwanda na Genesis TV, Hamwe na Niyibizi Jean Claude wabaye uwa kabiri agahembwa akayabo k’ibihumbi magana atanu bombi bahuriye mu kiganiro ku nshuro ya mbere.

Mu kiganiro Access 250 cyo kuri uyu wa kabiri taliki ya 22 Werurwe nibwo aba bahanzi bombi bongeye guhura dore ko baherukanaga ku munsi wo gusoza irushanwa Heads’up Music Competition baheruka guhuriramo.

Mu kiganiro bagiranye na Genesisbizz batangiye bashimira cyane Genesis TV nyuma yo kubabera urufunguzo rwabashije gufungura impano yabo nyuma y’aho bitwaye neza mu irushanwa Heads’up Music Competition.

Umuhanzi Elie Maniraguha yatangiye agira ati’’impano yanjye yatangiye kera ubwo nari mfite imyaka 13 gusa ndi mu mashuri yisumbuye ntabwo ababyeyi banjye bigeze banyemerera gukora umuziki kuko byatumye ntegereza kurangiza amashuri makuru ya Kaminuza, bihuza n’uko Genesis TV yateguraga irushanwa bimbera impamvu yo gushyira hanze impano yanjye ndetse biranampira nza kuba negukana umwanya wa mbere mvuye mu bantu ijana bari bitabiriye irushanwa ndetse ibi byakomeje kuntera imbaraga.

Uyu muhanzi yemeza ko urugendo rukiri rurerure kuko ikibazo afite kijyanye n’ubushobozi dore ko gukora umuziki yatubwiye ko bisaba gushora amafaranga menshi kandi ntahite akugarukira.

Muri iki kiganiro Access 250 kandi hagaragayemo umuhanzi waje ku mwanya wa kabiri ariwe Niyibizi Jean claude, uyu muhanzi akomatanyije ibintu byinshi kuko ubusanzwe ni umuganga wabigize umwuga dore ko ariko kazi ke ka buri munsi gusa akabifatanya n’umuziki aho yemeza ko byombi abasha kubihuza ndetse akabikora neza kuko abikunda.

Aba bahanzi bose bahuje umuhanzi bafatiraho ikitegererezo dore ko bemeza ko bombi bakunda umuhanzi Bruce Melody ndetse ubutumwa bwabo ni uko umuntu wese ufite impano y’umuziki akwiye kudacika intege ahubwo agakora cyane.


Ellie Maniraguha (Hagati) Niyibizi Jean Claude (Iburyo) na Iyakaremye Theoneste (Ibumoso) nibo begukanye imyanya 3 ya mbere mu irushanwa Heads’up Music Competition umwaka ushize.

Abageze mu kiciro cya nyuma cy’irushanwa hamwe n’umuyobozi mukuru wa Genesis TV.

Ellie hamwe na Jean Michel wamucurangiye mu kiganiro Access 250

Jean Claude acuranga mu kiganiro Access 250

Aba bombi bongeye guhurira mu kiganiro Access 250.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO