Episode 11: Ngiye gufungurira Teta umutima… kirogoya aba araje

Ngihakana nsimbaraye, nkivuga ko uw’ abandi nyir’ umutima mwiza benshi batabasha kurebamo hari uwakomanze Bily yihuta n’ umujinya mwinshi agikingura urugi yarikanze cyane asubira inyuma buhoro buhoro nibaza uwo muntu atinye bene ako kageni uwo ari we.

Hinjiye umugore wari wambaye neza Bily akomeza kugira ubwoba ndetse asubira inyuma yanga guhuza amaso nawe, wa mugore ahita avuga,
We-“Eeh eh eh! Mbega akajagari hano, Bily! Nta soni mu rugo wahagize isibaniro? Wagira ngo ntabwenge ugira bwo gushyira ibintu ku murongo?”
Muri ako kanya nahise menya ko uwo mugore ashobora kuba ari mushiki we, mu gihe nkibyibaza,
We-“Uri se nawe ari muri bagenzi bawe?”
Bily-“Uriya se…uriya nyine ni umusore dusigaye tubana”
We-“Eeeh!”
Nabonye uwo mugore abyakiriye neza ndiruhutsa, ibyo ari byo byose ashobora kuba yarabyifuzaga, yaratambutse aza ansanga aransuhuza,
We-“Uraho neza?”
Njyewe-“Yego turaho”
We-“Ngo usigaye ubana na Bily?”
Njyewe-“Yego”
We-“Imana ishimwe ahari wenda ingeso ze zagabanyuka, nizere ko utameze nkawe utaje kuba hano ngo mukuze ingeso”
Naracecetse sinagira icyo musubiza, ashyira isakoshi yari afite ku meza atangira gushyira ibintu ku murongo.
Sinzi uko yaganye hirya gato mu gikari Bily aza yihuta ambwira buhoro,
Bily-“Songa! Uriya ni sister wanjye, ewana ndamuhabuka bya hatali, buriya agiye kumbaza ibibazo byinshi kandi….”
Njyewe-“Simbona se ahubwo yitonda?”
Bily-“Yitonda yitonda iki? Buriya agiye kumbazaguza ibibazo, ambaze icyo amafaranga nayamajije, ambaze impamvu ntaguze ibyo yansabye….ndumva mbihiwe kabisa, ese ubundi aba aza ajya hehe ko yashatse umugabo?”
Njyewe-“Niba ari mushiki wawe se nyine urumva hano atari iwabo, agomba kuza wa mugani akanareba uko ibintu byifashe?”
Bily-“Reka nagende….”
Njyewe-“Ariko se ingeso zawe yavugaga ni izihe? Ni inziza cyangwa….”
Bily-“Umva nawe ra, uko ubizi se hari uhangayikira ingeso nziza, ni bya bindi byanjye nyine byo kwikundira agacupa n’ abakobwa, kandi biriya bigomba kubaho mu busore bwanjye, we rero abifata nk’ ingeso mbi!”
Njyewe-“Nubundi ariko…..”
Bily-“Nako naza ndamubwiza ukuri ajye ajya kurebe ibyiwe ntabwo ndi umwana we acunga nk’ipine ry’ imodoka ye”
Njyewe-“Oya Bily! Ahubwo tuza kuko kugira amahirwe yo kugira umuntu ukureberera ntako bisa”
Bily-“Wa mugani”
Mushikiwe yaragarutse akomeza kubaza byinshi Bily, ntiyahatinze yahise agenda tumugeza ku motoka turamusezera.
Mu ijoro nakomeje gutekereza ku magambo Bily yari yambwiye ubwo nishimaga imbere ye, nkomeza kwibaza niba kumbwira ko Teta atari mwiza kuri njye byaba bifite agaciro ariko umutima wanjye uranangira wanga kubyakira.
Nongeye gutekereza kandi ku muryango wanjye nkomeza gushaka inzira zose nacamo ngo nsimbukireyo mbasuhuza nduhuke guhangayikira za nzozi narose zankuye umutima.
Agatotsi kansamiye hejuru ndasinzira nongeye gukanguka mu gitondo kare nditegura nerekeza ku kazi gusa mu nzira naguze sim card nyishyira muri telephone njya ku murongo.
Uwo munsi nabonye abakiriya benshi, ndetse ni nabwo bwa mbere nakoresheje ya telephone, uwo nahamagaye bwa mbere nta wundi yari Teta!”
Naramuhamagaye anzanira amafaranga kuko yari anshiranye, ndetse aguma aho ampfasha muri byose.
Abakiriya bagabanutse n’ ubundi bugorobye kandi amafaranga nari mpfite ntabwo nari nemerewe kuyararana nkuko bari babinsabye nagombaga kuyajyana kuri bank yaramperekeje turajyana.
Duhagaze imbere ya Bank…
Teta-“Songa! Sha uyu munsi wakoze pe! Ndizera ko agahimbazamuskyi kazaba ari kenshi!”
Njyewe-“Ni amahirwe nagize ubundi ntibyajyaga bibaho, ahubwo umbabarire nagukereje”
Teta-“Oya ntabwo wankereje, n’ ubundi ahubwo mperekeza niba ntakubangamiye”
Njyewe-“Urumva nakwitesha ayo mahirwe se? Tugende nta kibazo”
Twateranye intambwe tugenda tuganira, byari ishema kuri njyewe kujyana na Teta aho abatubonaga bamwe bahindukiraga, Teta yari umukobwa mwiza bidasubirwaho akarusho kakaba umutima we.
Tukigenda Teta yarikanze nibaza ikibaye,
Teta-“Yeeee? Uziko nari nibagiwe?”
Njyewe-“Wibagiwe? Wibagiwe iki Teta?”
Teta-“Nari nibagiwe ko nta muntu uri mu rugo”
Njyewe-“Eeeh! Nari ngize ngo ahubwo ni ikindi kintu gikomeye gitumye wikanga naho niba ari ibyo ntacyo tube dutembera mu gihe tugitegereje ko bataha”
Teta-“Ushaka kuntembereza se? Ntacyo ubwo ugiye kungurira aka jus nabyumvise,hhhh!”
Njyewe-“Hari ikibazo se? Wowe njyana aho bakuzi badukope nzishyura nahembwe kandi nari narabiteguye”
Namubwiye ibyo kuko nimugoroba Bily yari yabimbwiyeho, ubwo yambwiraga ko kuba Teta yarantoye mubandi ntacyo muhaye, ngomba kuzakimuha nahembwe aya mbere,…
Teta-“Tugende nta kibazo nkwereke aho banzi bagukope, nizere ko nta kwitangira ndafata icyo nshoboye!”
Njyewe-“Nta kibazo rwose, umushahara wanjye se ko nawe uwuzi”
Twasekeye icyarimwe dukomeza kugenda tuganira, twageze ahantu hamwe ahita ambwira,
Teta-“Hano naho ni heza haratuje reka abe ariho twigira”
Twinjiye ahantu hakaga amatara meza, dukomeza inyuma duhinguka ahantu hari hari intebe ebyiri n’ ameza hateguye twakirwa n’ umusore wari wambaye imyenda y’ akazi ahita avuga,
We-“Kalibu Boss na Mabuja we! Murisanga cyane hano ubu habaye iwanyu mugubwe neza”
Twese twasekeye rimwe ntangira kwibaza icyo ndi bufate ako kanya Teta ahita abwira wa musore,
Teta-“Banza wakire uyu njyewe urangeraho nyuma nta kibazo”
We-“Tubakirize iki Boss?”
Njyewe-“Nzani soda nta kibazo…iyo ubonye yose ikonje”
Teta-“Uuuh? None se agasembuye wakavuyeho? Utambwira ko wanze kukanywa kubera njyewe”
Njyewe-“Urebye…nyine buriya akabyeri se….reka ndeke kukubeshya pe! Ni ukubera wowe”
Teta-“Oya Songa! Wikwanga kukanywa kubera njyewe, kuba narakubwiye kuriya kwari ukugira ngo ubutaha ujye umenya aho ugarukira, inywere rwose pe! Nta kibazo”
Ako kanya nahise mpindukira,
Njyewe-“Yizane ikonje vuba vuba iyo umuntu ayitekereje igatinda ushobora kuza usanga yarabiranye”
Uwo musore yahise agenda yiruka dusigara duseka,
Teta-“None se ko agiye utamubwiye iyo ushaka?”
Njyewe-“Nanjye ndore”
Twese-“Hhhhhhh!”
Hashize akanya katari gato dutegereje tumubona atembera ashyize amaboko inyuma ntacyo yitayeho turumirwa,
Teta-“Uuuh? Ariko uriya musore banza atuzuye?”
Njyewe-“Nibyo nanjye nari ngiye kukubwira, buriya nta kantu kadafunze neza mu mutwe?”
Teta-“Reka nze nihamagarire uriya abe ari we utwakira”
Bamaze kutwakira twakomanyije ibirahuri nkubita ku munwa, nakuyeho mbona Teta anyitegereza aramwenyura abona gusoma aratereka,
Teta-“Erega tukaba dupanze gusohoka tutabiteganyije, ese ubundi Songa! Mu buzima ni hehe wasohokeye ukumva urishimye ukaba nubu wumva ushaka kuzasubirayo”
Muri ako kanya naratuje, nitegereza Teta, kari ko kanya keza ko kumubwira ibyanjye byose, njyewe yahaye ikiganza atanzi.
Nigije intebe imbere maze nshinga amaboko kumeza maze nshira amanga ntangira kumubwira,
Teta-“Uyu niwo mwanya mwiza mbonye, ni amahirwe ngiriwe nawe yo gufungura umutima wanjye maze nkakwibira wese, nizeye ko uranyumva nkuko wanyumvise njyenyine muri rwa ruvunganzoka, ubwo nasakuzaga cyane mvuga ngo bampe inzira ngere imbere”
Teta yikije umutima maze atera inkingi itama….nako yitangira itama,
Teta-“Ndakumva Songa ngaho mbwira”
Njyewe-“Teta! Navutse batema amasaka, impengeri naziriye ndi mu nda, navutse ndi umwana wa kabiri nyuma ya mushiki wanjye witwa Mwiza……
Nkivuga ako kanya nakubise amaso umuntu ndamumenya nakubise amaso wa musore wansabye akomeje ko ashaka guhura na Teta bubi na bwiza.
Twahuje amaso ahita ambona aramenya aramwenyura aza adusanga,
We-“Aaaah! Ese ni wowe! Hhhhhh! Na hano se ujya uhamenye?”
Yaradusuhuje atega amaboko,
We-“Oooh! Haguruka umpobere disi, ni ukuri haguruka umpobere wimpereza ikiganza ibyo babyita gukora umuntu imbagara”
Teta koko yarahagurutse aramuhobera ahita ahamagara wa musore w’ umuseriveri twatumye mbere akibagirwa aza yiruka, akihagera,
We-“Yebaba weeee! Nabyibagiwe! Ibyo mwantumye nabyibagiwe ariko ntacyo muze kuntuma ibyo kurya, akabenzi niko nikundira wenda turagasangira”
Twasekeye rimwe wa musore wari utuvundiye…nako aba atwiyunzeho atuma intebe ibyo kunywa no kurya byinshi bizira rimwe, umutima nari nafunguriye Teta nongera kuwufunga………………………………………………

Bakunzi b’ inkuru ndende umwanditsi abifurije weekend nziza! Naho kuwa mbere mu gitondo.

Genesisbizz

Related Articles

Ibitekerezo

  • - Mugabo chantal

    Yooohhh Eddy duhe13

  • - moses

    Eddy courage kbs kuko inganzo urayifite nudacika intege izakugeza kure .

  • - Nyandwi

    Uwo musore arambihirije iyo areka abana bakiganirira njye iyo maze gusoma Episode yumunsi nsubira ku musogongero wayo nkababara turahari abasomyi

  • - Sesonga

    Iyi nkuru ni nziza kurusha izo nasomye zose, eddy uri umuhanga nkwifurije umugisha w’ Imana ahasigaye komereza aho nta kindi navuga

Igitekerezo cyawe kirashyirwaho aruko gisusumwe

TANGA IGITEKEREZO