Episode 15: Teta yongeye kumpumuriza, iryo joro ndara hanze

Njyewe-“Teta! Ubuzima bwose bugira isoko, uko nzabaho kose kwa Bily mu gihe ataransezerera ntacyo bintwaye nzihangana, gukodesha inzu nawe urabizi ukuntu zihenda, umushahara wanjye urawuzi wose wajya unsha mu ntoki ukomeza kwa nyir’ inzu, kandi hari icyo nifuza mbere ya byose Teta”

Teta-“Hari icyo wifuza?”

Njyewe-“Yego hari icyo nifuza kandi ndamutse nkibonye natuza umutima ngakomeza urugamba ariko bene agahinda bakaruhuka intimba”

Teta-“Yoooh! Bene agahinda uvuga ni bande Songa? Niki wifuza iki mbere ya byose? Ntabwo numva ikintu wifuza kuruta kuva kwa Bily ibintu bitaraba ibindi?”

Muri ako kanya intekerezo zanjye zavuye aho zirigurukira, za nzozi narose ngashiguka nkabura amahoro nkicuza zingarukamo uko zakabaye, ikiniga kiranganza maze nongera kumufungurira umutima,

Njyewe-“Teta! Ntabwo nakubwira byinshi ariko uko undeba uku nkirangiza amashuri yisumbuye nafashe ikemezo cyo kuza gushaka ubuzima, ntabwo nasezeye ababyeyi ahubwo najyanye n’ umusore twiganaga mu ruhengeri, hahandi wansanze ukanshira inzira, ubu ntabwo bazi aho ndi,

Kenshi ndabatekereza, buri joro inzozi zanjye aba ari bo gusaaa…ndicuza kuba naragiye ntasezeye banza ari nayo mpamvu nabuze umugisha, nkaba mbona nta kizere imbere yanjye, rwose…”

Teta-“Rwose iki Songa?”

Njyewe-“Kenshi ndota inzozi zikomeye cyane, dore ejo bundi narose mu rugo iwacu ku ivuko hari agahinda ndetse n’ igishyito k’ ikiriyo, Mama na mushiki wanjye barira ayo kwarika…Teta! Uzi ko icyo kiriyo narose ari icyanjye?”

Teta-“Ntibishoboka? Oya…oya! Ibyo umbwira ni ibiki koko?”

Njyewe-“Ntabwo navuga ibi nkubeshya Teta! Bibaye byaba ari ukwikungurira niyo naba mbifitemo inyungu bwose, ahubwo ndagusabye mpfasha ndakwinginze ejo nibaramuka baduhembye ndashaka kunyaruka nkajya kureba umuryangi wanjye, data na mama n’ abavandimwe banjye nkabahumuriza kuko nta mahoro ngira kenshi iyo ngiye kugoheka”

Teta yatuje akanya gato maze ahita ambaza,

Teta-“None se Songa, ubundi ni iyihe mpamvu yatumye ufata umwanzuro wo kugenda udasezeye umuryango wawe?”

Njyewe-“Teta!......N’ ubuzima twari tubayemo butoroshye, nafashe umwanzuro kuko nzi ko impfura ivukira gukura umuryango mu makuba mpfa kugenda, numvaga ko nzagaruka narabaye undi, nzanywe no kubateturura ariko ni ukuri ibyo nibwiraga biri kure nk’ ukwezi,

Niyo mpamvu nifuza kunyarukirayo byibura bakamenya ko mpari naho ndi nibyo bucya nirukiramo ngataha ndwana n’ imyotsi ngasinzira nshiguka….Teta mpfasha ni ukuri kandi wumve ko mu magana y’ amamiliyoni y’ abatuye isi ari wowe nkeneye muri akakanya kuko wemeye kuntega amatwi y’ umutima uko nkuzi nuko umutima wanjye wakwakiye ntiwanyumvira ubusa”

Nyuma y’ akanya katari gato nanone twese dutuje, Teta yongeye kubura amaso arandeba turayahuza maze arambwira,

Teta-“Songa! Humura ndakumva kandi amarangamutima yawe yankoze ku mutima, uri mu basore bake mbonye ko bagifite agatima ko kwibuka agaciro k’ umuryango, bibaho ko rimwe na rimwe umuntu afata umwanzuro atitaye ku bindi bitewe na byinshi yabonye ndetse nicyo ashaka guhindura,

Wikwicuza ko wahirimbaniye kuba ka kanyoni kaguruka kakamenya iyo bwera, ukajya gushaka icyakura umuryango wawe mu makuba ukamenya nuko isi imeze hanze aha”

Njyewe-“None se Teta! Urabimpfashamo ejo nibaduhemba nzanyarukire ku ivuko?”

Teta-“Harya ubwo ni hehe?”

Njyewe-“Ko atari hano hafi ra, ni iyo bigwa keretse niba waragenze igihugu cyose nibwo wenda nakurangira ukaba wahamenya”

Teta-“Ibyo nabyo, wowe mbwira gusa, najya no ku ikarita nkahamenya Songa ariko nkahamenya”

Natangiye kurangira Teta iwacu, yewe n’ ibiti n’ amabuye ntabwo nabisize, ndangije kumurangira twamaze akanya gato nanone ducecetse, nari ntegereje ko anyemerera ubufasha bwe ngo mbe nabona uruhushya.

Hashize akanya arambwira,

Teta-“Songa! Rero hariya ukuntu dukora ntabwo byoroshye kubona konji utaramara amezi atatu mu kazi, cyakora uruhushya rwo waruboma rutarengeje iminsi ibiri, gusa byasaba ko uba ushatse umusimbura muri iyo minsi…ibyo byo nta mpungenge kuko ndahari”

Njyewe-“Oooh! Ntiwumva se! Urakoze cyane rwose! Ni ukuri urakoze pe”

Teta-“Hanyuma rero reka dutegereze ko ejo baduhemba….nako ndabyizeye neza, ahubwo mu gitondo uzindukire ku kazi i wacu usabe uruhushya, nzakwereka uko nzabigufashamo”

Njyewe-“Urakoze cyane Teta! Rwose….kugushimira byo….”

Teta-“Oya sha Songa! Sinakubujije se? Narakubujije rwose byose simbikorera gushimwa ahubwo nuko biba bikwiye”

Nyuma y’ akanya gato dutuje, ubwenge bwanjye bwatangiye gusatira amarembo yo mu rugo, numva ntangiye kugarura imbaraga, mu gihe nari natwawe numvise telephone ya Teta irasonnye twese turikanga mu kureba uwari umuhamagaye,

Teta-“Uuuh? Bily se ko ampamagaye kandi bigenze bite? Arabizi wabimubwiye ko turaba turi kumwe?”

Njyewe-“Reka reka ntabyo namubwiye, mwitabe buriya wasanga hari icyo afite ashaka kukubwira”

Teta yakanze yes ashyira muri bwa buryo bwa volume yatumaga numva neza ibyo bavugana na Bily umusore twabanaga,

Teta-“Hello!.....ni meza Bily….

Bily-“Ewana nanjye ndaho ariko umusore wawe yananiye pe! Kabisa natangiye gukeka ko amaze kurengwa,nako ni nabyo amaze kugwa ivutu none atangiye kuzamura intugo”

Teta-“Uuuh? Gute se kandi?”

Bily-“Teta! Uriya musore wanzaniye banza ntazamushobora, none se umusore uhembwa ntanagure ikiro cy’ umuceri ngo dusangire akaguma ategereje ko mpaha, ahubwo akanyibeta akayanywera agataha ansogongeza…kandi iyo nyafite njye ndamugurira agasinda mu gitondo ukamuvura hang over…..”

Teta-"Ariko se Bily ubundi ko nabyirengagije simbikubaze, ubundi buriya ibyo watangiye gushoramo umusore waje gushaka imibereho ubona ari ibyo? Kumucumbikira se bivuze kumuyobora mu ngeso zawe?"

Bily-"None se niba yaraje ari umuturage ntabwo agomba gusirimuka? Cyangwa wamuzanye ngo tubane utanzi neza?"

Bily yakome kuvuga byinshi ari nako yikiriza nkubyumvise bwa mbere, akanyuzamo akandebana indoro yuje ikiniga…...

Bily-“Teta! Uziko no kujya ateka yari yemeye yabivuyemo? Ubu aya masaha ntiyari yataha mu rugo kweli, bivuze ngo yivumbuye ntabwo azongera guteka”

Muri ako kanya telephone yarikupye, n’ ubundi nta gishya Teta yumvaga byose nari nabimubwiye, nyuma yo kwitsa umutima…...

Njyewe-“Teta! Reka mpfate inzira ntahe,ndumva Bily...nako Boss yarakaye ubwo ni ahejo ku kazi nje gusaba uruhushya”

Narahagurutse nawe arahaguruka, dusohoka ntawe uvuga, dukomeza ku muryango w’ igipangu dutangira kuzamuka n’ amaguru, tugeze imbere gato arahagarara nanjye ndahagarara, sinzi uko byaje mufata ibiganza,

Njyewe-“Ndabibona urananiwe, iki nicyo gihe cyawe cyo gusubira mu rugo, gusa wakoze cyane ntawe nabonye nkawe, Imana izampfashe nzakwiture….”

Teta n’ ikiniga yahise ambwira atuje ati…

Teta-“Ntabwo ndushye kugumana nawe ahubwo mpagaze hari icyo nifuzaga kukubwira”

Njyewe-“Yego ndakumva kandi nguteze amatwi”

Teta-“Ihangane Songa! Guca bugufi n’ impano itagira benshi, iyo ufite icyo ushaka ntubyigana, iyo ubonye aho wikinga imvura, ijoro ryaza ukegekaho ukahaba nta kiguzi nta mpamvu yo kutazinduka ukubura ku muryango n’ ishyaka ryinshi,

Nashimishijwe no kuba uzi aho wavuye kandi waragize intego kuva kera, kwihagararaho ugitangira biroroha kuruta kwihagararaho utsindwa, ihangane ukomeze wikwicara aho ugeze, niyo wagenda buhoro ariko komeza ikindi kandi nanjye ndacyahari, igihe uzajya uhindukira uzajya umbona”

Numvise umutima wanjye wakiye inkomezi, ibiganza byanjye bikomeza ibya Teta, ndamuhobera cyane tukiri aho twumvise intambuko z’ inkweto turarekurana, Teta ahindukiye ngo arebe abo bantu batambuka yahise yikanga, ahita avuga buhoro,

Teta-“Ni ba Sister! Noneho sinzi icyo ndasobanura”

Baramanutse baducaho batavuze, ako kanya Teta ahita andekura amanuka inyuma yabo yihuta cyane kuko yari yasize akinze.

Nyuma y’ akanya gato ibitekerezo byanjye biri kure nateye intambwe nzamuka nihuta, ngeze ku muhanda mpagarika moto ngo nihute njye gukora inshingano niyemeje, nagezeyo nsanga hakinze Bily nta wuriyo.

Nahise mpfata telephone ndeba nimero ye ndamuhamagara, bibaye ubwa gatatu aritaba,

Bily-“Bite wangu?”

Njyewe-“Eeeh! Ni Sawa Bro! Wagorobereje hehe se ko ngeze mu rugo nkakubura?”

Bily-“Nabaye ntembereye gato….ntabwo nari kuguma mu rugo nkanuye amaso ntegereje ko mbona ibiryo ku meza, nahise nizamukira ku muhanda ngo ndebe icyo mpumuriza igifu, washakaga kungurira aka brochette se nkurangire aho ndi ubu?”

Njyewe-“Eeeh! Aka brochette….buriya ariko ni vuba, ubwo wagatekereje kari mu nzira, none se wasize agafunguzo hehe?”

Bily-“Wapi nagatwaye kabisa”

Njyewe-“Ubwo ndagutegereza cyangwa nyaruke nze ngatware?”

Bily-“Urantegereza wangu! Ntabwo ndi buze gutinda kabisa, wihangane ntabwo ntinda”

Njyewe-“Sawa nta kibazo”

Nicaye ku rubaraza nkomeza gutegereza Bily, isaha imwe irashira, abiri arashira nongera kumuhamagara ariko ntiyayitaba.

Nakomeje gutegereza ndarambirwa ntangira kugwa agacuho negama ku nkingi nongeye kwikanga hari unkozeho….yari wa musore wabaga mu gipangu Bily yajyaga asigira urufunguzo, yari amaze iminsi ashatse umugore akocoye,

Aimable-“Bite wangu! Aya masaha wicaye aha? Byagenze bite?”

Njyewe-“Ahwiiii!Wahora niki ko naruheze inyuma?”

Aimable-“Uuuh? Bily se arimo cyangwa?”

Njyewe-“Wapi nta wurimo, yanshyize ku kagozi ngo araje none dore”

Aimable-“Ubundi se ko yajyaga ansigira urufunguzo byagenze bite? Kandi agenda twahuye aranansuhuza”

Njyewe-“Buriya wasanga yibagiwe”

Aimable-“None se ubu ngufashije iki ko nawe ubizi ko maze iminsi ngize ntya ngakocora bugacya nkubita ikivugirizo ku muharuro? Ubu nyine ntabwo wabona aho wirambika kuko nta cyumba cy’ abashyitsi ngira”

Njyewe-“Nta kundi nabigenza! Ndakomeza ntegereze igihe azira”

Aimable-“Ayayaya! Ihangane kweli, nanjye buriya nkora ijoro, ariko nyine kuko nsigaye nsiga umuntu mu buriri nsigaye ntoroka nkaza kumva ko bwashyushye, buriya saa kenda zo mu rukerera mba naje”

Njyewe-“Yeeee? Saa kenda se zageze?”

Aimable-“Eeeh Kareee…. ni hafi sa kumi ahubwo reka mbe ngukomeje nigendere! Wihangane kabisa”

Aimable yaragiye ansiga aho, muri ako kanya, muri icyo gicuku nako muri urwo rukerera nongeye kubaza Imana aho ubuzima bwanjye bwerekera, nongera kwibuka Teta ambwira kuva kwa Bily nyuma yo kubona ko aho najya hose nagorwa akankomeza, akansaba gukomeza guca bugufi no kwihangana ngo nzagere ku ntego niyemeje.

Nkiri kure nagiye kumva numva umugeri ku rugi rw’ igipangu ngo poo! Yari Bily wari utashye, adandabirana acigatiwe n’ abakobwa babiri…………………………………..

Ntuzacikwe na Episode ya 16 yiyi nkuru “Nanjye si njye” ku munsi w’ejo

Genesisbizz

Related Articles

Ibitekerezo

  • - mtg

    songa niyihangane kuko azatandukana na bily kuneza bigaragara kuko agiye ubu bily yabireba ukundi ubwe azamwiyirukanire

  • - moses

    ooorara!!! mbega ubuzima birababaje arko ntakundi isi nishuri peeee!!

Igitekerezo cyawe kirashyirwaho aruko gisusumwe

TANGA IGITEKEREZO