Episode 16: Ngiye gusura umuryango, Bily yanyishyuje ibyo atambikije

Nkiri kure nagiye kumva numva umugeri ku rugi rw’ igipangu ngo poo! Yari Bily wari utashye, adandabirana acigatiwe n’ abakobwa babiri. Badandabiraga nk’ abagahaze, agacupa Bily yari afite mu ntoki niko kari kamukuye mu bagabo kakamushyira mu maboko y’ abandi, aho nari negamye narashigutse njya gufatafata gusa ntibyankundiye,

Bily-”Toka wewee! Nta soni wowe urazana izo njaba zawe ngo urankoraho? Harya ubundi nkugezemo angahe ngo nkwirukane?”

Mu gihe nkibazaga kuri ayo magambo, umwe mu bakobwa bari bamuri iruhande bamurandase yahise avuga,

We-“Uyu ni wa mukozi wawe watubwiraga Bily? Ko mbona ari mukuru kuki wamwitaga Kadogo?”

Bose-“Hhhhhh!”

Basekaga ubusa…nako bari basenderewe n’ ibyishimo byavaga mubyo banyweye, batambuka imbere banshaho bagera ku muryango, ba bakobwa bamusaka mu mufuka bakuramo urufunguzo barakingura barinjira.

Nanjye naratambutse ndinjira mboneza imbere mu cyumba cyanjye ndaryama, dore ko ibitotsi nari mbitwaye mu ntoki.

Nkirambika numvishe umuntu ukomanze, mfunga umwuka ngonumve neza, yongeye gukomanga numvishe ari ijwi ry’ umukobwa,

We-“Ese ubwo wakinguye? Ntabwo uri kunyumva?”

Narabyutse ndicara nta mwanya nari mpfite wo gutekereza nambara inkweto njya ku rugi ndakingura, wa mukobwa umwe muri ba bandi ahita yinjira.

Yari umukobwa mugufi ubyibushye, yari afite imisatsi yiteyeho imanuka mu mugongo, ntabwo yari yambaye bigufi ahubwo yari yambaye bigufi cyane,

We-“Eeeh! Mbega wowe, uzi ko yari yaryamye di? Ubwo se ntabwo wanatekereza ko mu nzu yanyu harayemo abakobwa?”

Njyewe-“Ibyo nabitekereje ariko se hari ubufashe mukeneye ngo mbubahe mundeke nduhuke?”

We-“Uruhuke? Hari umukozi se uruhuka, ahubwo ndaje ngo ukore n’ akandi kose!”

Njyewe-“Akahe se kandi? Ubu se iri joro nateka koko? Oya niba ushonje nawe itekere aya masaha nayo kuryama kandi umpfashije wagenda nkaryama”

Ako kanya wa mukobwa yarasetse cyane aba yidunze ku buriri noneho numva birandenze mbura icyo nkora, amaze gutuza,

We-“Ko utaza se? uri muzima cyangwa ufite ikibazo?”

Njyewe-“Nze ngire nte se? Urashaka ko njyewe nawe turarana?”

We-“Ariko se uyu musore bite bye?”

Njyewe-“Ariko ubundi ntaho mugira mutaha? Niba mwari muje muherekeje Bily mukaba mumugejeje hano mwatashye aho mutaha?”

We-“Ariko uranyirukana ni wowe wanzanye?”

Njyewe-“Niba ntakuzanye se bivuze ko wamvogera uko wiboneye? Umenye ko ntasangiye namwe urumva neza?”

We-“Eeeh! Ushatse uradututse ngo tuguhagiyeho??”

Muri ako kanya hari uwa kubise urugi ahita aninjira, yari Bily wagwiriranaga, avuga rutava mu kanwa,

Bily-“Hhhhh! Songa! Wabonye? Wabonye umwana mwiza utagoranye, yagusanze no mu cyumba, Hhhhh! Buriya ntabwo ndi nkawe utaha avuye ahantu akibagirwa kuntahanira uruhisho, nanjye nakwibutse irwaneho”

Yahise asohoka arakingamuri biranyobera wa mukobwa arahaguruka aza ansanga n’ akajwi gato akomeza kumbwira,

We-“Umusore mwiza nkawe koko bamuterekera ibiryo ku meza akananirwa kurya? Ngaho nawe mbwira? Ubu se ngukurure ngushyire ku buriri mpfate amaboko yawe nyishyireho n’ ibindi byose mbyikorere?”

Uko yabivugaga ni nako yakomezaga kunkoraho buhoro buhoro, ntabwo nabyihanganiye nahise musunika nkingura umuryango ndasohoka ngeze muri salon nasanze Bily aryamye mu ntebe sinabyitaho ndisohokera nicara ku rubaraza.

Nyuma y’ iminota mike wa mukobwa nari nasize mu cyumba cyumba cyanjye yasohotse avugira kuri telephone,

We-“Ndaje …ndaje Cherie!...ugeze ku muhanda? ….ndaje sha…”

Yanshiyeho arasohoka, nitsa umutima nsubira mu nzu nkomeza mu cyumba bwasaga naho bukeye.

Narebye kuryama ariko mbona ndamutse nsinziye nakanguka ntinze, byari nka saa kumi nimwe za mu gitondo, nahise njya koga nditegura, nyuze muri salon nongera kwitegereza Bily wari wasinziriye ubudakanguka….nanga kumukangura ndasohoka negekaho nerekeza ku kazi.

Nagezeyo hakiri kare birumvikana ntegereza saa mbiri ngo zigere njye kwaka uruhushya kwa Manager, zarantindiye ariko ziragera ndakinga ndagenda, nagezeyo mpurira na Teta mu marembo,

Teta-“Songa! Bite?”

Njyewe-“Ni byiza Teta! Tuhagereye rimwe wagira ngo twari twabivuganyeho”

Teta-“Ni ukuri pe! Wagezeyo amahoro se? Wowe na Bily bimeze bite?”

Teta yambajije atyo ndeba kumubwira ibyaraye bimbayeho ariko ndyumaho kuko hari icyo nifuzaga kurusha ibindi,

Njyewe-“Nta…nta…nta kibazo Teta ahubwo….”

Teta-“Sha njyewe nyine byari hatari uzi nkigera mu rugo?”

Njyewe-“Eeeh! Ukigera mu rugo byagenze bite Teta?”

Teta-“Reka tube tubiretse ahubwo se harya ubu urasaba uruhushya ruvuga iki ra? Kugira ngo Manager yumve neza impamvu yawe?”

Njyewe-“Hari ikibazo se mvugishije ukuri nkavuga ko ngiye kureba umuryango wanjye umunsi umwe gusa?”

Teta-“Ariko wa muhani iyo ni impamvu yumvikana, ahubwo wowe genda mu biro bya Manager,ibindi nzi uko ndabigenza”

Ntabwo niriwe mubaza uko arabigenza ahubwo nahise ngenda nihuta nkomanga ku muryango wo kwa Manager inshuru ya mbere, iya kabiri ngiye gukomanga bwa gatatu urugi rurakinguka habuze gato nari mukomanzeho,

Manager-“Bite wowe? Ufite ikibazo cy’ amatwi cyangwa? Igihe navugiye ngo kalibu ntabwo wumvishe?”

Njyewe-“Mumbabarire ntabwo nari numvise, nakomeje gutegereza ko mumpa kalibu”

Manager-“Ariko nta kibazo, aho kwinjira udakomanze wa mugani….ngaho ni kalibu”
Narinjiye aricara ndanjye ndicara,

Manager-“Bite se ko utari ku kazi ukaba uzindukiye hano hari ikibazo ufite?”

Njyewe-“Birumvikana nicyo kinzanye hano, nari nje gusaba uruhushya rw’ iminsi ibiri nshaka gusimbukira mu rugo”

Manager-“Iminsi ibiri? Iminsi ibiri yose iwanyu se uzaba uhamara iki? Urumva twamara iminsi ibiri ducuruza dukinze?”

Muri ako kanya hari uwakomanze ahita yinjira…yari Teta, arambika impapuro ku meza,

Teta-“Eeeh! Songa bite? Uziko nari nibagiwe? Uyu musore yari yambwiye ko yifuza uruhushya rw’ umunsi umwe, nibagiwe kubabwira”

Manager-“yari yabikubwiyeho se?”

Teta-“Yego! Yari yambwiye nari namwemereye ko namusimbura nkuko mu mategeko bisanzwe bigenda”

Manager-“None se ko yabihinduye iminsi ikaba ibiri uzayikora?”

Teta-“Nta kibazo rwose nzayikora”

Manager-“None se aragenda adahembwe?”

Teta-“Oya birumvikana, ahubwo countable mwamubwira agashyira amafaranga vuba kuri compte akagenda afite icyo ajyanye dore ko ari umushahara we wa mbere”

Manager-“Ese ubundi musore ufite compte muri bank?”

Njyewe-“Oya ntayo mpfite”

Manager-“Yampaye inka! Umusore nkawe ubayeho utagira compte?”

Teta-“Erega mwibuke ko aribwo yari akiva ku ishuri kandi aka ariko kazi ka mbere yari abonye”

Manager-“So, ubwo se baramuhemba gut era? Ariko bayamuhe mu ntoki, ariko uhite ufunguza compte ubutaha ntabwo bazaguhemba udafite compte”

Njyewe-“Ndabyumva kandi ndabikora rwose”

Manager-“Teta! Mujyane kwa kontabure ayamuhe mu ntoki, ubwo urahita ujya kumusimbura uyu munsi nejo”

Narashimiye turasohoka, dukomereza kwa kontabure, Teta akomanga ku muryango akinguye asanga hakinze.

Yahise afata telephone arahamagara, nyuma yo kuvugana nawe ahita ambwira,

Teta-“Songa! Arambwiye ngo yagiye kuri bank, ni ukumutegereza buriya”
Njyewe-“Nta kibazo”

Teta-“Rero njyewe reka mbe ngiye kugusimbura ku kazi, nitutongera kubonana ugire utugendo rwiza, nizeye ko urasanga bari amahoro, ubansuhurize ubabwire ko hari umukobwa utabazi ariko ubakunda, uti itahe n’ ubusa nakabatashyeho nkamenya abibarutse Songa”

Njyewe-“Urakoze cyane Teta! Ningerayo nzaguhamagara, kandi wenda ejo nimugoroba ningaruka, tuzicara ahantu ngushimire”

Teta-“Hhhh! Nta kibazo Ganza!Ugire urugendo rwiza Imana igendane nawe”

Teta yarampobeye agenda atyo, mukurikiza amaso mpaka arenze, nongeye gushimira Imana yamuremye, ikamuha umutima mwiza utangaje akaba igitangaza kuri benshi.

Namaze nk’ isaha ntegereje ngiye kubona mbona kontabure araje, akingura vuba ambwira,

We-“Eeeh! Wihangane kabisa nasanze umurongo kuri bank, manager yambwiye ko nguha amafaranga yawe mu ntoki, ndayazanye rwose kandi unyihanganire”

Njyewe-“Nta kibazo, kwihangana utegereje amafaranga ntacyo bitwaye”
Nyuma y’ akanya gato…

We-“Akira sinya hano ubare niba izo note zuzuye icumi”

Narasinye mbara inote za bitanu icumi ndamushimira ndasohoka, nagiye nsiganwa ku muhanda mpfata moto ngo nihute njye kwitegura mpfate urugendo.

Nageze mu rugo nsanga Bily yicaye hanze ku kabaraza yota, ameze nk’ umurwayi, yota izuba,

Njyewe-“Bily! Bite se?”

Bily-“Bite se iki kandi wagiye utansigiye ibyangomwa byanjye na telephone yanjye warayeumbikiye?”

Njyewe-“Ngo ibyangombwa byawe naraye nkubikiye?”

Bily-“Umva ngo arijijisha, ubwo se urijijisha wijijisha iki? Nizere ko aribyo unzaniye ariko?”

Njyewe-“Ariko ntabwo ndi gusobanukirwa neza ibyo umbwira”

Bily yahise ahaguruka maze avugacyane ntacyo yikanga, n’ uburakari bwinshi ndikanga cyane...

Bily-“Ndi kukubwira ngo umpe telephone yanjye n’ ikofi yanjye waraye umbikiye, kandi ntushake kunshunaguza kuko ndabyibuka neza ko nageze hano mbifite”
Njyewe-“Ibi niki kandi none se uravugisha ukuri ntabyo ufite?”

Mu gihe nari nkimubaza yahise atangira kunsaka akora mu mifuka yose nkomeza kumukinga umufuka wari urimo ya mafaranga ya mbere nari mpembwe akomeza gushyiramo imbaraga nyinshi aba akozemo ayazamura yose uko yakabaye…………………………….......

Ntuzacikwe na Episode ya 17 yiyi nkuru “Nanjye si njye” ku munsi w’ejo

Genesisbizz

Related Articles

Ibitekerezo

  • - mtg

    Burya ayatwaye byambabaza ahubwo no mubuyobozi mugereyo

  • - mtg

    Burya ayatwaye byambabaza ahubwo no mubuyobozi mugereyo

  • - Muhoza

    mbega inkuru wee, songa ihangane mwana wa mama guca bugufi nibyo bya mbere, wihangana na Bily wikirara amaherezo uzatsinda abakunzi bawe turagusengera

  • - moses

    yoooo!!!! disi mbega ubuzima ngoburasharirira songa .

Igitekerezo cyawe kirashyirwaho aruko gisusumwe

TANGA IGITEKEREZO