Episode 17: Ntacyo yikanga, Billy yatagaguje igeno ryanjye

Mu gihe nari nkimubaza yahise atangira kunsaka akora mu mifuka yose nkomeza kumukinga umufuka wari urimo ya mafaranga ya mbere nari mpembwe akomeza gushyiramo imbaraga nyinshi aba akozemo arayazamura uko yakabaye ndwana no kuyamwaka....

Njyewe-“None se….ko untwarira amafatanga kandi uri kunsaka telephone n’ ikofi byawe? Bily mpa amafaranga yanjye…..”

Billy-“Nta soni ngo nguhe amafaranga kandi uvuye kugurishamo telephone yanjye? Reka nze ahubwo nguhururize igipangu cyose mbabwire ngo tubana n’ umujura hano maze ndebe ko batakwiyirukanira nigaramiye ari wowe wizize”

Njyewe-“Ariko se Bro! Ubwo urashaka kugera kuki koko? Ubu natinyuka kukwiba gute n’ ukuntu wangiriye impuhwe ukampfasha, nkaba hano nk’ umuvandimwe wawe icyo untegeka cyose ko ngikora, hari ingeso mbi wambonyeho zatuma unkekera ubujura?”

Billy-“Kare kose ubundi wihaga ibyo gusakuza usakuza mu biki, tuza twumvikane, niba wemera icyaha, telephone yanjye ukaba uvuye kuyigurisha, ndatwara aya mafaranga kandi nta kintu na kimwe wemerewe gusohora mu nzu...ubundi nkubure!"

Njyewe-“Billy! Ngwino tujye mu nzu nkwibutse uko byose byagenze, nyizera ntabwo ndi umuhemu, aho kugira ngo nguhemukire warangiriye neza nazinga ngasubira iwacu ariko ntavanye umugayo hano”

Billy yahindukiye avugira mu matamatama ibyo ntumvaga twinjira mu nzu yicara arakaye cyane maze ndatuza ngerageza guca bugufi ngo musobanurire uko byose byaraye bigenze,

Njyewe-“Bro! Nubwo uri kunkeka bwose ariko ntabwo ari njyewe watwaye ibyangombwa byawe na telephone yawe, ahubwo niba koko wabibuze, ibuka neza ba bakobwa mwaraye muzanye, bashobora kuba aribo baba bakubikiye”

Billy-“Njyewe nzana n’ abakobwa?”

Njyewe-“Uuuh? Muri make se ushatse kuvuga se ko utabyibuka?”

Billy-“Reka reka njyewe nta bakobwa nigeze nzana nabo, ubwo utangiye kumbeshyera rero ngo ukunde umpuguze ibyanjye ndaje mpuruze abantu benshi baze maze ngute hanze”

Njyewe-“Ariko se ibi niki mwo kabyara mwe? Ubu se nkubwize iki?”

Billy-“Wapi wana ibyo uvuga ntabwo mbyumva na gato, ndabizi neza nageze hano mpfite telephone n’ ikofi yanjye….”

Mu gihe Bily yari akivuga ibyo ako kanya yatunguwe n’ icyo yabonye agaceceka, agahaguruka, nanjye nagize amatsiko mpanga amaso aho yari ahanze aye, arunama akura agatambaro k’ umutuku kari munsi y’ ameza arakitegerezaa….hashize akanya katari gato,

Billy-“Aka gatambaro ndakibuka…koko ibyo uvuga bishobora kuba ari byo”

Njyewe-“Ibyo nkubwira nibyo Billy! Umwe mu bakobwa mwazanye yari yakazirikishije imisatsi ye....ibuka! Ibuka neza”

Billy-“Ndabyibutse koko bariya bakobwa twahuriye mu kabari turasangira, mberuka bambwira ngo mbayobore bandandate ibindi ndumva ntabyibuka….”

Njyewe-“Imana ishimwe ubwo byibura nibyo ubyibutse, mwaje kuza rero musanga naruheze inyuma, byari nko mu masaha ya saa kumi za mugitondo, tumaze kwinjira nagiye kuryama mbasiga muri salon, usibye ko no kuryama byanze umwe muri bo akansanga mu cyumba ”

Billy-"Eeeh! None se wisayidiye?"

Njyewe-"Reka reka reka! Njyewe? Ntabwo iyo nzira nayica nzi amahwa n’ utununga bibamo namuhunze ndisohokera"

Billy-“Hanyuma se njyewe byagenze bite?”

Njyewe-“Mwebwe se? Mwebwe mwagumye muri salon ntabwo nzi uko byaje kugenda, gusa uwo mukobwa wansanze mu cyumba yanshiyeho agenda yihuta bishoboke ko yaba yari ari kuvugana na mugenzi we wari wagiye mbere ye”

Nyuma y’ akanya gato Billy yongeye kwitsa umutima,

Billy-“Ubu se tuvuge ko ari bo bantwariye ikofi na telephone?”

Njyewe-“Ntabwo nabashinja ariko nkuko uri kuvuga ko ari njye watwaye ibyawe nabo wabakeka?”

Billy byaramucanze ashyira urutoki ku munwa, hashize akanya ahita agenda yihuta ajya mu cyumba nanjye mwoma mu nyuma,

Njyewe-“None se Bro! Wampaye ayo mafaranga ko nari nje kukubwira ko nsimbukiye iwacu mu cyaro”

Billy ntabwo yigeze anyumva yakomeje kwica amatwi, mwijiraho nkomeza kumubwira nsa n’ umwinginga,

Njyewe-“Nyine urareba, ayo mafaranga ni umushahara wanjye wa mbere, nari maze guhembwa, nari natse uruhushya ngo njye mu rugo njye kubahumuriza, kuko mpora mbarotera inzozi mbi, rwose yampe ngende usigare ukurikirana bariya bakobwa”

Billy-“Oya ahubwo wowe niba wumva uri umwere yantize ngende nkurikirane ziriya ndaya, nimbona ikofi yanjye ndajya ku cyuma mbikuze nyagusubize ubone kugenda”

Njyewe-“Oya Bro! Rwose ndakwinginze, mpfasha urebe ubundi buryo ariko umpe ayo mafaranga yanjye mpebwe bwa mbere nsimbukire mu rugo, ndabizi ntabwo ubura ahandi ukura andi ugakurikirana abajura”

Billy-“Ariko se ufite ikihe kibazo ko amafaranga ndayagusubiza? Kuki ushaka kunsiga mu byago kandi uzi neza ko ari njye ukugize? Wowe amafaranga ndayagusubiza nimara gufata abajura hari ikindi?”

Njyewe-“Basi fatamo aya ticket andi uyampe, ndacyeka utarenza bitanu?”

Billy-“Umva kandi! Ariko Songa! Ibyo nibyo uri kunyitura? Urumva byakumarira iki kujya kwishimana n’ababyeyi njye nsigaye mu marira nta naho nakura igihumbi cyo kurya? Mfasha ahubwo dufate abajura ibindi ubundi”

Nakomeje kwinginga Billy ariko aranga aba ibamba, ngerageza no gushyiramo imbaraga ariko biranga asohoka mu rugo, nagarukiye ku muryango w’ igipangu ndamureka aragenda.

Nagarutse nikoreye amaboko, nkomeza gutegereza byinshi..., bigeze nka saa saba inzara irandembya nirwanaho nk’ umusore, saa munani nibwo natangiye kwiheba ko ntagitashye.

Nakomeje kwiheba bigera saa kumi nakira ko ntagitashye, nka saa kumi nimwe nibwo telephone yanjye yasonnye ndebye mbona ni Teta umpamagaye, nkanda yes nshyira ku gutwi,

Njyewe-“Teta ndakumva!”

Teta-“Songa bite ko uri kuvuga buhoro byagenze bite? Uracyari mu modoka nturagerayo cyangwa uri kumwe n’ ababyeyi mbe nkuretse ubahe umwanya?”

Nikije umutima mu gihe ngishaka icyo mvuga Teta yongeye kumbazanya igishyika kinshi….

Teta-“Ko utambwira Songa ni amahoro?”

Njyewe-“Erega ntabwo nagiye, ntabwo byashobotse ko ngenda”

Teta-“Ntibishoboka byagenze bite?”

Njyewe-“Ni birebire Teta! Ntabwo nabikubwirira kuri telephone”

Teta-“Mana yanjye wee! Ubu se nkore iki koko? Basi se uri hehe ubu tuvugana?”

Njyewe-“Ubu ndi kwa Billy mu rugo”

Teta-“Nze nkurebe se?”

Njyewe-“Oya naba nkugoye Teta! Kenshi wahangayikiye ibyanjye ntako utagize, uyu mwanya ndifuza kukuruhura, ibisigaye nifuza kujya mbyirengera wowe ntacyo ngushinja kandi ntacyo utakoze, aho bigeze mparira umupira gusa, ikibuga nakigezemo kandi niyo natsindwa nzabyemera mparire abashoboye"

Teta-“Oya sha Songa! Reka nze nkurebe, ntabwo ntinda ndaje…..”

Nagiye gukomeza kumubuza kuza ariko aba yakupye, aho nari nicaye ku rubaraza aho n’ ubundi nari naraye, agatotsi kaba karantwaye birumvikana nari naniwe nongeye gushiguka hafi kwiruka hari unkozeho…yari Teta,

Teta-“Songa! Songa! Kuki wasinziriye hano? Basi iyo ujya mu nzu ukaba uryamye mu ntebe, ahubwo se usinzira ute wicaye ku rubaraza”

Njyewe-“Ahwiiiii! Teta! Mbabarira kari kantwaye, erega naraye ntanaryamye niyo mpamvu”

Teta-“Ntibishoboka? Wabujijwe niki kuryama?”

Njyewe-“Teta! Ni kalibu mu nzu”

Nagiye imbere twinjira muri salon, tumaze kwicara Teta akomeza kundeba mu maso, hashize akanya ahaguruka aho yari yicaye aranyegera yicara impande yanjye maze arambwira,

Teta-“Songa! Ndabibona ko hari icyabaye kandi agahinda ufite ndakabona, mbwira uko byagenze nje hano kubwawe”

Hashize akanya mbunza imitima, umwe umbwira ngo mbimubwire undi umbuza, nibutse ko Teta ariwe mpamvu yo kuba ndi aho nari ndi, nibuka ko ariwe wafunguye bwa mbere ubuzima nifuzaga kuzabamo maze ndamubwira,

Njyewe-“Teta! Ubu ntangiye kwibaza icyo nacumuye ku Mana kuko si gusa hari icyo impora gituma ntatuza ngo byibura nitse umutima nishime niyo byaba igihe gito kandi si ibyubu gusa ni ukuva kera nkiri muto”

Teta-“Oya wivuga utyo Songa! Ahubwo mbwira uko byagenze, Billy yongeye se kandi?”

Njyewe-“Teta! Ntabwo naguhisha urabizi ko ari wowe ngira imbere n’ inyuma, nkuko wabinsezeranyije aho ndi nta nzira mbona, urakoze kuba mpindukiye koko nkakubona,

Nijoro naraye ntashye ngeze hano nsanga Billy ntawe uhari, muhamagaye ambwira ko yagiye gutembera…..”

Nakomeje kubarira Teta byose uko byagenze, ntabwo byari binyoroheye kumubona akomeza kuzenga amarira mu maso ndetse agacishamo akihanagura, nanjye nkomeza kwicwa n’ agahinda mureba.

Maze kumubwira byose naratuje nawe akomeza gutsikimbana amarira mu gihe twari tugituje ako kanya telephone ya Teta yasoneye mu isakoshi ye abanza kuyihorera, yongeye gusona bwa kabiri,

Njyewe-“Teta! Ko utitaba telephone ni bite? Itaba nta kibazo sinkakubuze kwitaba kandi nanone wasanga uhiriwe ari ugushaka ufite akamaro”

Yakuye telephone mu mufuka akireba umuhamagaye yubura amaso arandeba, ahita ambwira,

Teta-“Songa! Ubu se ko bingoye kukubwira ko ngiye kugusiga? Njye na bakuru banjye twari dufite gahunda yo kujya gusura data wacu uri mu bitaro, nje aha mbyirengagije ariko kandi ntabwo nakwitandukanya n’ abavandimwe”

Njyewe-“Nta kibazo Teta! Igendere n’ ubundi hari ubwo kenshi umuntu yisanga wenyine, biragoye ariko ndihangana ntegereze Billy reka nizere ko ibyo yambwiye ari byo araza akajya ku cyuma akanyishyura wenda nkagenda mu gitondo nzindutse”

Teta-“Reka tubyizere Songa! Wasanga Imana yatumye urugendo ruhinduka ifite impamvu, kandi ntugire ikibazo uko biri kose ntibizahora gutya bizarangira kandi hanesha abihanganye”

Muri ako kanya yahise ahaguruka nanjye ndahaguruka turasohoka, tugeze ku muhanda atega moto ajyana agahinda nanjye ngarukana akandi.

Nagarutse nacitse intege amaboko nendaga kuyikorera ninjira mu rugo nongera kwicara kuri ka kabaraza, bwarinze buhumana Billy ataragaruka.

Nka saa mbiri z’ ijoro nagiye kumva numva telephone irasonnye mu kureba uwari umpamagaye…yari Billy, nitabye vuba ngo numve icyo ambwira,

Billy-“Yes yes Bro! Bite se wangu?”

Numvaga Billy asa n’ uwishimye cyane, muri ako kanya mpita ntekereza ko ashobora kuba yabonye telephone n’ ikofi ye ndetse numva ndaruhutse ntangira kumubaza cyane,

Njyewe-“Billy! Wabibonye se? Telephone n’ ikofi byabonetse?”

Billy-“Uri hehe wowe nicyo nkubaza?”

Njyewe-“Ubu ndi mu rugo nari nkigutegereje”

Billy-“Jya ku muhanda ubwire motari akugeze ku kabenzi...ni akabiri kari hano hafi ni magana atatu yonyine ntaguhende”

Njyewe-“Billy! Wasubiye mu kabari kweli? Niba wabonye ibyawe watashye ukaza ukaruhuka ko ugize amahirwe atabonwa na bose?”

Billy-“Uraje cyangwa ntuje?”

Njyewe-“Ariko se ibi niki kandi? None se urakomeje?”

Muri ako kanya umutima warankomanze ntekereza kunyaruka nkajya kumureba, nkaramira amafaranga yanjye nkamusigayo ngataha nkazinduka ngenda, niko byagenze nafashe moto nerekeza aho yari ari.

Nkihagera naramuhamagaye andangira aho ari, mu kugera ku meza yari yicayeho n’ abasore nka batanu Billy n’ ubundi kari kamugezemo, yahise ahaguruka vuba,

Billy-“Aaaah! Songa! Hhhhhh! Kalibu wangu! Kalibu sana! Gyz! Uyu ni wa mu Boss nababwiraga wambwiye ngo tube dufata rimwe araje yishyure, yahembwe kandi turabana iwanjye mu rugo”

Bose basakurije icyarimwe ngwa mu rujijo ako kanya mpfata akaboko Billy mujyana ku ruhande,

Njyewe-“Billy! Ibi nibiki urimo kweli? Nigeze nkubwira ko nje kugurira ziriya nshuti zawe? Ahubwo se ibyangombwa na telephone niba wabibonye bivuze kuza gusubira? Nawe ariko jya ugisha umutimanama inama umenye icyo gukora nk’ umusore wifuza ejo hazaza heza”

Billy-“Bro! Kuba mvuze ko watwemereye agacupa ntabwo ari ibintu bya hatali, nawe bagombaga kukubona mukamenyana kandi ntabwo wari kwicarana natwe gutyo gusa, ubwo nyine niba utakagura ni ubushake bwawe”

Njyewe-“Ngaho rero mpa ya mafaranga ntahe mu gitondo ndazinduka njya mu rugo, nawe urabizi ko ntagiye uyu munsi kubera wowe”

Billy-“Ahubwo se nsigaranye angahe?”

Njyewe-“Yeeee? Ushatse kuvuga iki Bily?”

Billy-“Ewana nayakoresheje ariko ntacyo nimbona ibyangombwa byanjye nzajya ku cyuma nyaguhe?”

Njyewe-“Ngo…ngo….ngo? Oya Billy ntabwo numva ibyo umbwira?”

Billy-“Nyine nagiye gushaka ba bakobwa….nako za ndaya ndazibura, mpa avance abasore babiri ngo bazimpigire nibazibona bandabure, na nubu baracyashaka, nishyuye n’ ideni nari mfite kandi muri byose byavuye muri ya mafaranga yawe, ubu hasigara make kandi nta nubwo nari nishyura hano, uraba wihanganye nubundi tuyamare, burya ngo urondereza ubuza bukimara nakubwiye ko nzayakwishyura nimbona ikarita yanjye ya bank”

Njyewe-“Yebababa weee! Ntibishoka weee! Ibyo umbwira n’ ibiki Billy? Oya…oya….Sinshobora kubyumva na gato, ngo…ngo ?”

Billy-“Eeeeh! Utangiye kwirakaza wowe? Utangiye kumpfata amashati nta soni! Eeeh! Uri no kunkurura ushaka no kunkubita?”.........................................

Umwanditsi w’ inkuru ndende abifurije weekend nziza, Ntimuzacikwe na Episode ya 18 yiyi nkuru “Nanjye si njye” kuwa mbere mu gitondo

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO