Episode 2: Igicuku kinishye narose inzozi zikomeye ndashiguka, mugitondo nzinduka niruka

Duherukana ubwo nari nageze kwa Leon maze nkamuhamiriza ko umunsi nzaba nahiriwe ikofi igaseka nkabona agafaranga nta kindi nzakora uretse kwihimura ku bakobwa bose nkabaha ibyo bifuza nkabarya imitima kuko numvaga ko nta rukundo rw’ ukuri rubaho, byose ari ukubera Belinda w’ amateka y’ akahise mu buzima bw’ ishuri….

Njyewe-“Leon! Nanjye si njye! Umuntu avuka ari mwiza ariko abo asanze bakamuhindura, Igikomere Belinda yanteye nzakivuriza kuri buri mukobwa wese uzemera kumpa ibiganza, nazinutswe urukundo kandi nanjye si njye! Nawe wanyumva”

Nkivuga ibyo ako kanya twikanze hari umuntu witsamuye, mu guhindukira vuba nakubise amaso uwo nabonye nkikanga, umutima ukansimbuka ngatitira nkabura aho nkwirwa.

Nakubise amaso umubyeyi usa na Leon, wari uhagaze inyuma yacu yambaye ikanzu nziza aniteze igitambaro cy’ umukara mu mutwe, nta kabuza namenye neza ko ibyo navugaga yabyumvise akamenya neza umugambi wanjye bityo ibyo kwemera ko mba iwabo birangiriye, atatunga umusore ufite umugambi mubisha nkuwo.

Leon-“Eeeeh! Mama! Ni wowe? Songa dore Mama! Uyu ni Mama wanjye akabura ntikaboneke kuri njye”
Leon yahise ahaguruka ahobera Mama we nanjye ndahaguruka ngo musuhuze abanza kunyitegereza cyane, amaze kunsuhuza,

Mama Leon-“Nari nyobewe abantu bateruye inzu naho sinkamenye ko waje, iyo uri hano rwose hehe n’ irungu, uvuga utaruhuka nka radio”
Leon-“Hhhhh! Ntubizi se Mama? Ahubwo se ibyo twavugaga wabyumvise?”
Leon yavuze atyo numva ijuru rirangwiriye murya urwara ngo aceceke, ariko Mama we ahita amusubiza,

Mama Leon-“Mbyumva bya hehe se ko numvaga muvugira hejuru gusa sinumve ibyo muvuga? Muba mucurikiranya amagambo yewe hari nibyo muvuga simenye ibyaribyo…imvugo z’ urubyirukuko rwubu se ma weya…”
Nariruhukije ako kanya mushiki wa Leon aba azanye ibiryo, ategura ameza tutangira gusangira tuganira maze dusoje…

Leon-“Mama! Uyu musore ureba rero yitwa Songa, twabanye mu myaka itatu tumaze i Nyanza muri COSTE yambereye inkoramutima, byabaye ngombwa ko tuzana nkuko yabinsabye, yifuza ko twaba tumucumbikiye akaguma mu mugi aho kujya kure y’ ahari amahirwe yo kubona imirimo”

Mushiki wa Leon yahise yungamo,
Marina-“Nibyo Mama! Kandi ntacyo byaba bitwaye, mu gihe bagitegereje kumenya ko bagize amanota yo gukomeza kaminuza yaba ari hano wa mugani akaba ashakisha dore ko byibura afite ako gatima!”

Mama Leon yacecetse akanya gato, ku mutima ntangira kugira impumu niteguye kumva umwanzuro… amaze kwitsa umutima avuga atuje,

Mama Leon-“Marina nawe Leon murabizi ko ntabafata nk’ abana banjye gusa ahubwo muri byose dushyira hamwe, niba uyu musore ari inyangamugayo koko, mukaba mwasanze kuba hano nta kibazo kibirimo ntacyo nabihinduraho gusa nawe musore, nizere ko utazahinduka ngo utubere umutwaro!”

Njyewe-“Oya rwose ibyo ntibizaba kandi ndabashimiye cyane Imana ibahe umugisha”
Leon-“Ntugire impungenge Mama! Ahubwo se ko ubizi ko tuba twarihanganye ku ishuri, tukanga gutoroka ikigo ngo tujye kunywa no kurya, tukaba dusoje nta mubyeyi badutumye, wadusohokanye ukatugurira tukarya tukanywa tukumva uko tubaye ko twushe ikivi?”
Marina-“Hhhhhh! Ariko Leon wamenya gusaba… nako gutereta”
Mama Leon-“Hmmm! Ugira ngo aroroshye? Ubwo se ari nkawe wahera he wanga? Tugende nyine!”

Twavuye mu rugo twerekeza mu mugi, twicara ahantu hamwe inyama n’ icyo kunywa bigwirirana bidusanga, ikiganiro kiryoshye cya Leon na mushiki we kitubera impamvu yo kunezerwa bidasanzwe muri ibyo byicaro, bwije cyane turikura turataha.

Igihe cyo kuryama cyarageze, njye na Leon tujya kurarana nkuko byahoze ku ishuri, kubera guhaga cyane agatotsi kansamiye hejuru karantwara.
Natangiye kubona mu cyaro i wacu…. mu rugo ruciriritse cyane, Mama na Papa bahinguye, Mama atereka agatebo kari karimo ibijumba mu mbuga, Papa yegeka isuka atangira gukaraba mu ntoki, Mama atangira guhamagara bashiki banjye bari basigaye ku rugo,

Mama-“Niko Matoro! Matoroshi wee! Ariko aba bana bagiye hehe ra? Matoroshiiiii”
Matoroshi-“Yeeeeee!”

Bashiki banjye babiri bato bankurikiraga baje biruka, nk’ ibisanzwe bari bahugiye mu kwikinira kuko usibye guteka nta kindi bari bazi gukora,
Papa-“Ariko uranyumvira? Matoro! Urumva ukuntu witaba nyoko? Si numva ngo ku ishuri babigisha ikinyabupfura?”

Mama-“Ahaaaa! Wibarenganya erega buriya ikinyabupfura kiravukanwa ntikigwa, ngaho nibaze baronge ibijumba musaza wabo ataza agasanga bitarashya”

Papa-“Eeeh! Harya Songa araza uyu munsi? Umuhungu wanjye arayarangije pe!, nizere ko agiye kunkura mu bukene dore naririye ndimara, ngurisha isambu ngo yige ngo wenda azaba umutegetsi”
Bakiri aho mushiki wanjye mukuru Mwiza nakurikiraga nawe yahise ahinguka yikoreye ubwatsi, aratura ariruhutsa maze yicara ku ibuye ryari riri mu mbuga….

Mama-“Uuuh? Ko wicara muko? Ubwo nta soni ufite?”
Mwiza-“Ariko Mama, habe no kundeka ngo nduhuke koko?”
Mama-“Uruhuka? Uruhuka kandi musaza wawe ari mu nzira aza? Enda cana mu ziko aba bana barangize kuronga ibijumba mushyiraho inkono, nanjye ngiye guca utuboga kwa Nyesi …”

Papa-“Yewe! Nanjye reka nigire kureba ko hari akarwa gashyushye wa mwuzukuru wa Gakwaya yazanye hano hirya ku kabari mbikire umuhungu wanjye nze kumuhemba ko arangije amashuri agiye kunkiza”

Mwiza-“Ariko Mama, Papa, ubu koko ngewe nzagira agaciro ryari? Ko Songa atandushaga ubwenge, kuki mutatumye nkomeza ishuri…harya ngo nuko ndi umukobwa?”

Mama-“Mwiza mwana wanjye, wabonaga ubushobozi bwari kuva hehe ko nawe uzi uko tubayeho?”

Mwiza-“Oya ntabwo mbyumva, ubushobozi ubushobozi iki? Ko mwagurishije byose kugira ngo Songa yige kandi naravutse nkawe…”
Papa-“Ceceka se nyine, kera hose nakubwiriye ko umukobwa ishuri rye ryisumbuye ari imirimo ntabwo wumva? Nakubwiye ko umukobwa agomba kwiga imirimo yo mu rugo, yakura agakobwa inka agashyingirwa, nawe ngo kwiga..kwiga..? Ugomba kumenya ko ayo wize ahagije ariho wagombaga kugarukira…nako reka nanigendere utavaho unshura umwuka….

Mushiki wanjye yahagurutse yiruka aho yari yicaye ajya mu gikari aba ariho atura amarira, muri ako kanya ndashiguka njugunya amashuka….ibyo nabonaga byari mu nzozi! mbega inzozi!”

Leon nawe yahise akanguka maze ahita ambwira vuba,
Leon-“Bigenze bite Songa? Ko ukangutse ushiguka ukajugunya amashuka bimeze bite?”

Njyewe-“Ahwiiiii! Bro! Ndose inzozi ariko banza ari impamo!”
Leon-“Inzozi? Urose izihe nzozi? Arabe atari Belinda”
Njyewe-“Ndose mu rugo bantegereje, ndetse na mushiki wanjye ari kurizwa nuko bamukuye mu ishuri ngo nige! Nabibonaga Papa na Mama bashyashyana ngo baze kunyakira….”
Leon-“Eeeh! Niba ari byo byo ntibyari kubura kuko ubu tutakiri mu buzima bw’ ishuri byanga binoga kuba twahinduye ubuzima ntibyari kubura mu nzozi, ryama usinzire kabisa nta muntu w’ umugabo urara ashiguka nkurimo amadeni”

Njyewe-“Ariko rero nakoze ikosa Leon! Kuba iwacu batazi aho ndi bizabatera kumpangayikira”
Leon-“None se nta muntu ubari hafi ufitiye nimero ngo ejo tubahamagare tubabwire?”
Njyewe-“Reka ntawe…”

Leon-“Nta ribi iryamire Bro! N’ ubundi ibyiza nukuzagenda ubatunguye warabaye undi, bakakubona bagasabwa n’ ibyishimo, mushiki wawe ukabona aho uhera umuhoza amarira”

Nta kundi narongeye ndaryama ndasinzira nongeye gukanguka nsanga ndyamye njyenyine kandi nari nararanye na Leon,
Narabyutse nambara udukamambiri ndasohoka ngeze hanze nkubitana na Marina mushiki wa Leon, yari yambaye utwenda duto abakobwa bakunda kwambara bari mu rugo, yicaye ari gusiga inzara z’ ibirenge bye,
Kuko atari yambonye nabanje guhagarara ndamwitegereza, hashize akanya ntera intambwe ndamwegera,

Njyewe-“Mwaramutse!”
Marina-“Ayiweee! Ahwiiiii! Urankanze!”
Njyewe-“Am sorry ntabwo nabishakaga”
Marina-“Ooooh! Nari nibagiwe ko uri mu nzu, waraye neza se?”
Njyewe-“Cyane rwose, hagati aho rero wambaye neza”
Marina-“Hahahah! Mana yanjye, ubu se uku niko kwambara neza? Hmm! Nabimenye ahubwo ushobora kuba ukunda umukobwa wambara imyenda migufi”
Njyewe-“Hahah! Ariko Burya biterwa nuko umukobwa aba ateye, nkawe rwose nta mwenda utakubera”
Marina-“Hhhhhh! Urakoze”

Nakomeje kwitegereza Marina wari wimutse avuye ku nzara z’ amano asiga inzara z’ intoki, sinzi uko yubuye amaso turayahuza mpita ndeba ku ruhande,

Marina-“Ese wari ukiri kundeba Songa?”
Njyewe-“Oya, oya ntabwo nakurebaga….ahubwo se nta ka base ngo nihumure mu maso ko…?”
Marina-“Eeeh! Reka nze nkakurebere”

Nkimara gukaraba mu maso ntarihanagura Leon yahingutse aho yiruka, avugana igihunga kinshi

Leon-“Songa! Songa! Banguka! Banguka Bro! Banguka vuba…”
Njyewe-“Habaye iki Leon?”

Ntiyigeze ansubiza ahubwo yahindukiye nk’ iya gatera ariruka nanjye mwoma mu nyuma ntazi aho tugana………………………………………………

Ntuzacikwe na Episode ya 3 yiyi nkuru “Nanjye si njye” ku munsi wejo

Genesisbizz

Related Articles

Ibitekerezo

  • - James

    Iraryoshye Eddy turagukurikiye cyane

  • - Bandekebaproprotais

    Komerezaho eddy gusa ugerageze Inkuru ijye iba ndende kuri buri ep

  • - Maombii

    Woooow eddy courage musore inkuru ni uburyohe, ziriya nzozi ni impamo kwa songa mu cyaro

Igitekerezo cyawe kirashyirwaho aruko gisusumwe

TANGA IGITEKEREZO